މެލޭޝިއާގެ ހޮޓަލެއްގައި ގައުމުތަކެއްގެ ދިދަތައް ހުރި އިރު އެތަނުގައި ޗައިނާގެ ދިދަ ނެތުމުން ޗައިނާގެ ފަތުރުވެރިއަކު ޝަކުވާކުރާ ވީޑިއޯއެއް ވައިރަލް ވެއްޖެ

މެލޭޝިއާގެ ހޮޓަލެއްގައި ގައުމުތަކެއްގެ ދިދަ ދަމާފައި ހުރި އިރު، އެތަނުގައި ޗައިނާގެ ގައުމީ ދިދަ ނެތުމުން، އެ ހޮޓަލުގެ މުވައްޒަފުންނާ އެ ގައުމުގެ ފަތުރުވެރިއަކު ކުރިމަތިލާ މަންޒަރު ފެންނަ ވީޑިއޯއެއް މީސްމީޑިއާގައި ވަރަށް ބޮޑަށް ވައިރަލްވެއްޖެ އެވެ.

މީސްމީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، ވިޔަފާރި ދަތުރެއްގައި ކުއާލަލަމްޕޫރަށް ގޮސް އުޅޭ މި މީހާ ވަނީ، ހޮޓަލުގެ ހެނދުނުގެ ނާސްތާ އޮންނަ ސަރަހައްދުގައި އެތައް ގައުމެއްގެ ދިދަ ހުރިއިރު ޗައިނާގެ ދިދަ ނެތީ ކީއްވެގެންތޯ އެތަނުގެ މުވައްޒަފަކާ ސުވާލުކޮށްފަ އެވެ.

ޗައިނާގެ ދިދަ ނެތް ސަބަބާ ބެހޭގޮތުން ސުވާލުކުރަމުން އޭނާ ބުނެފައިވަނީ، "ޗައިނާ މީހުންގެ އަތުން ލާރި ހޯދަން ބޭނުންނަމަ، ޗައިނާގެ ގައުމީ ދިދަވެސް ނަގަންވާނެ" ކަމަށެވެ. އޭނާ މިގޮތަށް ޝަކުވާކޮށް ސަބަބު އޮޅުންފިލުވަން މަސައްކަތް ކުރަމުންދިޔައިރު، އެ ހޮޓަލުގެ މުވައްޒަފު ހުރީ ބުނާނެ އެއްޗެއް ނޭނގި ހައިރާންވެފަ އެވެ.

މިކަމާ ގުޅިގެން މީސްމީޑިއާގައި ހިޔާލުފާޅުކުރި ބައެއް މީހުން ފާހަގަކުރި ގޮތުގައި، އެ ދިދަތަކަކީ ދުނިޔޭގެ ފުޓްބޯޅަ މުބާރާތަށް (ވޯލްޑް ކަޕް) ހާއްސަކޮށްގެން ހޮޓަލުން ކޮށްފައިވާ ޒީނަތްތެރިކަމެކެވެ. އަދި އެތަނުގައި ހުރީ އުތުރު އެމެރިކާގައި ބޭއްވުމަށް ހަމަޖެހިފައިވާ މިއަހަރުގެ މުބާރާތަށް ކޮލިފައިވި 48 ގައުމުގެ ދިދަކަމަށާއި، ޗައިނާ މި މުބާރާތަށް ކޮލިފައިވެފައި ނުވާކަން އެމީހުން ފާހަގަކުރި އެވެ.

މި ވީޑިއޯތަކަށް އާންމުންގެ ބޮޑު ސަމާލުކަމެއް ލިބިފައިވާއިރު، ގިނަ ބަޔަކު ދަނީ ތަފާތު ހިޔާލުތައް ފާޅުކުރަމުންނެވެ. އެގޮތުން މީސްމީޑިއާ ބޭނުންކުރާ އެކަކު ބުނެފައިވަނީ، "މިއީ ވޯލްޑް ކަޕަށް ހާއްސަ ޒީނަތްތެރިކަމެއް ކަމަށާއި، މިއީ ހުރިހާ ގައުމެއްގެ ދިދަ ދައްކާލުމަށް ބަހައްޓާފައި ހުރި އެއްޗެއް ނޫން" ކަމަށެވެ.

ބައެއް މީހުން ވަނީ އެ ފަތުރުވެރިޔާ ކަންތައް ކުރި ގޮތަށް ވަރަށް ބޮޑަށް ފާޑުކިޔާފަ އެވެ.

"ކޮންމެ ގައުމަކުންވެސް ޗައިނާއަށް ހާއްސަ އިނާޔަތްތަކެއް ދޭންޖެހޭނެ ކަމަށް ދެކިގެން މިފަދަ ގޮތްގޮތަށް އަމަލުކުރުމަކީ، ބޭރު ގައުމުތަކުގައި ޗައިނާގެ ފަތުރުވެރިންނަށް ނުރުހުން އަމާޒުވާ މައިގަނޑު ސަބަބު،" މީސްމީޑިއާ ބޭނުންކުރާ މީހަކު ލިޔެފައިވެ އެވެ. އަދި މެލޭޝިއާވެސް މުބާރާތަށް ކޮލިފައި ނުވާތީ، އެ ގައުމުގެ ދިދަވެސް އެތަނުގައި ނެތްކަން ބައެއް މީހުން ފާހަގަކުރި އެވެ.

އަނެއްބައި މީހުން ބުނި ގޮތުގައި އެ ފަތުރުވެރިޔާގެ ވާހަކަތަކުން ފެންނަނީ ގޯސް ނިޔަތެއް އޮތުމަށްވުރެ ބޮޑަށް، އޭނާގެ ހިތުގައި ގައުމަށް އޮތް ލޯތްބެވެ. "އޭނާ އެހެން ބުނީ ގައުމީ ރޫހެއްގައި ކަމަށް ވެދާނެ، އެކަމަކު އޭނާ ޖެހޭނީ ރީތި ގޮތުގައި ސުވާލުކުރަން،" އެކަކު ބުންޏެވެ. މީގެ އިތުރުން، 2002 ވަނަ އަހަރުގެ ފަހުން ޗައިނާގެ ފިރިހެން ފުޓްބޯޅަ ޓީމަށް ވޯލްޑް ކަޕުން ޖާގައެއް ލިބިފައި ނުވާތީ، ބައެއް މީހުން ވަނީ އެކަމަށް މަލާމާތްކޮށް ޖޯކު ޖަހާފަ އެވެ.

"1.4 ބިލިއަން މީހުންގެ އާބާދީއެއް އޮތް، ދުނިޔޭގެ ދެވަނައަށް އެންމެ އާބާދީ ބޮޑު ގައުމަށް ވޯލްޑް ކަޕަށް ކޮލިފައިވާވަރުގެ ފުޓްބޯޅަ ޓީމެއްވެސް އުފެއްދޭކަށް ނެތް. ދިދަ ނެތީ އެހެންވެ. އަހަރެމެން ކުށްވެރި ނުކޮށް، ތިމާގެ އަމިއްލަ ގައުމު ކުށްވެރިކުރޭ،" އެހެން މީހަކު ބުނެފައިވެ އެވެ.

ފީފާ ރޭންކިންގެ 91 ވަނައިގައި އޮތް ޗައިނާގެ ފިރިހެން ފުޓްބޯޅަ ޓީމަށް ބައިނަލްއަގުވާމީ މައިދާނުގައި ކުރިމަތިވަމުންދާ ނާކާމިޔާބީއަކީ އެ ގައުމުގައި އަބަދުވެސް ބޮޑު ބަހުސެއް ހިނގާ މައުޟޫއެކެވެ. ފުޓްބޯޅައަށް ވަރަށް ބޮޑަށް ލޯބިކުރައްވާ އެ ގައުމުގެ ރައީސް ޝީ ޖިންޕިންވެސް ވަނީ، ޗައިނާ ވޯލްޑް ކަޕަށް ކޮލިފައިވުމަށް އެހީތެރިވުމަށް ރޮބޮޓް ބޭނުންކުރެވިދާނެތޯ އެއްފަހަރަކު ސަމާސާ މޭރުމަކުން ސުވާލު އުފައްދަވާފަ އެވެ.