ލުބުނާނާއި، ސޫރިޔާ އަދި ޣައްޒާ އިން އިސްރާއީލު ސިފައިން ނުފައިބާނެ: ދިފާއީ ވަޒީރު ކަޓްޒް
1 ޖުލައި 2026 | ބުދަ 11:53ލުބުނާނާއި، ސޫރިޔާ އަދި ޣައްޒާގައި ގާއިމުކޮށްފައިވާ ރައްކާތެރިކަމުގެ ސަރަހައްދުތަކުން އިސްރާއީލު ސިފައިން ފަހަތަށް ނުޖެހޭނެ ކަމަށް އެ ގައުމުގެ ދިފާއީ ވަޒީރު އިސްރާއީލް ކަޓްޒް ވިދާޅުވެއްޖެ. އޭނާ ވިދާޅުވީ ހިޒްބުاللهގެ އަތުގައި ހަތިޔާރު ނެތްކަން ކަށަވަރުނުވަނީސް ލުބުނާނުން ސިފައިން ނުބާލާނެ ކަމަށާއި، އީރާނުން ހަމަލާއެއް ދީފިނަމަ ވަރުގަދަ ރައްދެއް ދޭނެ ކަމަށް.
އިސްރާއީލުގެ ދިފާއީ ވަޒީރު އިސްރާއީލް ކަޓްޒް | ރޮއިޓާސް
އިސްރާއީލުގެ ސިފައިން ލުބުނާނާއި، ސޫރިޔާ އަދި ޣައްޒާގައި ގާއިމުކޮށްފައިވާ "ސެކިއުރިޓީ ޒޯން" ނުވަތަ ރައްކާތެރިކަމުގެ ސަރަހައްދުތަކުން ފޭބުމަށް ވަކި މުއްދަތެއް ކަނޑައަޅާފައި ނުވާ ކަމަށާއި، އެ ސަރަހައްދުތަކުގައި ސިފައިން ދެމިތިބޭނެ ކަމަށް އެ ގައުމުގެ ދިފާއީ ވަޒީރު ބުދަ ދުވަހު ވިދާޅުވެއްޖެ އެވެ.
އިސްރާއީލުގެ ދިފާއީ ވަޒީރު އިސްރާއީލް ކަޓްޒް ވިދާޅުވީ، އެ ގައުމުގެ ރައްޔިތުންނާއި އާބާދީތައް ހިމާޔަތްކުރުމަށްޓަކައި، އިސްރާއީލް ޑިފެންސް ފޯސް (އައިޑީއެފް) އިން ލުބުނާނާއި، ސޫރިޔާ އަދި ގައްޒާގެ ރައްކާތެރިކަމުގެ ސަރަހައްދުތަކުގައި ވަކި މުއްދަތެއް ނެތް ގޮތަށް ދެމިތިބޭނެ ކަމަށެވެ.
2006 ވަނަ އަހަރު ލުބުނާނުގައި ކުރި ހަނގުރާމައިގައި މަރުވި އިސްރާއީލު ސިފައިންގެ ހަނދާނުގައި ބޭއްވި ރަސްމިއްޔާތެއްގައި ވާހަކަދައްކަވަމުން ކަޓްޒް ވިދާޅުވީ، އެ ގައުމުން ގާއިމުކޮށްފައިވާ ރައްކާތެރިކަމުގެ ސަރަހައްދުތަކުން އިސްރާއީލު ސިފައިން ފަހަތަށް ނުޖެހޭނެ ކަމަށެވެ.
މީގެ އިތުރުން، ލުބުނާނުގައި އިސްރާއީލުން ހިންގަމުންދާ އަސްކަރީ އޮޕަރޭޝަންތަކާ ގުޅިގެން އީރާނުން އިސްރާއީލަށް ހަމަލާއެއް ދީފިނަމަ، އީރާނަށް "ފުރިހަމަ ބާރާއެކު" ހަމަލާދޭނެ ކަމަށް ބުނެ ކަޓްޒް ވަނީ ކުރިން ދީފައިވާ އިންޒާރު އަލުން ތަކުރާރު ކުރައްވާފަ އެވެ.
އިސްރާއީލާއި ލުބުނާނާ ދެމެދު ސުލްހަ ގާއިމުކުރުމަށާއި، އީރާނުގެ މަދަދުލިބޭ ހިޒްބުالله ޖަމާއަތުން ހަތިޔާރު ގެންގުޅުން ހުއްޓުވުމަށް މަގުފަހިކުރުމުގެ ގޮތުން، އެމެރިކާގެ މެދުވެރިކަމުގައި އެކުލަވާލި އޮނިގަނޑު އެއްބަސްވުމެއްގައި ދެ ގައުމުން ހުކުރު ދުވަހު ވަނީ ސޮއިކޮށްފަ އެވެ.
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ހިމެނޭހެން އެ ގައުމުގެ އިސް އޮފިޝަލުން ތަކުރާރުކޮށް ވިދާޅުވަމުން ގެންދަވަނީ، އިސްރާއީލު ސިފައިންނާއި ހިޒްބުاللهގެ ހަނގުރާމަވެރިންނާ ދެމެދު ކުރިމަތިލުންތައް ހިނގަމުންދާ ލުބުނާނުގެ ދެކުނުގެ ސަރަހައްދުތަކުން ސިފައިން ބޭލުމުގެ އެއްވެސް ވިސްނުމެއް ނެތް ކަމަށެވެ.
ލުބުނާނުގެ ހެލްތު މިނިސްޓްރީން ހާމަކޮށްފައިވާ ތަފާސްހިސާބުތަކަށް ބަލާއިރު، ލުބުނާނަށް އިސްރާއީލުން ދިން ހަމަލާތަކުގައި މިހާތަނަށް ގާތްގަނޑަކަށް 4,300 މީހުން ވަނީ މަރުވެފަ އެވެ.
އިސްރާއީލު އަސްކަރިއްޔާއިން ބުނާ ގޮތުގައި، މާރިޗު މަހުގެ ކުރީކޮޅު ހަނގުރާމަ ފެށުނު ފަހުން ލުބުނާނުގައި އެ ގައުމުގެ 38 ސިފައިންނާއި މަދަނީ މަސައްކަތްތެރިއަކު ވަނީ މަރުވެފަ އެވެ.
ސޫރިޔާގެ ޒަމާންވީ ވެރިޔާ ބައްޝާރުލް އަސަދު މަގާމުން ދުރުކުރި ފަހުން، އެ ގައުމުގެ ދެކުނުގައި ހަތިޔާރު ނެތް ސަރަހައްދެއް (ޑީމިލިޓަރައިޒްޑް ޒޯން) ގާއިމުކުރުމުގެ ބޭނުމުގައި އިސްރާއީލުން ދަނީ ތަކުރާރުކޮށް ސޫރިޔާއަށް އަރައިގަނެ ބޮން އަޅަމުންނެވެ.
ޣައްޒާގެ ހާލަތަށް ބަލާއިރު، އެ ސަރަހައްދުގެ ގާތްގަނޑަކަށް 70 އިންސައްތަ މިހާރު އޮތީ އިސްރާއީލު ސިފައިންގެ ބާރުގެ ދަށުގައެވެ.
ފަލަސްތީނުގެ ހަމާސް ޖަމާއަތާއި އިސްރާއީލު އަސްކަރިއްޔާއިން ދަނީ، މިދިޔަ އަހަރުގެ އޮކްޓޫބަރު މަހުން ފެށިގެން އަމަލުކުރަމުންދާ ހަމަލާ ބަދަލުކުރުން ހުއްޓާލުމުގެ އެއްބަސްވުމާ އެއް ފަރާތުން އަނެއް ފަރާތުން ޚިލާފުވަމުންދާ ކަމަށް ބުނެ އެއްބަޔަކު އަނެއްބަޔަކަށް ތުހުމަތު ކުރަމުންނެވެ.
