ނޭޓޯ ސަމިޓުގައި ޓްރަމްޕް، ޒެލެންސްކީ އާއި އަލް ޝަރާއާ ބައްދަލު ކުރައްވަނީ
6 ޖުލައި 2026 | ހޯމަ 05:47އެމެރިކާގެ ރިޔާާސީ ގަނޑުވަރު، ވައިޓް ހައުސްގެ ޑެޕިއުޓީ ޕްރެސް ސެކްރެޓަރީ އަންނާ ކެލީ ނޫސްވެރިންނާ ވާހަކަ ދައްކަވަމުން ވިދާޅުވީ، ބުދަ ދުވަހުގެ މެންދުރު ފަހުން ޓްރަމްޕް، ޒެލެންސްކީ އާއި އަލް ޝަރާއާ ބައްދަލު ކުރައްވާނެ ކަމަށް. އަދި މި ބައްދަލުވުން ކުރިއަށް ގެންދަވާނީ ވަކި ވަކިން ކަމަށް ވެސް އޭނާ ވިދާޅުވި.
އެމެރިކާގެ ރައީސް ޑޮނަލްޑް ޓްރަމްޕް. | ގެޓީ އިމޭޖަސް
ތުރުކީގައި ކުރިއަށްދާ ނޭޓޯ ސަމިޓުގެ ތެރެއިން ޔޫކްރެއިންގެ ރައީސް ވްލަޑިމިއަރ ޒެލެންސްކީ އާއި ސީރިއާގެ ރައީސް އަޙުމަދު އަލް ޝަރާއާ، އެމެރިކާގެ ރައީސް ޑޮނަލްޑް ޓްރަމްޕް ބައްދަލު ކުރައްވާނެ ކަމަށް ހާމަ ކޮށްފި އެވެ.
އެމެރިކާގެ ރިޔާާސީ ގަނޑުވަރު، ވައިޓް ހައުސްގެ ޑެޕިއުޓީ ޕްރެސް ސެކްރެޓަރީ އަންނާ ކެލީ ނޫސްވެރިންނާ ވާހަކަ ދައްކަވަމުން ވިދާޅުވީ، ބުދަ ދުވަހުގެ މެންދުރު ފަހުން ޓްރަމްޕް، ޒެލެންސްކީ އާއި އަލް ޝަރާއާ ބައްދަލު ކުރައްވާނެ ކަމަށެވެ. އަދި މި ބައްދަލުވުން ކުރިއަށް ގެންދަވާނީ ވަކި ވަކިން ކަމަށް ވެސް އޭނާ ވިދާޅުވި އެވެ.
ތުރުކީގައި ޒެލެންސްކީއާ ބައްދަލު ކުރައްވައި، ރަޝިޔާ އާއި ޔޫކްރެއިންއާ ދެމެދު ހިނގަމުން އަންނަ ހަނގުރާާމަ ނިންމުމާ ގުޅޭ ގޮތުން ޓްރަމްޕް މަޝްވަރާ ކުރައްވާނެ އެވެ. ހަތަރު އަހަރަަށް ވުރެ ގިނަ ދުވަސްވެފައިވާ މި ހަނގުރާމަ ނިމުމަކަށް ގެނައުމަކީ، ޓްރަމްޕް ވަރަށް ބޮޑަށް ބޭނުންފުޅުވާ ކަމެކެވެ. އަދި މިއީ ޓްރަމްޕްގެ އިސް ނެންގެވުމުގެ މަތިން ބާއްވާ ބައްދަލުވުމެއް ކަމަށް ވެސް ބުނެފައިވެ އެވެ.
އެމެރިކާގެ އިސް އޮފިޝަލަކު ވިދާޅުވެފައި ވަނީ ތުރުކީގައި ޒެލެންސްކީއާ ބައްދަލު ކުރެއްވުމަށް ފަހު، ރަޝިޔާގެ ރައީސް ވްލަޑިމިއަރ ޕުޓިންއާ ވެސް ޓްރަމްޕް ވާހަކަ ދައްކަވާނެ އެވެ. އޭގެ ކުރިން އެމެރިކާގެ މިނިވަން ދުވަހުގެ މުނާސަބަތާ ދިމާކޮށް ވެސް، ޓްރަމްޕް އާއި ޕުޓިން ވަނީ ފޯނުން ގުޅުއްވައި މަޝްވަރާ ކުރައްވައިފަ އެވެ.
މީގެ ކުރިން މިދިޔަ ޖޫން މަހު ފްރާންސްގައި ކުރިއަށް ދިޔަ ޖީ7 ގެ ބައްދަލުވުމުގެ ތެރެއިން ވެސް ޓްރަމްޕް އާއި ޒެލެންސްކީ ވަނީ ބައްދަލު ކުރައްވައިފަ އެވެ. އެ ބައްދަލުވުމުގައި ވެސް މަޝްވަރާ ކޮށްފައި ވަނީ ހަނގުރާމަ ނިންމުމާ ގުޅޭ ގޮތުންނެވެ.
މީގެ އިތުރުން ސީރިއާގެ ރައީސް އަލް ޝަރާއާ ބައްދަލު ކުރައްވާނީ ލުބްނާންގައި އިޒްރޭލް އާއި ހިޒްބުﷲ ހަނގުރާމަ ކުރަމުންދާ ދަނޑިވަޅެއްގައި، އެ ހަނގުރާމައިގައި ބައިވެރިވުމަށް ޓްރަމްޕް ސީރިއާ އަށް ގޮވާލާފައި ވަނިކޮށެވެ. ނަމަވެސް، އަލް ޝަރާ ވިދާޅުވެފައި ވަނީ އެ ހަނގުރާމައިގެ ތެރެއަށް ވަންނަން ސީރިއާ ބޭނުން ނުވާ ކަމަށާއި، ބޭނުން ވަނީ ސީރިއާ އާއި ލުބުނާންއާ ދެމެދު އިޤްތިޞާދީ ގުޅުން ޤާއިމު ކުރުމަށް ކަމަށެވެ.
މިދިޔަ އަހަރުގެ ނޮވެމްބަރު މަހުގެ ތެރޭގައި އަލް ޝަރާ ވަނީ އެމެރިކާ އަށް ވަޑައިގެން، ވައިޓް ހައުސްގައި ޓްރަމްޕްއާ ބައްދަލު ކުރައްވައިފަ އެވެ. މިއީ 80 އަހަރަށް ވުރެ ގިނަ ދުވަސްވީ ފަހުން ސީރިއާގެ ރައީސް އަކު ވައިޓް ހައުސް އަށް ވަޑައިގެންނެވި ފުރަތަމަ ފަހަރެވެ.
މަސްދަރު: އޭއެފްޕީ
