އެމެރިކާގެ ބަލޯގަންގެ ސަސްޕެންޝަން އުވާލުމުން އެއީ ފީފާ އިން "ރަތް ރޮނގު ހުރަސްކުރުން" ކަމަށް ޔުއެފާ އިން ބުނެފި

މިފަހަރުގެ ވޯލްޑް ކަޕްގައި އެމެރިކާގެ ފޯވާޑް ފޮލަރިން ބަލޯގަންއަށް ދެއްކި ރަތް ކާޑާ ގުޅިގެން އަންނަ އޮޓޮމެޓިކް ސަސްޕެންޝަން ދަމަހައްޓަން ފީފާއިން ދެކޮޅު ހެދުމުން، ޔޫރަޕްގެ ފުޓްބޯޅަ އިދާރާ (ޔުއެފާ) އިން އެ ނިންމުމަށް ވަރަށް ބޮޑަށް ފާޑުކިޔައިފި އެވެ. ޔުއެފާއިން ބުނީ ފީފާގެ މި ކުއްލި ނިންމުމަކީ މީގެ ކުރިން ދުވަހަކުވެސް ކަން ހިނގާފައިވާ ގޮތެއް ނޫން ކަމަށާއި، މިއީ އެއްވެސް ހަމައެއް ނެތް، ބަލައިގަނެވޭނެ ނިންމުމެއް ނޫން ކަމަށެވެ.

ބޮސްނިއާ-ހެރްޒެގޮވީނާއާ ދެކޮޅަށް ކުޅުނު މެޗުގައި ރަތް ކާޑު ދެއްކި އެމެރިކާގެ ފޯވާޑް ބަލޯގަން، އަންގާރަ ދުވަހުގެ ރޭ ރާއްޖޭގަޑިން 01:00 ގައި ބެލްޖިއަމާ ދެކޮޅަށް ކުޅޭ ގަދަ 16 ގެ މެޗުގައި ސަސްޕެންޝަނެއް ފުރިހަމަކުރަން ޖެހެއެވެ.

ނަމަވެސް ދުނިޔޭގެ ފުޓްބޯޅައިގެ މައި އިދާރާ އަދި ވޯލްޑް ކަޕް އިންތިޒާމުކުރާ ފަރާތް ކަމަށްވާ ފީފާއިން ވަނީ އުމުރުން 25 އަހަރުގެ ބަލޯގަންއަށް ވަގުތުން ފިޔަވަޅު ނޭޅުމަށް  . މީގެ މާނައަކީ މުބާރާތް ބާއްވާ އެއް ގައުމު ކަމަށްވާ އެމެރިކާ ޓީމަށް އެންމެ ގިނަ ލަނޑު ޖަހައިދީފައިވާ ކުޅުންތެރިޔާއަށް ބެލްޖިއަމް މެޗުގައި ކުޅެވޭނެ އެވެ.

ޔޫރަޕްގެ ފުޓްބޯޅައިގެ މައި އިދާރާ، ޔުއެފާއިން ބުނީ މުބާރާތެއްގެ ތެރެއިން ސަސްޕެންޝަނެއް އުވާލުމަށް މިގޮތަށް ނުފޫޒު ފޯރުވުމަކީ "ރަތް ރޮނގު ހުރަސްކުރުން" ކަމަށެވެ.

ވޯލްޑް ކަޕްގެ ތާރީޚުގައި މިހާތަނަށް ދެއްކި 188 ރަތް ކާޑުގެ ތެރެއިން، ސަސްޕެންޝަނުން ސަލާމަތްވެފައިވަނީ ބަލޯގަންގެ އިތުރުން އެންމެ ކުޅުންތެރިއެކެވެ.

އެއީ 1962 ވަނަ އަހަރު ބްރެޒިލްގެ ގަރިންޗާއެވެ. އެއީ އޮޓޮމެޓިކް ސަސްޕެންޝަންގެ ގަވާއިދު އައުމުގެ ކުރިން، ސިޔާސީ ނުފޫޒު ފޯރުވާފައިވާ ކަމުގެ ތުހުމަތުތަކާއެކު ހިނގާފައިވާ ކަމެކެވެ.

ސީބީއެސް ނިއުސްއިން ކަށަވަރުކޮށްދީފައިވާ ގޮތުގައި، ބަލޯގަންގެ ސަސްޕެންޝަން އުވާލާފައިވަނީ ބުރާސްފަތި ދުވަހު އެމެރިކާގެ ރައީސް ޑޮނަލްޑް ޓްރަމްޕް، ފީފާގެ ރައީސް ޖިއާނީ އިންފަންޓީނޯއަށް ފޯނުން ގުޅުއްވައި އެކަމާ ބެހޭގޮތުން ވާހަކަދެއްކެވި ފަހުންނެވެ.

އާދީއްތަ ދުވަހު ރައީސް ޓްރަމްޕް ވަނީ "ބޮޑު ބޭއިންސާފެއް ބަދަލުކޮށްދިނީތީ" ފީފާއަށް ޝުކުރު އަދާކުރައްވާފަ އެވެ.

ބެލްޖިއަމްގެ ފުޓްބޯޅަ އެސޯސިއޭޝަނުން ނެރުނު ބަޔާނެއްގައި ބުނެފައިވަނީ ބަލޯގަން ސަސްޕެންޑް ނުކުރަން ނިންމުމުން އެކަމާ "ހައިރާންވާ" ކަމަށެވެ.

ހޯމަ ދުވަހު ބެލްޖިއަމްގެ ފޮރިން މިނިސްޓަރު މެކްސިމް ޕްރެވޯޓް ވިދާޅުވީ، މި ނިންމުމުގެ ފަހަތުގައިވަނީ ހަގީގަތުގައިވެސް ފޯނު ކޯލެއް ކަމަށްވާނަމަ، އެއީ ފުޓްބޯޅައާއި ކުޅިވަރުގެ އެންމެ އަސާސީ ގަވާއިދުތަކާ ކަނޑައެޅިގެން ޚިލާފު ކަމެއް ކަމަށެވެ.

ކޮރަޕްޝަންގެ މައްސަލައަކާ ގުޅިގެން 2016 ވަނަ އަހަރު މަގާމުން ވަކިވެވަޑައިގެންނެވި ފީފާގެ ކުރީގެ ރައީސް ސެޕް ބްލެޓާ އެކްސްގައި ވިދާޅުވީ، ފުޓްބޯޅައަކީ ސިޔާސީ ބާރުވެރިކަން ދައްކާ މައިދާނަކަށް ދުވަހަކުވެސް ވެގެންނުވާނެ ކަމަށެވެ.

ޔުއެފާއިން ބުނި ގޮތުގައި އެއް މެޗުގެ އޮޓޮމެޓިކް ސަސްޕެންޝަނަކީ އިޚްތިޔާރީ ކަމެއް ނޫން ކަމަށާއި، އެއީ ގަވާއިދުގައި ކަނޑައެޅިގެން ބަޔާންވެގެންވާ އުސޫލެކެވެ.

"ގަވާއިދުތައް ހިމާޔަތްކުރަން ތިބި ފަރާތްތަކުން އެ ގަވާއިދުތަކަށް އިހުތިރާމް ނުކުރާނަމަ، ކުޅިވަރުގެ އިންސާފުވެރިކަން ގެއްލި، މުބާރާތުގެ އަގު ވެއްޓިގެންދާނެ،" ޔުއެފާގެ ބަޔާނުގައިވެ އެވެ.

"ހަމައެއާއެކު، މިފަދަ ނިންމުމެއްގެ ސަބަބުން މި މުބާރާތުގައި ނުރަނގަޅު މިސާލެއް ގާއިމުވެގެންދާނެ. މީގެ ފަހުން ދިމާވާ މިފަދަ ކަންކަމުގައިވެސް އަމަލުކުރަން ޖެހޭނީ މިގޮތަށް. މިއީ މުބާރާތަށް ލިބޭނެ ވަރަށް ބޮޑު ގެއްލުމެއް."

"މިއީ މީގެ ކުރިން ދުވަހަކުވެސް ކަން ހިނގާފައިވާ ގޮތެއް ނޫން. މި ބޭއިންސާފު ނިންމުން ގަބޫލުކުރަން ދަތި."

ޔޫރަޕިއަން ޔޫނިއަންގެ ކުޅިވަރާ ބެހޭ ކޮމިޝަނަރު ގްލެން މިކަލެފް ވިދާޅުވީ ކުޅިވަރުގެ ނިންމުންތައް ނިންމަންވާނީ ކުޅިވަރު އިދާރާތަކުން ކަމަށާއި، ސިޔާސީ ފަރާތްތަކުން ނޫން ކަމަށެވެ.

އޭނާ އެކްސްގައި ކުރެއްވި ޕޯސްޓެއްގައި ވިދާޅުވީ ކުޅިވަރުގެ ނިންމުންތަކަށް ނުފޫޒު ފޯރުވުމަކީ ކުޅިވަރުގެ މިނިވަންކަން ގެއްލިގެންދާނެ ކަމެއް ކަމަށެވެ. އަދި ސިޔާސީ ބޭނުންތަކަށް ކުޅިވަރު ހަތިޔާރަކަށް ހެދުމުގެ ބަދަލުގައި، ކުޅިވަރުގެ ހިންގުމުގައި ހުރި ގޮންޖެހުންތަކަށް ސަމާލުކަން ދޭންޖެހޭ ކަމަށްވެސް އޭނާ ވިދާޅުވި އެވެ.

ފާއިތުވި މަސްތަކުގައި ޔުއެފާއާއި ފީފާއާ ދެމެދު އެކި ނިންމުންތަކާ ގުޅިގެން ވަނީ ބޮޑެތި ޚިޔާލުތަފާތުވުންތަކެއް އުފެދިފަ އެވެ.

ވޯލްޑް ކަޕްގައި ރެފްރީކަން ކުރުމަށް އުމަރު އަރުތާން އެމެރިކާއަށް އެތެރެވުމުގެ ހުއްދަ ނުދިނުމާ ގުޅިގެން، އޮގަސްޓް 12 ވަނަ ދުވަހު ޕެރިސް ސެއިންޓް ޖާމަން (ޕީއެސްޖީ) އާއި އެސްޓަން ވިލާ ބައްދަލުކުރާ ސުޕަ ކަޕް މެޗުގެ ރެފްރީކަން ކުރުމަށް ޔުއެފާއިން ވަނީ ސޯމާލިއާގެ އެ ރެފްރީއަށް ދައުވަތު ދީފަ އެވެ.