ޔޫރަޕަކީ 'ތިންވަނަ ދުނިޔެ' ކަމަށް ޓްރަމްޕް ވިދާޅުވެއްޖެ

ޔޫރަޕްގެ ގައުމުތަކުން ގެންގުޅޭ ހިޖުރަވެރިންގެ ނާކާމިޔާބު ސިޔާސަތުތަކުގެ ސަބަބުން، އެ ގައުމުތަކުގެ ފެންވަރު ތިންވަނަ ދުނިޔޭގެ ގައުމުތަކުގެ ދަރަޖައަށް ވެއްޓިފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އެމެރިކާގެ މިނިވަންކަމުގެ ބަޔާނުގައި ސޮއިކުރިތާ 250 އަހަރު ފުރުމުގެ މުނާސަބަތުގައި ބޭއްވި އިހުތިފާލުތަކުގެ ތެރެއިން، ރައީސް ޓްރަމްޕް ވަނީ ވޮޝިންގޓަންގެ ބައިވެރިންގެ ގޮތުގައި ބެލެވޭ ޔޫރަޕިއަން ޔޫނިއަން (އީޔޫ) އާއި އިނގިރޭސިވިލާތަށް އަމާޒުކުރައްވައި އަނެއްކާވެސް ވަރުގަދަ ބަހުގެ ހަމަލާތަކެއް ދެއްވާފަ އެވެ.

ޖުލައި މަހުގެ 4 ވީ ހޮނިހިރު ދުވަހު އެކްސްގައި ކުރެއްވި ޕޯސްޓެއްގައި ރައީސް ޓްރަމްޕް ވިދާޅުވީ، ތިންވަނަ ދުނިޔޭގެ ކުށްވެރިންނަށް ގައުމުން ފުރުސަތު ދިނުމުން، އެ ގައުމަކީ ތިންވަނަ ދުނިޔޭގެ ގައުމަކަށް ބަދަލުވެގެންދާނެކަން ޔޫރަޕަށް މިހާރު ދަސްވަމުންދާ ކަމަށެވެ. އަދި އެއީ އެސްފިޔަޖަހާލާހާ ހިނދުކޮޅެއްގެ ތެރޭގައި ވަރަށް އަވަހަށް ހިނގާ ކަމެއްގެ ގޮތުގައި އެމަނިކުފާނު ސިފަކުރެއްވި އެވެ.

މީގެ އިތުރުން، ހިޖުރަވެރިންނާ މެދު އެމަނިކުފާނު ގެންގުޅުއްވާ ހަރުކަށި ސިޔާސަތުތަކުގެ ސަބަބުން އެމެރިކާ އެފަދަ ހާލަތަކަށް ދިއުމުން ސަލާމަތްވެފައިވާކަން ހާމަކުރައްވަމުން، އެމަނިކުފާނު އިންތިޚާބުވީ އެންމެ ރަނގަޅު ވަގުތުގައި ކަމަށް ޓްރަމްޕް ވިދާޅުވި އެވެ.

2015 ވަނަ އަހަރު ކުރިމަތިވި ހިޖުރަވެރިންގެ މައްސަލައަށް ފަހު، އީޔޫގެ ގައުމުތަކަށް ހިމާޔަތް ހޯދަން އަންނަ މީހުންގެ އަދަދު މަދުވެފައިވީ ނަމަވެސް، އާރް.އެފް.ބާލިންގެ ސެންޓަރ ފޯ ރިސާޗް އެންޑް އެނަލިސިސް އޮން މައިގްރޭޝަނުން ނެރުނު ރިޕޯޓެއް ބުނާގޮތުން، މިދިޔަ އަހަރު އެ ސަރަހައްދުގައި ދިރިއުޅޭ ބޭރު ގައުމުތަކަށް އުފަން މީހުންގެ އަދަދު ވަނީ ރެކޯޑް މިންވަރަކަށް އިތުރުވެ 64.2 މިލިއަނަށް އަރާފަ އެވެ. މިއީ 2010 ވަނަ އަހަރާ އަޅާބަލާއިރު 20.2 މިލިއަންގެ އިތުރުވުމެކެވެ.

ހޮނިހިރު ދުވަހު އެމެރިކާގެ ނައިބު ރައީސް ޖޭ.ޑީ ވޭންސް "ސަންޑޭ ޓައިމްސް" އަށް ދެއްވި އިންޓަވިއުއެއްގައި ވިދާޅުވީ، އިނގިރޭސިވިލާތުގެ ސިޔާސީ މަސްރަހު އޮތީ ވަރަށް ނުތަނަވަސް ހާލަތެއްގައި ކަމަށާއި، އެ ގައުމުގެ ރައްޔިތުން ތިބީ ބޮޑު ބަދަލަކަށް ފެންބޮވައިގެންފައި ކަމަށެވެ.

ވޭތުވެދިޔަ ދިހަ އަހަރު ދުވަހުގެ ތެރޭގައި އިނގިރޭސިވިލާތުގެ ބޮޑުވަޒީރުކަމުން އިސްތިއުފާ ދެއްވި ހަވަނަ ބޭފުޅާ ކަމަށްވާ ކިއަރ ސްޓާމަރގެ އިސްތިއުފާއާ ގުޅޭގޮތުން ވާހަކަދައްކަވަމުން ވޭންސް ވިދާޅުވީ، އިނގިރޭސިވިލާތުގެ ލީޑަޝިޕް ވަނީ ވަރަށް ގިނަ ދުވަސްތަކެއް ވަންދެން ނާކާމިޔާބުވެފައި ކަމަށެވެ. އަދި އެ ގައުމަށް މާ ބޮޑެތި ކުރިއެރުންތައް ހޯދިދާނެ ކަމަށް އޭނާ ފާހަގަކުރެއްވި އެވެ.

އެމެރިކާގެ ޓެކްނޮލޮޖީ ކުންފުނިތަކުން ފޯރުކޮށްދޭ ޑިޖިޓަލް ޚިދުމަތްތަކުން ނަގާ ޓެކްސް ބޮޑުކުރުމަށް އީޔޫއިން ނިންމައިފިނަމަ، އެ ސަރަހައްދުން އެމެރިކާއަށް ފޮނުވާ ހުރިހާ މުދަލަކުން 100 އިންސައްތައިގެ ޓެރިފް ނަގާނެ ކަމުގެ އިންޒާރު ޓްރަމްޕް ވަނީ މިދިޔަ ހަފުތާގައި ދެއްވާފަ އެވެ.

ޖޫން މަހުގެ ފަހުކޮޅު، ނޭޓޯގެ ސެކްރެޓަރީ ޖެނެރަލް މާކް ރޫޓޭއާ ވާހަކަދައްކަވަމުން ވެސް ރައީސް ޓްރަމްޕް ވަނީ ނޭޓޯގައި ހިމެނޭ ޔޫރަޕްގެ ގިނަ ގައުމުތަކާ މެދު ހިތްޕުޅުހަމަނުޖެހޭ ކަމަށް ވިދާޅުވެފަ އެވެ.

"އަޅުގަނޑު ބޭނުންވަނީ ވަފާތެރިކަން... ޖަރުމަނުވިލާތުގައި އެމެރިކާގެ 50،000 ސިފައިން އެބަތިބި. އެކަމަކު އަޅުގަނޑުމެން ކުޑަކުޑަ ކަމަކަށް އެދުމުން، ނުވަތަ ކުޑަ އެހީތެރިކަމަކަށް އެދުމުން އެމީހުން ބުނަނީ އެކަމެއް ނުކުރެވޭނެ ކަމަށް،" ޓްރަމްޕް ވިދާޅުވި އެވެ.

ޖަރުމަނުވިލާތުގެ ޑިފެންސް މިނިސްޓަރު ބޮރިސް ޕިސްޓޯރިއަސް ވަނީ މި ހަފުތާގެ ކުރީކޮޅު ޓްރަމްޕްގެ ވާހަކަތަކަށް ރައްދު ދެއްވާފަ އެވެ. އޭނާ ވިދާޅުވީ ނޭޓޯގެ މަފްހޫމަކީ ލޯމަރައިގެން ކިޔަމަންވުން ނޫން ކަމަށާއި، އެއީ މިނިވަންކަމާއެކު މަޝްވަރާކުރުން ކަމަށެވެ. އަދި ނޭޓޯގެ ނިންމުންތައް ނިންމަނީ ވަކި ގައުމަކުން ބުނާ ގޮތަށް ނޫން ކަމަށާއި، އެއީ ހުރިހާ މެންބަރު ގައުމުތަކެއްގެ މެދުގައި އޮންނަ މިނިވަން އިއްތިފާގަކުން ނިންމާ ނިންމުންތަކެއް ކަމަށް "ޑިއަރ ޝްޕީގަލް" އަށް ދެއްވި އިންޓަވިއުއެއްގައި އޭނާ ވިދާޅުވި އެވެ.