325 މިލިއަން ޑޮލަރު ރިޝވަތުގެ މައްސަލައިގައި ޗައިނާގެ ކުރީގެ އޮފިޝަލަކަށް މަރުގެ ހުކުމް އިއްވައިފި

ޗައިނާގެ އިރުމަތީ ސިޓީއެއްގެ ކޯޓަކުން، ވޭތުވެދިޔަ 30 އަހަރު ދުވަހުގެ ތެރޭގައި ރިޝވަތުގެ ގޮތުގައި 2.2 ބިލިއަން ޔުއާން (325 މިލިއަން ޑޮލަރު ނުވަތަ 243 މިލިއަން ޕައުންޑް) އަށް ވުރެ ގިނަ ފައިސާ ނެގި ކަމުގެ ކުށް ސާބިތުވި ކުރީގެ ސިޓީ އޮފިޝަލަކު މަރަން ހުކުމްކޮށްފި އެވެ.

1993 ވަނަ އަހަރުން ފެށިގެން 2023 ވަނަ އަހަރާ ހަމައަށް ނަންޖިން ސިޓީގެ އެކި މަގާމުތައް ފުރާފައިވާ ޔަންގް ޔޫލިންގެ މައްޗަށް، ރިޝވަތު ހިފުމުގެ އިތުރުން ދައުލަތުގެ ފައިސާއަށް ޚިޔާނާތްތެރިވުމާއި، މަގާމުގެ ނުފޫޒު ބޭނުންކުރުމާއި، މަނީ ލޯންޑަރިންގެ ކުށް ވެސް ވަނީ ސާބިތުވެފަ އެވެ. އޭނާ ނަހަމަ ގޮތުގައި ހޯދާފައިވާ މި ފައިސާއަކީ ފަހުގެ ތާރީޚެއްގައި މިފަދަ މައްސަލައެއްގައި ފެންމަތިވި އެންމެ ގިނަ ފައިސާގެ ތެރޭގައި ހިމެނޭ އަދަދެކެވެ.

އުމުރުން 69 އަހަރުގެ ޔަންގް، އޭނާގެ މަގާމުގެ ނުފޫޒު ބޭނުންކޮށްގެން އިންޖިނިއަރިން ކޮންޓްރެކްޓްތަކާއި، ބިން ދޫކުރުމާއި، ފައިނޭންސިންގެ ކަންކަމުގައި އެކި ފަރާތްތަކަށް އެހީތެރިވެދީފައިވަނީ އޭގެ ބަދަލުގައި ފައިސާއާއި އަގުބޮޑު ތަކެތި ހޯދައިގެން ކަމަށް އެ ގައުމުގެ ދައުލަތުގެ މީޑިއާތަކުން ރިޕޯޓްކޮށްފައިވެ އެވެ.

ޔަންގްގެ މައްސަލަ ތަހުގީގުކޮށްފައިވަނީ ޗައިނާގެ ރައީސް ޝީ ޖިންޕިން ފައްޓަވާފައިވާ ކޮރަޕްޝަނާ ދެކޮޅު ވަރުގަދަ ކެމްޕޭނުގެ ދަށުންނެވެ. މި ކެމްޕޭނުގެ ތެރެއިން އެ ގައުމުގެ އަސްކަރިއްޔާއާއި ބޭންކިން ދާއިރާގެ އިސްވެރިން ހިމެނޭހެން ގިނަ ބައެއްގެ މައްސަލަތައް ވަނީ ބަލާފަ އެވެ.

ނަންޖިން ސިޓީގެ އިގްތިސާދީ އަދި ޓެކްނޮލޮޖީގެ ތަރައްގީގެ ދާއިރާގައި ގިނަ ދުވަސްތަކެއް ވަންދެން މަސައްކަތް ކުރި ޔަންގް ހިންގާފައިވާ އަމަލުތަކަކީ "އިންތިހާއަށް ސީރިއަސް" ކަންތައްތަކެއް ކަމަށާއި، އޭގެ ސަބަބުން "ދައުލަތާއި ރައްޔިތުންގެ މަސްލަހަތަށް އިއާދަނުކުރެވޭ ފަދަ ބޮޑެތި ގެއްލުންތަކެއް ލިބިފައިވާ" ކަމަށް މިދިޔަ ހޯމަ ދުވަހު ޗަންގްޒޫ ސިޓީގެ ކޯޓުން ބުނެފައިވެ އެވެ.

ރައީސް ޝީ ވެރިކަމަށް ވަޑައިގެންނެވި ފަހުން ކޮރަޕްޝަނާ ދެކޮޅަށް ސިލްސިލާ ހަރަކާތްތަކެއް ހިންގަވަމުން ގެންދަވާއިރު، ފާޑުކިޔާ ފަރާތްތަކުން ބުނަނީ މިއީ ސިޔާސީ ވާދަވެރިން ނައްތާލުމަށް ބޭނުންކުރާ ހަތިޔާރެއް ކަމަށެވެ.

އިގްތިސާދީ ކުށްތަކުގައި މަރުގެ އަދަބު ދިނުމަކީ ޗައިނާގައި އާންމުކޮށް ކުރާ ކަމެއް ނޫން ނަމަވެސް، 1 ބިލިއަން ޔުއާންއަށް ވުރެ ގިނަ ފައިސާ ހިމެނޭ ބޮޑެތި މައްސަލަތަކުގައި މަދުން ނަމަވެސް މިފަދަ ހުކުމްތައް އިއްވަމުންދެ އެވެ.

މިސާލަކަށް، 10 އަހަރުގެ ތެރޭގައި 1.8 ބިލިއަން ޔުއާން ރިޝވަތުގެ ގޮތުގައި ނެގި މައްސަލައިގައި ފައިނޭންސް ދާއިރާގެ ކުރީގެ އިސްވެރިޔާ ލައި ޝިއާއޯމިންގެ މައްޗަށް އިއްވި މަރުގެ ހުކުމް 2021 ވަނަ އަހަރު ވަނީ ތަންފީޒުކޮށްފަ އެވެ.

ހަމައެއާއެކު، އިނަރ މޮންގޯލިއާގެ ކުރީގެ އޮފިޝަލެއް ކަމަށްވާ ލީ ޖިއަންޕިން، 3 ބިލިއަން ޔުއާންއަށް ވުރެ ގިނަ ފައިސާއަށް ޚިޔާނާތްތެރިވެ ރިޝވަތު ހިފި މައްސަލައިގައި 2024 ވަނަ އަހަރު ވަނީ މަރާލާފަ އެވެ.

މިފަދަ އެހެން ގިނަ މައްސަލަތަކުގައި ކޯޓުތަކުން އާންމުކޮށް އިއްވަނީ ޖަލު އަދަބު ނުވަތަ މަރުގެ ހުކުމް ތަންފީޒުކުރުން ފަސްކުރުމުގެ ހުކުމްތަކެވެ. މިގޮތަށް ފަސްކުރާ މަރުގެ ހުކުމްތައް، ވަކި މުއްދަތެއް ފަހުން އާންމުކޮށް އުމުރު ދުވަހުގެ ޖަލު އަދަބަކަށް ބަދަލުކުރެވެ އެވެ.

މީގެ އިތުރުން، ކުށް ސާބިތުވާ މީހުން އެހެން ކުށްވެރިންގެ މައުލޫމާތު ކޯޓަށް ހިއްސާކޮށްފި ނަމަ، ބައެއް ހާލަތްތަކުގައި އަދަބު ލުއިކޮށްދީފައި ވެސް އެބަހުއްޓެވެ.

ޔަންގް ވެސް ތަހުގީގީ އިދާރާތަކަށް އެފަދަ އެހީތެރިކަމެއް ފޯރުކޮށްދީފައިވީ ނަމަވެސް، އޭނާގެ ކުށްތަކުގެ ނުރައްކާތެރިކަން ބޮޑުކަމުން، އެ އެހީތެރިކަމަކީ އޭނާއަށް ދޭ އަދަބު ލުއިކޮށްދޭންޖެހޭ ފަދަ ސަބަބެއް ނޫން ކަމަށް ޗަންގްޒޫ ކޯޓުން ވަނީ ކަނޑައަޅާފަ އެވެ.

ދައުލަތުގެ މީޑިއާތަކުން ރިޕޯޓްކޮށްފައިވާ ގޮތުގައި، ޔަންގް ވަނީ އޭނާގެ ކުށަށް އިއުތިރާފުވެ، އެންމެ ފަހުން ދިން ބަޔާނުގައި އެ އަމަލުތަކާ މެދު ހިތާމަކުރާ ކަމަށް ބުނެފަ އެވެ.