ބެލްޖިއަމް އިން އެމެރިކާ ކަޓުވާލައިފި

މިހާރު ކުރިއަށްދާ ފީފާ ވޯލްޑް ކަޕްގެ ގަދަ 16 ގައި އެމެރިކާއާ ދެކޮޅަށް ކުޅުނު މެޗުން މޮޅުވެ، ބެލްޖިއަމް އިން މުބާރާތުގެ ކުއާޓާ ފައިނަލް އިން ޖާގަ ހޯދައިފި އެވެ.

އަންގާރަ ދުވަހުގެ ފަތިހު ކުޅުނު މެޗު ބެލްޖިއަމް އިން ކާމިޔާބު ކުރީ 4-1 އިންނެވެ. މެޗުގައި ބެލްޖިއަމް އިން ލީޑު ނަގާފައި ވަނިކޮށް، އެމެރިކާ އިން ނަތީޖާ ހަމަހަމަ ވެސް ކުރި އެވެ. ނަމަވެސް، އިތުރު ތިން ލަނޑު ޖަހައިގެން ބެލްޖިއަމް ވަނީ މެޗުން މޮޅުވެފައި އެވެ. 

މެޗު ފަށައިގެން ނުވަ ވަނަ މިނެޓުގައި ބެލްޖިއަމް އަށް ލީޑު ނަގައިދިނީ ޗާލްސް ޑި ކަޓަލާރޭ އެވެ. ނަމަވެސް، މަލިކް ޓިލްމަން ވަނީ 31 ވަނަ މިނެޓުގައި ލަނޑު ޖަހައި އެމެރިކާ އަށް ނަތީޖާ ހަމަހަމަ ކޮށްދީފައި އެވެ. އޭގެ ދެ މިނެޓު ފަހުން ކަޓަލާރޭ ވަނީ ދެ ވަނަ ފަހަރަށް ބެލްޖިއަމް އަށް ލީޑު ނަގައިދީފައި އެވެ. 

މެޗުގެ ދެ ވަނަ ހާފު ފަށައިގެން 12 ވަނަ މިނެޓުގައި ބެލްޖިއަމްގެ ތިން ވަނަ ލަނޑު ޖަހައި ލީޑު ފުޅާ ކޮށްދިނީ ހަންސް ވަނަކެން އެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ބެލްޖިއަމްގެ ހަތަރު ވަނަ ލަނޑު ޖެހީ ރޮމެލޫ ލުކާކޫ އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގައި އެވެ. 

މެޗުން މޮޅުވެ ބެލްޖިއަމް އިން މުބާރާތުގެ ކުއާޓާ ފައިނަލްގެ ޖާގަ ހޯދިއިރު، ކުއާޓާ ފައިނަލްގައި އެ ޓީމު ނިކުންނާނީ ސްޕެއިންއާ ދެކޮޅަށެވެ.