ބަލޮގަންގެ ސަސްޕެންޝަން ލުއި ކުރީ އެމެރިކާގެ ނުފޫޒުން، ޓްރަމްޕްގެ ޝުކުރު ފީފާ އަށް
ނިންމުމާ ގުޅިގެން ޓްރަމްޕް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، އެއީ އެންމެ ރަނގޅު ގޮތް ކަމަށެވެ. ބަލޮގަން އަށް ރަތް ކާޑު ދެއްކީ އިންސާފުން ނޫން ކަމަށާއި، އެ ނިންމުން ބަދަލު ކުރި ކަމަށްޓަކައި ފީފާ އަށް ޝުކުރު އަދާ ކުރައްވާ ކަމަށް.
އެމެރިކާގެ ރައީސް ޓްރަމްޕް އާއި ފީފާގެ ރައީސް އިންފަންޓީނޯ. | ގެޓީ އިމޭޖަސް
އެމެރިކާ ޓީމުގެ ފަލޮރިން ބަލޮގަން އަށް ދެއްކި ރަތް ކާޑުގެ ސަބަބުން ކުރިމަތިވި ސަސްޕެންޝަން އުވާލުމަށް ފީފާ އިން ނިންމުމުން، އެމެރިކާގެ ރައީސް ޑޮނަލްޑް ޓްރަމްޕް ފީފާ އަށް ޝުކުރު އަދާ ކުރައްވައިފި އެވެ.
އެމެރިކާ އިން ބޮސްނިއާއާ ދެކޮޅަށް ކުޅުނު މެޗުގައި ބަލޮގަން އަށް ރަތް ކާޑު ދެއްކުމުގެ ސަބަބުން، ގަދަ 16 ގައި ބެލްޖިއަމްއާ ދެކޮޅަށް ކުޅޭ މެޗުގައި އޭނާ އަށް ނުކުޅެވެ އެވެ. ނަމަވެސް، އާދީއްތަ ދުވަހު ފީފާ އިން ވަނީ ބަލޮގަންގެ ސަސްޕެންޝަން އަށް ލުއި ދިނުމަށް ނިންމައިފަ އެވެ. އެއާ އެކު، ހޯމަ ދުވަހުގެ ރޭ ބެލްޖިއަމްއާ ދެކޮޅަށް ކުޅޭ މެޗުގައި ބަލޮގަން އަަށް ކުޅެވޭނެ އެވެ.
ފީފާ އިން ވަނީ ބަލޮގަންގެ ސަސްޕެންޝަން އެއް އަހަރު މުއްދަތަށް ފަސްކޮށްފައިވާ ކަމަށް ހާމަ ކޮށްފައި އެވެ. އަދި ދެ ވަނަ ފަހަރަށް އެފަދަ އަމަލެއް ހިންގައިފި ނަމަ، އެ އަދަބު ތަންފީޒު ކުރުމަށް ވެސް ފީފާ އިން ވަނީ ނިންމައިފަ އެވެ.
މި ނިންމުމާ ގުޅިގެން ޓްރަމްޕް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، އެއީ އެންމެ ރަނގޅު ގޮތް ކަމަށެވެ. ބަލޮގަން އަށް ރަތް ކާޑު ދެއްކީ އިންސާފުން ނޫން ކަމަށާއި، އެ ނިންމުން ބަދަލު ކުރި ކަމަށްޓަކައި ފީފާ އަށް ޝުކުރު އަދާ ކުރައްވާ ކަމަށެވެ.
ބަލޮގަންގެ ސަސްޕެންޝަން ލުއި ކުރުމަށް ފީފާ އިން ނިންމާފައިވާއިރު، އެއީ އެމެރިކާގެ ނުފޫޒުން ނިންމާފައިވާ ނިންމުމެއް ކަަމަށް މީޑިއާ ރިޕޯޓުތައް ބުނެ އެވެ. އެގޮތުން އެމެރިކާގެ ރިޔާސީ ގަނޑުވަރު، ވައިޓް ހައުސް އިން ފީފާގައި އެކަމަށް ވަރަށް ބޮޑަށް އެދެމުން ދިޔަ ކަމަށާއި، އެމެރިކާގެ ބައެއް އިސްވެރިން އެކަމަށް ނުފޫޒު ފޯރުވާާފައިވާ ކަމަށް ވެސް ބުނެފައިވެ އެވެ.
ބަލޮގަން އަށް ރަތް ކާޑު ދެއްކި މެޗަށް ފަހު، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ، އެ ކާޑު ބާތިލު ކުރުމަަށް ވެސް ގޮވާާލައްވައިފަ އެވެ. މީގެ އިތުރުން ޓްރަމްޕް އާއި ފީފާގެ ރައީސް ޖިއާނީ އިންފަންޓީނޯއާ ދެމެދު ގާތް ގުޅުމެއް އޮންނައިރު، މިކަމަށް ޓްރަމްޕް ވެސް ނުފޫޒު ފޯރުވާފައިވާ ކަމަށް ބުނެ ބައެއް ފަރާތް ތަކުން އަންނަނީ ފީފާ އަށް ވެސް ފާޑު ކިޔަމުންނެވެ.
