ޣައްޒާގެ ފަހާ މީހަކު ބޭކާރުވެފައިވާ ފޮތިކޮޅުތައް ބޭނުންކޮށްގެން އަންހެން ކުދިންނަށް ހެދުން ފަހައިދެނީ
ޣައްޒާގެ ބާޒާރުތަކުން އަންނައުނު ހުސްވެ އަގުތައް އުފުލިފައިވާއިރު، އާމިރު އަލް ރަންތީސީ ދަނީ އުކާލާ ފޮތިކޮޅުތައް ބޭނުންކޮށްގެން ކުޑަކުދިންނަށް ހެދުން ފަހައިދެމުން. މި ހެދުންތައް އޭނާ ހިލޭ ނުވަތަ ވަރަށް ހެޔޮ އަގުގައި ފޯރުކޮށްދެނީ ހަނގުރާމައިގެ ސަބަބުން ހާލުގައި ޖެހިފައިވާ އާއިލާތަކަށް އެހީތެރިވުމުގެ މަގުސަދުގަ. މިއީ ބިރުވެރިކަމުގެ ތެރޭގައި އުޅޭ ކުދިންގެ މޫނުމައްޗަށް އުފާވެރިކަން ގެނެސްދީ، އެކުދިންނަށް އުންމީދެއް ހޯދައިދިނުމަށް އޭނާ ކުރާ އިންސާނީ މަސައްކަތެއް.
ޣައްޒާގެ ޚާން ޔޫނިސްގައި، އުމުރުން 24 އަހަރުގެ އާމިރު އަލް ރަންތީސީ ދަނީ އުކާލާފައިވާ ފޮތިތަކާއި ހަލާކުވެފައިވާ ހެދުންތައް ބޭނުންކޮށްގެން ހެދުންތަކެއް ފަރުމާކުރަމުން | އޭއެފްޕީ
ޣައްޒާގެ މެދުތެރޭގައި އޮންނަ ދީރް އަލް-ބަލާހްގައި ދިރިއުޅޭ އާމިރު އަލް ރަންތީސީ ނަމަކަށް ކިޔާ މި ފަހާ މީހާ ބުނި ގޮތުގައި، އޭނާ މި މަސައްކަތް ފެށީ ހަނގުރާމައިގެ ސަބަބުން އާ ހެދުން ގަންނާނެ ތަނެއް ނެތުމުންނާއި، އާންމުންގެ އަތްމަތި ދަތިވެފައިވާތީ ކުޑަކުދިންގެ މޫނުމައްޗަށް އުފާވެރިކަން ގެނެސްދިނުމުގެ މަގުސަދުގަ އެވެ.
"އަޅުގަނޑު ފޮތި ހޯދުމަށްޓަކައި ގައްޒާ ސިޓީއަށް ދާއިރު، ފޮތި މި ހޯދަނީ އިޒްރޭލުގެ ހަމަލާތަކުގައި ސުންނާފަތިވެފައިވާ ތަންތަނުން. އެގޮތުން އެތަންތަނުން ލިބެން ހުރި ބާ ފޮތިތައް އަޅުގަނޑު ނަގާއިރު، އޭގެ ތެރޭގައި ގޮވާތަކެތީގެ އެތިކޮޅުތައް އަރައި ހަލާކުވެފައިވާ ފޮތިތަކާއި އަދި އަލިފާނުގެ ސަބަބުން އަނދާފައިވާ ފޮތިތައް ވެސް ހިމެނެ" އާމިރު އަލް ރަންތީސީ ބުންޏެވެ
އުމުރުން 24 އަހަރުގެ އާމިރު އަލް ރަންތީސީ ބޭނުންކުރަނީ ފަހާ ތަންތަނުން އުކާލާފައި ހުންނަ ކުދި ފޮތިކޮޅުތަކާއި، ބާވެފައިވާ ހެދުންތަކުން ނަގާ ފޮތިތަކެވެ. އޭނާ ބުނި ގޮތުގައި އެކި ކުލަކުލައިގެ ފޮތިކޮޅުތައް ގުޅުވައިގެން ފަހާ މި ހެދުންތަކަކީ ހަނގުރާމައިގެ ބިރުވެރިކަމުގެ ތެރޭގައި އުޅޭ ކުދިންނަށް ލިބޭ ވަރަށް ބޮޑު ހިތްހަމަޖެހުމެކެވެ.
ޣައްޒާގެ ދެކުނުގައި އޮންނަ ޚާން ޔޫނިސް ސިޓީގައި، ފަލަސްތީނުގެ އަންހެނުންތަކެއް ހެދުން ގަތުމަށް ބާޒާރު ކުރަނީ | އޭއެފްޕީ
ޣައްޒާގެ ބާޒާރުތަކުން އަންނައުނު ހުސްވެ، ލިބެން ހުރި ތަކެތީގެ އަގު އިންތިހާއަށް އުފުލިފައިވާއިރު، ޙަމްދާން ފަހާ މި ހެދުންތައް އޭނާ ބަހަނީ ހިލޭ ނުވަތަ ވަރަށް ކުޑަ އަގަކަށެވެ. މީގެ ސަބަބުން ވަގުތީ ފޭލިގެތަކުގައި ދިރިއުޅޭ ގިނަ އާއިލާތަކަކަށް ބޮޑު ލުޔެއް ލިބިގެންދެ އެވެ.
ޣައްޒާގެ ދެކުނުގައި އޮންނަ ޚާން ޔޫނިސް ސިޓީގައި، ފަލަސްތީނުގެ ފަހާ މީހަކު ފަހާ ފޮށްޓެއްގެ ކައިރީގައި އިށީނދެގެން އިނދެ ހެދުމެއް ފަހާ ފުރިހަމަކުރަނީ | އޭއެފްޕީ
މި މަސައްކަތާ ގުޅޭގޮތުން ވާހަކަދައްކަމުން ޙަމްދާން ބުނީ، ކޮންމެ ހެދުމަކީވެސް އުންމީދުގެ ރަމްޒެއް ކަމަށާއި، ހަނގުރާމައިގެ ސަބަބުން ކުޑަކުދިންގެ ކިބައިން ފޭރިގެންފައިވާ އުފާވެރިކަން ކޮންމެވެސް މިންވަރަކަށް އަނބުރާ ހޯދައިދިނުމަކީ އޭނާގެ އެންމެ ބޮޑު އުންމީދު ކަމަށެވެ.
