ފީފާގެ އާއްމު އުސޫލާ ޚިލާފަށް ޓްރަމްޕްގެ އެދިވަޑައިގަތުމާ އެއްގޮތައް ފީފާއިން ބަލޯގަންގެ ސަސްޕެންޝަން އުވާލައިފި

އެމެރިކާގެ ގައުމީ ފުޓްބޯޅަ ޓީމުގެ ފޯވާޑް ފޮލާރިން ބަލޯގަންއަށް ދީފައިވާ ސަސްޕެންޝަން މުރާޖައާކޮށްދިނުމަށް އެދިވަޑައިގެން، އެމެރިކާގެ ރައީސް ޑޮނަލްޑް ޓްރަމްޕް ފީފާގެ ރައީސް ޖިއާނީ އިންފަންޓީނޯއަށް ފޯނުން ގުޅުއްވައި މަޝްވަރާކުރައްވާފައިވާ ކަމަށް ނިއުޔޯކް ޓައިމްސްއިން ރިޕޯޓްކޮށްފިއެވެ. ރައީސް ޓްރަމްޕްގެ މި އެދިވަޑައިގަތުމާ ގުޅިގެން، ދުނިޔޭގެ ފުޓްބޯޅައިގެ މައި އިދާރާ، ފީފާއިން ވަނީ އާދީއްތަ ދުވަހު އެ ސަސްޕެންޝަން އުވާލާފަ އެވެ.

ބަލޯގަންއަށް ރަތް ކާޑު ދައްކައި ދަނޑުން ފޮނުވާލީ، ވޯލްޑް ކަޕްގެ ގަދަ 32 ޓީމު ވާދަކުރި ބުރުގައި ބޮސްނިއާ އަތުން 2-0 އިން އެމެރިކާ މޮޅުވި މެޗުގައެވެ. މިދިޔަ ބުދަ ދުވަހު ކުޅުނު އެ މެޗުގައި އޭނާއަށް ރަތް ކާޑު ދެއްކީ ބޮސްނިއާގެ ޑިފެންޑަރު ތާރިކް މުހަރެމޮވިޗްގެ ފަޔަށް ގަސްތަކާ ނުލައި އެރުނު ހާދިސާއަކާ ގުޅިގެންނެވެ.

ފީފާގެ ގަވާއިދުތައް ބުނާގޮތުން، ސީދާ ރަތް ކާޑެއް ދައްކައިފިނަމަ އެއް މެޗުގެ ސަސްޕެންޝަނެއް އޮޓޮމެޓިކުން އަންނާނެއެވެ. އަދި މި ނިންމުން އިސްތިއުނާފު ކުރުމުގެ ފުރުސަތު ކުޅުންތެރިޔާގެ ޓީމަށް ލިބިގެން ނުވެއެވެ. އެހެންކަމުން، މި ސަސްޕެންޝަނާއެކު ހޯމަ ދުވަހު ބެލްޖިއަމާ ދެކޮޅަށް ކުޅޭ ގަދަ 16 ގެ މުހިންމު މެޗުގައި ބަލޯގަންއަށް ނުކުޅެވޭނެ ކަމަށް ކުރިން އޮތީ ބެލެވިފައެވެ.

ނަމަވެސް، މި މައްސަލައިގެ މައުލޫމާތު އެނގޭ ތިން ފަރާތަކާ ހަވާލާދީ ނިއުޔޯކް ޓައިމްސްއިން ރިޕޯޓްކޮށްފައިވާ ގޮތުގައި، މިދިޔަ ބުދަ ދުވަހު ރައީސް ޓްރަމްޕް ވަނީ އިންފަންޓީނޯއަށް ގުޅުއްވައި އެ ނިންމުން އަލުން މުރާޖައާކޮށްދެއްވުމަށް އެދިވަޑައިގެންފައެވެ.

މިކަމާ ގުޅިގެން އާދީއްތަ ދުވަހު ފީފާއިން ވަނީ އާންމު އުސޫލާ ހިލާފަށް، ބަލޯގަންގެ ސަސްޕެންޝަން އެއް އަހަރު ދުވަހަށް ފަސްކުރުމަށް ނިންމާފަ އެވެ. މި ނިންމުމާ އެކު ރައީސް ޓްރަމްޕް ވަނީ ސޯޝަލް މީޑިއާގައި ކުރެއްވި ޕޯސްޓެއްގައި، "ބޮޑު ބޭއިންސާފެއް ބަދަލުކޮށްދިނީތީ" ފީފާއަށް ވަގުތުން ޝުކުރު އަދާކުރައްވާފަ އެވެ.

ފީފާގެ މި ނިންމުމާ ގުޅިގެން ބެލްޖިއަމްގެ ފުޓްބޯޅަ އެސޯސިއޭޝަނުން އާދީއްތަ ދުވަހު ބުނެފައިވަނީ، އެ އިދާރާގެ ނިންމުމާމެދު އިންތިހާއަށް ހައިރާންވާ ކަމަށެވެ.