ބަލޯގަންގެ ސަސްޕެންޝަން އުވާލުމަކީ ފީފާގެ ރައީސް ގެ މަގާމަށް ނުރައްކާވެދާނެ ފަދަ ބޮޑު މައްސަލައަކަށް ވެދާނެ ހެއްޔެވެ؟

ޖިއާނީ އިންފަންޓީނޯ ފީފާގެ ރައީސްކަމުގެ މަގާމުގައި ހުންނަވާތާ މިހާރު 10 އަހަރު ވެއްޖެ އެވެ.

އަންނަ އަހަރު އޮންނަ ފީފާގެ އިންތިޚާބުގައި އޭނާ އަލުން އެ މަގާމަށް ކުރިމަތިލައްވާނެ އެވެ.

ފީފާ ޕީސް ޕްރައިޒް ނުވަތަ ސުލްހައިގެ އިނާމާއި، ވޯލްޑް ކަޕް މެޗުތަކުގެ ޓިކެޓް އަގު އިންތިހާއަށް ބޮޑުވުމާއި، އަދި ކްލަބް ވޯލްޑް ކަޕާ ގުޅިގެން އުފެދުނު ހިޔާލުތަފާތުވުންތަކާއެކު، އިންފަންޓީނޯގެ ރިޔާސަތަކީ ފާޑުކިޔުންތައް އަމާޒުވެފައިވާ ދައުރެކެވެ.

ނަމަވެސް، ވޯލްޑް ކަޕްގެ ގަދަ 16 ގައި ބެލްޖިއަމާ ދެކޮޅަށް އެމެރިކާ ކުޅޭ މެޗުގެ ކުރިން، އެމެރިކާގެ ފޯވާޑް ފޮލަރިން ބަލޯގަންއަށް ދެއްކި ރަތް ކާޑުގެ ސަސްޕެންޝަން އުވާލުމަށް ނިންމި ނިންމުމަކީ އޭނާގެ މަގާމަށް ނުރައްކާވެދާނެ ފަދަ ބޮޑު މައްސަލައަކަށް ވެދާނެ ހެއްޔެވެ؟

އެމެރިކާއިން ކޯ-ހޯސްޓް ނުވަތަ ބާއްވާ ގައުމެއްގެ ގޮތުގައި ބައިވެރިވާ މި މުބާރާތުގައި، ބަލޯގަން ވަނީ މިހާތަނަށް ތިން ލަނޑު ޖަހައި އެމެރިކާ ޓީމުގެ އެންމެ މުހިންމު ކުޅުންތެރިޔާގެ ގޮތުގައި ފާހަގަވެފަ އެވެ.

ބަލޯގަންއަށް ރަތް ކާޑު ދައްކައި ދަނޑުން ފޮނުވާލި ނަމަވެސް، ބެލްޖިއަމް މެޗުގައި އޭނާއަށް ކުޅެވޭނެ ކަމަށް ފީފާއިން ވަނީ ނިންމާފަ އެވެ. މިއީ ވޯލްޑް ކަޕްގެ ގަވާއިދުތަކުގެ ދަށުން ރަތް ކާޑަށް އިސްތިއުނާފު ނުކުރެވޭނެ ކަމަށް އޮންނަ އުސޫލާ މުޅިން ޚިލާފު ނިންމުމެކެވެ.

މި ނިންމުން ނިންމިތާ 24 ގަޑިއިރު ފަހުން، ހޯމަ ދުވަހު ފީފާއިން ވަނީ 871 ލަފުޒުގެ ބަޔާނެއް ނެރެފަ އެވެ. ނަމަވެސް އެ ބަޔާނުގައި އެފަދަ ނިންމުމެއް ނިންމި ސަބަބާ މެދު މާ ބޮޑު ތަފްސީލެއް ދީފައެއް ނުވެ އެވެ.

އެހެންނަމަވެސް، އެހެން ފަރާތަކުން ވަނީ އެކަމުގެ ހަގީގަތް ހާމަކޮށްފަ އެވެ.

އިންފަންޓީނޯއަށް ފޯނުން ގުޅުއްވައި އެކަމަށް ބާރު އެޅުއްވިންތޯ ސުވާލު ކުރުމުން، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، "އެކަން އެގޮތަށް ކުރުވީ އަހަރެން" ކަމަށެވެ.

ޓްރަމްޕް ވިދާޅުވި ގޮތުގައި އޭނާ ކުރެއްވިހާވެސް ކަމަކީ އެ ނިންމުން މުރާޖައާ ކޮށްދިނުމަށް އެދުމެވެ. ބަލޯގަންގެ ސަސްޕެންޝަން އުވާލުމަށް އިންފަންޓީނޯ ގާތު ސީދާ ވިދާޅުނުވާ ކަމަށްވެސް ޓްރަމްޕް ވިދާޅުވި އެވެ.

ނަމަވެސް، ފުޓްބޯޅައިގެ ތެރެއަށް މިފަދަ ސިޔާސީ ނުފޫޒެއް ވަނުމަކީ މުޅި ފުޓްބޯޅަ އާއިލާގެ ބޮޑު ކަންބޮޑުވުމެކެވެ.

އެމެރިކާގައި މިކަން ސިފަކުރަމުންދަނީ އިންސާފުވެރި ނިންމުމެއްގެ ގޮތުގަ އެވެ. އެމީހުން ބުނާ ގޮތުގައި ބަލޯގަންއަށް އިތުރު މެޗެއް ގެއްލިގެން ނުވާނެ އެވެ. ބޮސްނިއާ އެންޑް ހެރްޒެގޮވީނާ މެޗުގައި ރަތް ކާޑު ދައްކައި ދަނޑުން ފޮނުވާލުމުން، އެ މެޗުގެ ބާކީ ބައި ގެއްލުމަކީ އޭނާއަށް ދެވުނު ފުދޭވަރުގެ އަދަބެއް ކަމަށް އެމެރިކާގެ ސަޕޯޓަރުން ދެކެއެވެ.

ރައީސް ޓްރަމްޕްވެސް ވަނީ މި ވާހަކަތަކަށް ތާއީދުކުރައްވާފަ އެވެ.

އިންފަންޓީނޯ ވަނީ މިކަމުގައި އެއްވެސް ސިޔާސީ ނުފޫޒެއް އޮތް ކަމަށް ބުނާ ވާހަކަތައް ދޮގުކުރައްވާފަ އެވެ. އަދި ފީފާގެ ޑިސިޕްލިނަރީ ކޮމިޓީއަކީ މިނިވަން މުއައްސަސާއެއް ކަމަށް އޭނާ ވިދާޅުވި އެވެ.

ނަމަވެސް، ކަން ހިނގާފައިވާ ގޮތުން އާންމުންނަށް ފެންނަ ފެނުމަކީވެސް މުހިންމު ކަމެކެވެ.

މި ނިންމުމުގެ ފައިދާ މި ލިބުނީ ހަމައެކަނި ކޮންމެ ކޮންމެ ޓީމަކަށް ނޫނެވެ. އެއީ މުބާރާތް ބާއްވާ ގައުމަށެވެ. އަދި އެ ގައުމުގެ ވެރިއަކަށް ހުންނެވީ އިންފަންޓީނޯއާ ގާތް ގުޅުމެއް ބާއްވާ، އޭނާގެ ރަހުމަތްތެރިއެއް ކަމަށް ބުނާ ޑޮނަލްޑް ޓްރަމްޕެވެ.

ބަލޯގަންގެ ސަސްޕެންޝަން އުވާލުން ސިފަވެގެން ދިޔައީ ރައީސަކު ދެއްވި މާފެއްގެ ގޮތުގައެވެ.

ލިވަޕޫލްގެ ކުރީގެ ކޯޗު ޔާގެން ކްލޮޕް ބުނި ގޮތުގައި ޑޮނަލްޑް ޓްރަމްޕާއި ޖިއާނީ އިންފަންޓީނޯ ގުޅިގެން މިކަން ނިންމި ނަމަ، އެއީ މޮޔަ ކަމެއް ކަމަށާއި، އޭގެ ސަބަބުން ހުރިހާ ކަމަކަށް ސުވާލު އުފެދޭ ކަމަށެވެ.

ފުޓްބޯޅައިގެ ތެރެއަށް ސިޔާސީ ނުފޫޒު ފޯރުވުމަކީ ފީފާއިން މަނާކުރާ ކަމެއް

ފީފާގެ އަސާސީ ގަވާއިދުތަކުގައި އެކަން ވަރަށް ސާފުކޮށް ބަޔާންކޮށްފައިވެ އެވެ.

ގައުމީ ފުޓްބޯޅަ އެސޯސިއޭޝަންތަކުގެ ތެރެއަށް ސަރުކާރުތަކުން އަތްބޭނުމުގެ ސަބަބުން، ގައުމުތައް ބައިނަލްއަގުވާމީ ފުޓްބޯޅައިން ސަސްޕެންޑް ކުރުމަކީ އާންމުކޮށް ހިނގާ ކަމެކެވެ.

މިސާލަކަށް، ވޭތުވެދިޔަ އަށް އަހަރުގެ ތެރޭގައި ޕާކިސްތާން ތިން ފަހަރަށް ސަސްޕެންޑް ކުރެވުނެވެ.

ނަމަވެސް، އިންފަންޓީނޯ އާއި ޓްރަމްޕާ ހަމައަށް އައުމުން މި ގަވާއިދުތައް ތަފާތުވަނީ ހެއްޔެވެ؟

ވޯލްޑް ކަޕްގެ ގުރުއަތުލުމުގެ ރަސްމިއްޔާތުގައި ޓްރަމްޕަށް ފީފާގެ ފުރަތަމަ "ޕީސް ޕްރައިޒް" އެރުވުމަކީ، ވޭތުވެދިޔަ ދެ އަހަރު ދުވަހު އިންފަންޓީނޯ އެމެރިކާގެ ރައީސާއެކު ބޭއްވި ގާތް ގުޅުމުގެ ނަތީޖާ ކަމަށް ބެލެވެ އެވެ.

އެ އެވޯޑް ހަވާލުކުރައްވަމުން އިންފަންޓީނޯ ވިދާޅުވީ، ދުނިޔޭގައި ސުލްހަ ގާއިމުކުރުމަށާއި ތަރައްގީއަށްޓަކައި އޭނާގެ ފަރާތުންނާއި މުޅި ފުޓްބޯޅަ އާއިލާގެ ފަރާތުން ރައީސް ޓްރަމްޕަށް އަބަދުވެސް އެއްބާރުލުން ލިބޭނެ ކަމަށެވެ.

އިންސާނީ ހައްގުތަކަށް މަސައްކަތްކުރާ ޖަމާއަތެއް ކަމަށްވާ "ފެއަރ ސްކުޔަރ" އިން މިދިޔަ ޑިސެމްބަރު މަހު ފީފާގެ އެތިކްސް ކޮމިޓީއަށް ޝަކުވާ ހުށަހެޅީ، މިފަދަ އެވޯޑެއް އުފެއްދުމުގައި އިންފަންޓީނޯ ސިޔާސީ ގޮތުން ވަކި ފަރާތަކަށް ނުޖެހުމުގެ ގަވާއިދާ ޚިލާފުވެފައިވާ ކަމަށް ބުނެ އެވެ.

އެކަމަށް އެއްވެސް ޖަވާބެއް ނުލިބުމުން، މިދިޔަ މަހު ޔޫރަޕްގެ ޕާލަމެންޓްގެ 50 މެންބަރަކު ވަނީ އެތިކްސް ކޮމިޓީއަށް ސިޓީއެއް ފޮނުވައި، މިކަމުގައި ފިޔަވަޅު އެޅުމަށް ގޮވާލާފަ އެވެ. ނަމަވެސް ފީފާގެ އެހެން ކަންކަމެކޭ އެއްފަދައިން، މިކަމަށްވެސް އެއްވެސް ޖަވާބެއް ލިބިފައެއް ނުވެ އެވެ.

މުބާރާތް ފެށިގެން ކުރިއަށްދާއިރު، ޓްރަމްޕް އަދި މިހާތަނަށް ވޯލްޑް ކަޕްގެ އެއްވެސް މެޗެއް ބައްލަވާލައްވަން ވަޑައެއް ނުގަންނަވަ އެވެ.

އެހެންނަމަވެސް، ބަލޯގަންގެ މައްސަލައިގައި އޭނާ ވަނީ އިސް ދައުރެއް އަދާކުރައްވާފަ އެވެ.

މިއީ ފުޓްބޯޅައިގެ ކަންކަން ދަނޑުމަތީގައި ނިންމުމުގެ ބަދަލުގައި، ބޭރުގެ ނުފޫޒުން ނިންމާކަމުގެ އިތުރު މިސާލެކެވެ.

ސޯމާލިއާގެ ރެފްރީ އުމަރު އަރުތާންއަށް ދިމާވި ކަންތައްތަކުންވެސް މިކަން ފެނިގެންދިޔަ އެވެ.

އެމެރިކާގެ އިމިގްރޭޝަން އޮފިޝަލުން އަރުތާން އެމެރިކާއަށް އެތެރެވުން މަނާކުރުމާ ގުޅިގެން، އިންފަންޓީނޯއަށް އޭނާގެ އަމިއްލަ ވޯލްޑް ކަޕްގެ ކަންކަން ކޮންޓްރޯލް ނުކުރެވޭ ކަމުގެ ތުހުމަތު ކުރެވުނެވެ.

ނަމަވެސް، ވޭތުވެދިޔަ ތިން އަހަރުގެ ތެރޭގައި ފުރަތަމަ ފަހަރަށް މިދިޔަ މަހު މީޑިއާއާ ބައްދަލުކުރައްވައި ވާހަކަދައްކަވަމުން، އަރުތާންގެ މައްސަލައިގައި އޭނާ ދެއްވީ ވަރަށް ފަރުވާކުޑަ ޖަވާބެކެވެ.

އަރުތާންގެ ހާލަތާ ގުޅޭގޮތުން އިންފަންޓީނޯ ވިދާޅުވީ "ހަމަޖެހިލައިގެން ތިބޭށެވެ."

މިފަދަ މައްސަލަތަކާއި ހިޔާލުތަފާތުވުންތައް އަބަދުވެސް އޮންނަނީ ފެންމަތިވާން ތައްޔާރަށެވެ.

އަދި މި ހުރިހާ ކަމެއްގެ ތެރޭގައި، ސާފު ޖަވާބެއް ނުވަތަ ދެފުށް ފެންނަ އުސޫލެއް ފެންނަނީ ވަރަށް މަދުންނެވެ.

މިދިޔަ ހުކުރު ދުވަހު ފަސް ގަޑިއިރު ވަންދެން ހިނގި ކަންތައްތަކަށް ބަލާލަމާ ހިނގާށެވެ. ފީފާއިން ފުރަތަމަ ނިންމީ އިންގްލެންޑާއި މެކްސިކޯ ބައްދަލުކުރާ މެޗު ފަށާ ވަގުތު ބަދަލުކުރުމަށެވެ. ނަމަވެސް ފަހުން އެ ނިންމުން އަނބުރާ ގެންގޮސް، އެފަދަ ކަމެއް ނުހިނގާ ކަމަށް ހެދި އެވެ.

ބަލޯގަންގެ މައްސަލައަކީވެސް ހަމަ މިފަދަ އުސޫލަކުން ހިނގާފައިވާ ކަމެކެވެ.

އެއްވެސް ސަބަބެއް ބަޔާންކުރުމެއް ނެތި ނިންމުމެއް ނިންމަނީ އެވެ. އަދި ފުޓްބޯޅަ އާއިލާއަށް އަންގަނީ އެކަން އެގޮތަށް ހިނގައިފި ކަމަށާއި، އެކަން ގަބޫލުކުރަން ޖެހޭނެ ކަމަށެވެ.

ވޯލްޑް ކަޕްގެ ތެރޭގައި ހިޔާލުތަފާތުވުންތައް

ފަހަކަށް އައިސް ފުޓްބޯޅައިގައި ހިނގާފައިވާ ހުރިހާ މައްސަލަތަކެއް ލިސްޓުކުރާނަމަ، އެއީ ވަރަށް ގިނަ ވަގުތު ނަގާނެ ކަމެކެވެ.

ނަމަވެސް، މީގެ ދެ އަހަރު ކުރިން 2030 އަދި 2034 ގެ ވޯލްޑް ކަޕް ބާއްވާނެ ގައުމުތައް ކަނޑައެޅި އާދަޔާ ހިލާފު ގޮތަށް ބަލާލަމާ ހިނގާށެވެ.

ނިންމާފައިވަނީ 2030 ވަނަ އަހަރުގެ މުބާރާތް ތިން ބައްރެއްގައި (އެފްރިކާ، ޔޫރަޕް އަދި ދެކުނު އެމެރިކާ) ބޭއްވުމަށެވެ. މީގެ މާނައަކީ 2034 ވަނަ އަހަރުގެ މުބާރާތް ބޭއްވޭނީ އޭޝިއާ ނުވަތަ އޯޝޭނިއާގެ ގައުމަކަށެވެ.

މީގެ ސަބަބުން، އެހެން އެއްވެސް ގައުމަކާ ވާދަކުރުމެއް ނެތި، ސައުދީ އަރަބިއްޔާއަށް އެ ފުރުސަތު ލިބޭނެކަން ކަށަވަރުވި އެވެ. 

އިންފަންޓީނޯގެ ރިޔާސަތުގައި ސައުދީ އަރަބިއްޔާ އާއި ފީފާއާ ދެމެދު ވަނީ ވަރަށް ގާތް ގުޅުމެއް އުފެދިފަ އެވެ.

ނޯވޭގެ ފުޓްބޯޅަ ފެޑެރޭޝަނުން މިކަމުގައި ވޯޓު ނުދީ ބުނެފައިވަނީ، ބިޑް ކުރުމުގެ މި އުސޫލުގެ ސަބަބުން ފީފާގެ އިސްލާހީ މަސައްކަތްތަކަށް ހުރަސް އެޅި، ފީފާއަށް އޮތް އިތުބާރު ގެއްލޭ ކަމަށެވެ.

މީގެ އިތުރުން، ކްލަބް ވޯލްޑް ކަޕަށް ބަލާލާއިރު، މިއީ ކްލަބް ފުޓްބޯޅައިގެ ތެރެއިން މާލީ ފައިދާ ހޯދުމަށް ފީފާއިން އުފައްދާފައިވާ، ގިނަ ބަޔަކު ބޭނުންނުވާ މުބާރާތެކެވެ.

ކުޅުންތެރިންގެ ބައިނަލްއަގުވާމީ ޔޫނިއަން (ފިފްޕްރޯ) ގެ ރައީސް ސާޖިއޯ މާޗީ މިދިޔަ އަހަރު ވިދާޅުވީ، މި މުބާރާތް އުފެއްދީ އެއްވެސް މަޝްވަރާއެއް ނުވަތަ އިހުތިރާމެއް ނެތި ކަމަށެވެ.

ދެން އޮތީ ބަލޯގަންގެ މައްސަލައެވެ. މިކަމުގެ ސަބަބުން، ހީނުކުރާ ފަރާތަކަށް ފާޑުކިޔުމުގެ ފުރުސަތު ލިބުނެވެ.

ފީފާގެ ކުރީގެ ރައީސް ސެޕް ބްލެޓާ އެކްސްގައި ލިޔުއްވާފައިވަނީ، "ފުޓްބޯޅައަކީ ސިޔާސީ ބާރުވެރިކަން ދައްކާ ކުޅިވަރު ބިމަކަށް ވެގެން ނުވާނެ" ކަމަށެވެ.

ހަނދާންކޮށްލަންޖެހޭ ކަމަކީ، ކޮރަޕްޝަންގެ ބޮޑު މައްސަލައަކާ ގުޅިގެން ބްލެޓާ މަގާމުން ވަކިވާން ޖެހުނު ކަމެވެ. އޭނާގެ ބަދަލުގައި 2016 ވަނަ އަހަރު ފީފާގެ ރައީސްކަމަށް ވަޑައިގަތީ އިންފަންޓީނޯ އެވެ.