އެމްބާޕޭގެ ޕެނަލްޓީން ޕެރަގުއޭ ބަލިކޮށް ފްރާންސް ކުއާޓާ ފައިނަލަށް

ވޯލްޑް ކަޕް ކާމިޔާބުކުރާނެ ކަމަށް ގިނަ ބަޔަކު ގަބޫލު ކުރަމުން އައި ފްރާންސުން ފިލަޑެލްފިއާގައި ވަރުގަދަ ކުޅުމެއް ދެއްކި ޕެރަގުއޭ ބަލިކޮށް ކުއާޓާ ފައިނަލުގެ ޖާގައެއް ކަށަވަރުކުރީ އުނދަގޫ މެޗަކަށްފަހު އެވެ. މި މެޗުން ފްރާންސް މޮޅުވީ ދެވަނަ ހާފުގައި ކީލިއަން އެމްބާޕޭ ކާމިޔާބުކޮށްދިން ޕެނަލްޓީންނެވެ.

މި މުބާރާތް ދެ ފަހަރު ކާމިޔާބުކޮށްފައިވާ ފްރާންސަށް މެޗުގެ ބޮޑު ބައެއްގައި ލަނޑު ޖަހާނެ މާ ގިނަ ފުރުސަތުތަކެއް ޕެރަގުއޭއިން ދީފައެއް ނުވެ އެވެ. ނަމަވެސް ބަދަލު ކުޅުންތެރިއެއްގެ ގޮތުގައި ކުޅެން އެރި ޑެސިރޭ ދޫއޭއަށް ބްރައިޓަންގެ ޑިއޭގޯ ގޯމޭޒް އޭރިއާ ތެރެއިން ކުރި ފައުލަކާ ގުޅިގެން، ވީޑިއޯ އެސިސްޓަންޓް ރެފްރީ (ވީއޭއާރް) ބެލުމަށްފަހު ރެފްރީ އިލްގިޒް ޓަންޓަޝޭވް ވަނީ ފްރާންސަށް ޕެނަލްޓީއެއް ދީފަ އެވެ.

ޕެރަގުއޭގެ ގޯލްކީޕަރު އޯލަންޑޯ ގިލްއަށް އޮޅުވާލުމަށްފަހު އެމްބާޕޭ މި ޕެނަލްޓީ ކާމިޔާބުކޮށް ފްރާންސް މުބާރާތުގެ ކުރިއަށް އޮތް ބުރަށް ގެންގޮސްދިނެވެ. މި ލަނޑާއެކު އެމްބާޕޭ ވަނީ މުބާރާތުގެ އެންމެ ގިނަ ލަނޑު ޖަހާ ކުޅުންތެރިޔާއަށްދޭ ރަން ބޫޓުގެ ރޭހުގައި އާޖެންޓީނާގެ ލިއޮނަލް މެސީއާ ހަމަކޮށް، ހަތް ލަނޑު ހަމަކޮށްފަ އެވެ.

ގަދަ 16 ގެ މި ކުރިމަތިލުން ފެށުނުއިރު ހޫނުމިން ހުރީ 38 ޑިގްރީ ސެލްސިއަސްގައެވެ. ނަމަވެސް މި ގަދަ ހޫނުގެ ސަބަބުން ފްރާންސަށް މާ ބޮޑު އަސަރެއް ނުކުރެއެވެ. މެޗު ފެށުނީއްސުރެ ބޯޅަ ހިފަހައްޓައިގެން ގިނަ ވަގުތު ކުޅުނީ ފްރާންސުންނެވެ.

އެހެންނަމަވެސް، ޕެރަގުއޭގެ ތަރުތީބުވެފައިވާ ދިފާއީ ފާރު ފޫއަޅުވާލުމަކީ ފްރާންސަށް އުނދަގޫ ކަމަކަށް ވިއެވެ. މީގެ ސަބަބުން ފްރާންސްގެ ކުޅުންތެރިންނަށް ކުރިމަތިވި ހާސްކަން މެޗުގެ 36 ވަނަ މިނެޓުގައި ފެނިގެންދިޔަ އެވެ. އެއީ ޕެރަގުއޭގެ އެންޑްރޭސް ކޫބާސް ކުރި ފައުލަކާ ގުޅިގެން އެމްބާޕޭ އޭނާއާ ދިމާލަށް ރުޅިގަނޑު ބޭރުކޮށްލި ވަގުތެވެ.

ގަދަ 32 ގެ ބުރުގައި ޖަރުމަނު ބަލިކޮށް ހައިރާންކަން ގެނުވި ގުސްޓާވޯ އަލްފާރޯގެ ޕެރަގުއޭ ޓީމުން ފުރަތަމަ ހާފުގައި ވަރަށް ވަރުގަދައަށް ދިފާއީ ކުޅުމެއް ދެއްކި އެވެ. މީގެ ނަތީޖާއެއްގެ ގޮތުން ފުރަތަމަ ހާފު ނިމުނީ އެއްވެސް ޓީމަކަށް ލަނޑެއް ނުޖެހި، އަދި ގޯލާ އަމާޒުކޮށް އެންމެ ހަމަލާއެއްވެސް ނުއުފެއްދި އެވެ.

ދެވަނަ ހާފު ފެށިގެން ފްރާންސުން ކުޅުން އަވަސްކޮށް، މެޗުގެ 54 ވަނަ މިނެޓުގައި މަނޫ ކޯނޭ ދުރުން ފޮނުވާލި ހަމަލާއަކުން ޕެރަގުއޭގެ ކީޕަރު ގިލްއަށް ފުރަތަމަ ފަހަރަށް ބޯޅަ ހުއްޓުވަން މަޖުބޫރުކުރުވި އެވެ. މިއީ މުޅި މެޗުގައިވެސް ގޯލާ އަމާޒުކޮށް ފޮނުވާލި ފުރަތަމަ ހަމަލާ އެވެ.

ނަމަވެސް ފްރާންސަށް މެޗުގެ އޮއިވަރު ބަދަލުކޮށްލެވުނީ، ވައަތް ފަރާތު ވިންގަށް ބްރެޑްލީ ބާކޯލާގެ ބަދަލުގައި ދޫއޭ ކުޅެން އެރުވި ހިސާބުންނެވެ.

ޕެރިސް ސެއިންޓް ޖާމަން (ޕީއެސްޖީ) އަށް ކުޅޭ 21 އަހަރުގެ މި ފޯވާޑް ކުޅެން އެރިތާ ހަތަރު މިނެޓު ތެރޭގައި އޭރިއާ ތެރެއަށް ވަދެ ޕެރަގުއޭގެ ޑިފެންޑަރެއްގެ ކައިރިން ނައްޓާލަން އުޅުމުގެ ތެރޭގައި، ގޯމޭޒް އޭނާގެ ފައިގައި އަޅުވައި ވައްޓާލި އެވެ. މި ޕެނަލްޓީ އެމްބާޕޭ ކާމިޔާބުކޮށް ފްރާންސަށް މުބާރާތުގެ އެންމެ ފަހު އަށް ޓީމުގެ ތެރެއިން ޖާގައެއް ކަށަވަރުކޮށްދިނެވެ.

މި މެޗަކީ ފުޓްބޯޅައިގެ ތަފާތު ދެ ޓެކްޓިކެއް ގެންގުޅޭ ދެ ޓީމެއްގެ ކުރިމަތިލުމެކެވެ.

މި މުބާރާތުގައި މޮޅު އެޓޭކިން ކުޅުމެއް ދައްކަމުން އައި ފްރާންސާ ދެކޮޅަށް ޕެރަގުއޭއިން ނުކުތީ ޖިސްމާނީ ބާރުގެ ބޭނުންކޮށް، ވަރުގަދަ ދިފާއީ ރޭވުންތެރިކަމަކާއެކު ފްރާންސްގެ ރިދަމް ހަލާކުކޮށްލުމަށެވެ.

ޑިޑިއޭ ޑެޝޯމްޕްގެ ޓީމަށް ޕެރަގުއޭގެ ދިފާއު ފޫއަޅުވާލުންވީ ވަރަށް ބޮޑު ގޮންޖެހުމަކަށެވެ. މިއީ 1966 ވަނަ އަހަރުގެ ފަހުން ވޯލްޑް ކަޕްގެ ނޮކައުޓް މެޗެއްގެ ފުރަތަމަ ހާފުގައި ގޯލާ އަމާޒުކޮށް އެންމެ ހަމަލާއެއްވެސް ފޮނުވާނުލެވުނު ތިންވަނަ މެޗެވެ.

ނަމަވެސް، އަނެއްކާވެސް ފްރާންސް ސަލާމަތްކޮށްދިނީ އެމްބާޕޭއެވެ. އޭނާގެ ލަނޑާއެކު ފްރާންސް ކުއާޓާ ފައިނަލަށް ދަތުރުކުރިއިރު، ދެކުނު އެމެރިކާގެ ޕެރަގުއޭއަށް ޖެހުނީ މުބާރާތާ ވަކިވާށެވެ.

ދޫއޭގެ މޮޅު ކުޅުމާއެކު ހޯދައިދިން ޕެނަލްޓީ ކާމިޔާބުކުރިއިރު، ފްރާންސްގެ ކެޕްޓަން އެމްބާޕޭ ހުރީ ވަރަށް ކެތްތެރިކަމާއެކުގަ އެވެ. މި މެޗުގައި ޕެރަގުއޭގެ ކުޅުމުގެ އިތުރުން ރެފްރީގެ ބައެއް ނިންމުންތަކުގެ ސަބަބުންވެސް ފްރާންސަށް ބޮޑެތި ގޮންޖެހުންތަކެއް ކުރިމަތިވި އެވެ.

ޕެރަގުއޭއިން 13 ފައުލް ކުރިއިރުވެސް އެއްވެސް ކުޅުންތެރިއަކަށް ރީނދޫ ކާޑެއް ނުދައްކައެވެ. އެކަމަކު 11 ފައުލް ކުރި ފްރާންސްގެ ތިން ކުޅުންތެރިއަކަށް ރީނދޫ ކާޑު ދެއްކި އެވެ.

އުމުރުން އެންމެ 27 އަހަރުގެ އެމްބާޕޭ މިހާރު ވަނީ ވޯލްޑް ކަޕްގައި ކުޅުނު 20 މެޗުން 19 ލަނޑު ޖަހާފަ އެވެ. އޭނާ މިހާރު އަމާޒު ހިފާފައިވަނީ މި މުބާރާތުގައި 20 ލަނޑު ހަމަކޮށް ރެކޯޑް ހަދާފައިވާ ލިއޮނަލް މެސީއާ އަރާ ހަމަކުރުމަށެވެ.

މި ދެ ޓީމު އެންމެ ފަހުން ވޯލްޑް ކަޕެއްގައި ބައްދަލުކުރީ 1998 ވަނަ އަހަރު ފްރާންސްގައި ބޭއްވި މުބާރާތުގެ ގަދަ 16 ގައެވެ. އެ ފަހަރުވެސް މެޗު ދިޔައީ ވަރަށް ވާދަވެރިކޮށެވެ.

އެ މެޗުގައި ލޯރެންޓް ބްލޮންކް ޖެހި ގޯލްޑަން ގޯލުން ޕެރަގުއޭ ބަލިކުރިއިރު، އޭގެ ދެ ހަފުތާ ފަހުން ކެޕްޓަން ޑެޝޯމްޕް ވަނީ ފްރާންސަށް ފުރަތަމަ ފަހަރަށް ވޯލްޑް ކަޕް އުފުލާލަދީފަ އެވެ.

މިއަދު 28 އަހަރު ފަހުން ޑެޝޯމްޕް ހުރީ ކޯޗުގެ މަގާމުގަ އެވެ. އޭނާގެ އުންމީދަކީ ތާރީޚު އިއާދަވެ، އަނެއްކާވެސް ތަށި އުފުލާލުމެވެ. މި މޮޅާއެކު ފްރާންސް މިވަނީ އެ މިސްރާބަށް އިތުރު ފިޔަވަޅެއް އަޅާފައެވެ.

ދެޓީމަށް ދެން އޮތީ ކޮން މެޗެއް؟

ފްރާންސް ދެން ދަތުރުކުރާނީ ބޮސްޓަންއަށެވެ. ކުއާޓާ ފައިނަލުގައި ޖުލައި 9 ވާ ބުރާސްފަތި ދުވަހުގެ ރޭ  ފްރާންސް ނުކުންނާނީ ކެނެޑާ 3-0 އިން ބަލިކުރި މޮރޮކޯއާ ދެކޮޅަށެވެ.

ޕެރަގުއޭ މުބާރާތުން ވަކިވި ނަމަވެސް، 2030 ވަނަ އަހަރުގެ ވޯލްޑް ކަޕުން އެ ޓީމު ފެންނާނެއެވެ. އެ މުބާރާތުގެ 100 އަހަރު ފުރުން ފާހަގަކުރުމަށް ބާއްވާ ފުރަތަމަ ތިން މެޗުގެ ތެރެއިން އެއް މެޗު ހޯސްޓްކުރާނީ ޕެރަގުއޭގަ އެވެ.