ޕެނަލްޓީ އިން މޮޅުވެ، ސްވިޒަލެންޑް ކުއާޓާ ފައިނަލް އަށް
8 ޖުލައި 2026 | ބުދަ 04:32އެންމެ ފަހުން ސްވިޒަލެންޑް އިން ވޯލްޑް ކަޕްގެ ކުއާޓާ ފައިނަލްގައި ކުޅުނީ 1954 ވަނަ އަހަރު. މިފަހަރުގެ މުބާރާތުގެ ކުއާޓާ ފައިނަލް އަށް ސްވިޒަލެންޑް ދަތުރު ކުރިއިރު، ކުއާޓާ ފައިނަލްގައި ނިކުންނާނީ އެންމެ ފަހުގެ ޗެމްޕިއަން އާޖެންޓީނާއާ ދެކޮޅަށް.
މެޗުން މޮޅުވުމުން ސްވިޒަލެންޑްގެ ކުޅުންތެރިން އުފާާ ފާޅު ކުރަނީ. | ގެޓީ އިމޭޖަސް
ފީފާ ވޯލްޑް ކަޕްގެ ގަދަ 16 ގައި ކޮލަމްބިއާއާ ދެކޮޅަށް ކުޅުނު މެޗުން، ޕެނަލްޓީ ޖަހައިގެން މޮޅުވެ ސްވިޒަލެންޑް އިން މުބާރާތުގެ ކުއާޓާ ފައިނަލްގެ ފަހު ޖާގަ ހޯދައިފި އެވެ.
އަންގާރަ ދުވަހުގެ ރޭ ދަންވަރު ކުޅުނު މެޗުގެ ފުރިހަމަ ވަގުތު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ. އެއާ އެކު، އިތުރު ވަގުތުގެ ދެ ހާފު ކުޅުނުއިރު ވެސް، އެއްވެސް ޓީމަކަށް ލަނޑެއް ނުޖެހުމުން، ނަތީޖާ ނެރުމަށް ޖެހީ ޕެނަލްޓީ އެވެ.
ނަތީޖާ ނެރުމަށް ޖެހި ޕެނަލްޓީގައި ސްވިޒަލެންޑް އިން ހަތަރު ޕެނަލްޓީ ކާމިޔާބު ކުރިއިރު، ކޮލަމްބިއާ އަށް ކާމިޔާބު ކުރެވުނީ ތިން ޕެނަލްޓީ އެވެ. ސްވިޒަލެންޑްގެ ޕެނަލްްޓީތައް ކާމިޔާބު ކުރީ ގްރަނިޓް ޝަކާ، ޒަކީ އަމްދޫނީ، ސެޑްރިކް އިޓެން އަދި ރުބެން ވާގާސް އެވެ. އެ ޓީމުގެ މަނުއެލް އަކަންޖީގެ ޕެނަލްޓީ ކާމިޔާބެއް ނުވި އެވެ.
ކޮލަމްބިއާ އަށް ކާމިޔާބު ކުރެވުނީ ޖުއާން ކިންޓޭރޯ ޖަމިންޓޮން ކަމްޕާޒް އަދި ލުއިސް ޑިއާޒްގެ ޕެނަލްޓީ އެވެ. އެ ޓީމުގެ ޑަވިންސަން ސަންޗޭޒްގެ ޕެނަލްޓީ ހުރަސް ދަނޑިއާ އަމާޒުވީއިރު، ކޫޗޯ ހެނާންޑޭޒްގެ ޕެނަލްޓީ ސްވިޒަލެންޑްގެ ގޯލު ކީޕަރު ވަނީ މަތަކޮށްފައި އެވެ.
އެންމެ ފަހުން ސްވިޒަލެންޑް އިން ވޯލްޑް ކަޕްގެ ކުއާޓާ ފައިނަލްގައި ކުޅުނީ 1954 ވަނަ އަހަރު އެވެ. މިފަހަރުގެ މުބާރާތުގެ ކުއާޓާ ފައިނަލް އަށް ސްވިޒަލެންޑް ދަތުރު ކުރިއިރު، ކުއާޓާ ފައިނަލްގައި ނިކުންނާނީ އެންމެ ފަހުގެ ޗެމްޕިއަން އާޖެންޓީނާއާ ދެކޮޅަށެވެ.
