މެކްސިކޯ ފުޓްބޯޅަ ޓީމަށް ހަދިޔާ އަކަށް މީހަކު ދިން ރޮލެކްސް ގަޑިތައް އަނބުރާ ރައްދުކުރަން މަޖުބޫރުވެއްޖެ

ޔޫޓިއުބް ކޮންޓެންޓް ކްރިއޭޓަރެއް ކަމަށްވާ "ސްޓީވްވިލްޑޫއިޓް" މެކްސިކޯގެ ގައުމީ ފުޓްބޯޅަ ޓީމަށް ހަދިޔާކުރި އަގުބޮޑު އަތުކުރީ ގަޑިތައް އަނބުރާ ރައްދުކުރަން އެ ގައުމަށް މަޖުބޫރުވެއްޖެ އެވެ.

އަސްލު ނަމަކަށް ސްޓީވަން ޑިލިއޮނާޑިސް ކަމަށްވާ އެމެރިކާގެ މި ޔޫޓިއުބަރު ބުނި ގޮތުގައި، އޭނާ ވަނީ މެކްސިކޯ ޓީމުގެ ކޮންމެ ކުޅުންތެރިއަކަށާއި އޮފިޝަލަކަށް ރޮލެކްސް ބްރޭންޑުގެ ގަޑި ހަދިޔާކުރުމަށް 1 މިލިއަން ޑޮލަރު (747،000 ޕައުންޑް) ޚަރަދުކޮށްފަ އެވެ.

މިކަން ހިނގާފައި މިވަނީ، ވޯލްޑް ކަޕް ކޯ-ހޯސްޓް ކުރާ މެކްސިކޯ އިން މެކްސިކޯ ސިޓީގެ އަޒްޓެކާ ސްޓޭޑިއަމްގައި އާދީއްތަ ދުވަހުގެ ރޭ އިންގްލެންޑާ ދެކޮޅަށް ކުޅޭ މެޗުގެ ކުރިންނެވެ.

މިދިޔަ އަންގާރަ ދުވަހު މެކްސިކޯ އިން އިކުއެޑޯ ބަލިކޮށް މުބާރާތުގެ ގަދަ 32 އަށް ދަތުރުކުރި މެޗުގެ ކުރީ ދުވަހު، ޑިލިއޮނާޑިސް ވަނީ ޓީމުގެ މެންބަރުންނާ ބައްދަލުކޮށް އެ ގަޑިތައް ހަވާލުކޮށްފަ އެވެ.

ނަމަވެސް، ފީފާގެ ކޯޑް އޮފް އެތިކްސްގެ 21 ވަނަ މާއްދާގައި ބަޔާންކޮށްފައިވާ ގޮތުން، ހަދިޔާ ބަލައިގަނެވޭނީ ނުވަތަ ދެވޭނީ އެއީ ރަމްޒީ ނުވަތަ އަގުގެ ގޮތުން ވަރަށް ކުޑަ އެއްޗަކަށް ވާނަމަ އެކަންޏެވެ. އެހެންކަމުން، މިފަދަ އަގުބޮޑު ހަދިޔާތައް ބަލައިގަތުމަކީ ފީފާގެ ގަވާއިދުތައް ހުއްދަކުރާ ކަމެއް ނޫނެވެ.

މެކްސިކޯ ޓީމުގެ ރަސްމީ އެކްސް (ކުރީގެ ޓްވިޓާ) އެކައުންޓުން ކުރި ޕޯސްޓެއްގައި ބުނެފައިވަނީ، އެ ގަޑިތައް އަނބުރާ ދޭން ނިންމީ ކުޅުންތެރިންގެ މެދުގައި މަޝްވަރާކުރުމަށްފަހު އެއްބަސްވުމަކަށް އައިސްގެން ކަމަށެވެ. އަދި އެއީ "ސްޓީވްވިލްޑޫއިޓް" އަމިއްލަ އިސްނެގުމުގެ މަތިން ދިން ހަދިޔާތަކެއް ކަމަށްވެސް އެ ޓީމުން ބުނެފައިވެ އެވެ.

މެކްސިކޯ އިން މިހާރު އަމާޒު ހިފާފައިވަނީ 1986 ވަނަ އަހަރު އެ ގައުމުގައި ވޯލްޑް ކަޕް ބޭއްވި ފަހުން، ފުރަތަމަ ފަހަރަށް މުބާރާތުގެ ކުއާޓާ ފައިނަލާ ހަމައަށް ދަތުރުކުރުމަށެވެ.