ޓްރަމްޕްގެ ނުފޫޒުގައި ޖެހިފައިވާ ކަމަށް ބުނެ، އިންފަންޓީނޯ އިސްތިއުފާ ދިނުމަށް ގޮވާލާ އަޑު ގަދަވަނީ!

އެމެރިކާގެ ފަލޮރިން ބަލޮގަން އަށް ދެއްކި ރަތް ކާޑުގެ ސަސްޕެންޝަން އުވާލަން ފީފާ އިން ނިންމި ނިންމުމުގެ ސަބަބުން، ފީފާގެ ރައީސް ޖިއާނީ އިންފަންޓީނޯގެ އިސްތިއުފާ އަށް ގޮވާލާ އަޑުތައް ގަދަވެއްޖެ އެވެ. 

ބޮސްނިއާއާ ދެކޮޅަށް ކުޅުނު މެޗުގައި ބަލޮގަން އަށް ދެއްކި ރަތް ކާޑުގެ ސަބަބުން ގަދަ 16 ގައި އޭނާ އަށް ނުކުޅެވޭނެ ކަމަށް ބެލެވުނު ނަމަވެސް، ފީފާ އިން ވަނީ އޭނާ އަށް މައާފު ދީފައި އެވެ. އެއާ އެކު އަންގާރަ ދުވަހުގެ ހެނދުނު ބެލްޖިއަމްއާ ދެކޮޅަށް ކުޅުނު މެޗުގައި ބަލޮގަން ވަނީ ކުޅެފައި އެވެ. 

ބަލޮގަންގެ ސަސްޕެންޝަން އުވާލުމަށް އެދި، އެމެރިކާގެ ރައީސް ޑޮނަލްޑް ޓްރަމްޕް ވަނީ ފީފާގެ ރައީސް އިންފަންޓީނޯގެ ކިބައިން އެދިވަޑައިގެންފައި އެވެ. އެކަމާ ގުޅޭ ގޮތުން އިންފަންޓީނޯއާ ވާހަކަ ދެއްކެވި ކަމަށް ޓްރަމްޕް އަމިއްލަ އަށް ވަނީ އެއްބަސްވެ ވަޑައިގެންފައި އެވެ. 

މިކަމާ ގުޅޭ ގޮތުން ލިވަޕޫލްގެ ކުރީގެ ކޯޗު ޔާގަލް ކްލޮޕް ވަނީ ވަރަށް ބޮޑަށް ފާޑު ކިޔައިފަ އެވެ. މިވަގުތު ޖަރުމަނުގެ ޤައުމީ ޓީމުގެ ކޯޗުގެ މަޤާމަށް ހަމަޖައްސަން މަސައްކަތް ކުރަމުން އަންނަ ކްލޮޕް ބުނީ، މިއީ ފުޓުބޯޅަ ކުޅުންތެރިންނާއި، ސަޕޯޓަރުންގެ ކުޅިވަރެއް ކަމަށެވެ. އަދި މިއީ ޓްރަމްޕް އާއި އިންފަންޓީނޯ ބޭނުންހާ ގޮތަކަށް ކަންކަން ނިންމުމަކީ ބަލައި ގަނެވޭނެ ކަމެއް ނޫން ކަމަށް ވެސް ކްލޮޕް ބުންޏެވެ. 

އެކަން ފާހަގަކޮށް ކްލޮޕް ބުނެފައި ވަނީ، އެފަދަ ނިންމުން ތަކުގެ ސަބަބުން ކުޅިވަރުގެ އިންސާފުވެރިކަމާ މެދު ސުވާލު އުފެދޭ ކަމަށެވެ. ކްލޮޕްގެ އިތުރުން ފުޓުބޯޅައިގެ ބައެއް އެހެން ފަރާތް ތަކުން ވެސް އަންނަނީ އެ ނިންމުމަށް ފާޑު ކިޔަމުންނެވެ. އިނގިރޭސިވިލާތުގެ ލެޖެންޑް ގެރީ ލިނެކާ ބުނި ގޮތުގައި، އެމެރިކާގެ ކޯޗު މައުރީސިއޯ ޕޮޗެޓީނޯ ނުވަތަ ބަލޮގަން އަމިއްލަ އަށް ވެސް އެ މެޗުގައި ނުކުޅެ މަޑު ކުރަން ޖެހޭނެ ކަމަށެވެ.  ލިނެކާ ބުނީ ކުޅިވަރުގެ ރޫހާއި އުސޫލުތައް ހިފެހެއްޓުމުގެ ގޮތުން އެއީ އެންމެ ރަނގަޅު ގޮތް ކަމަށެވެ. 

މި މައްސަލައިގައި ފީފާގެ ކުރީގެ ރައީސް ސެޕް ބްލެޓާ އާއި، ޔުއެފާގެ އިތުރުން އިނގިރޭސިވިލާތުގެ ސިޔާސީ ބޭފުޅުން ވެސް ދަނީ އިންފަންޓީނޯ އަށް ފާޑު ކިޔަމުންނެވެ. ލިބަރަލް ޑިމޮކްރެޓްސްގެ ލީޑަރު ސަރ އެޑް ޑޭވީ ވިދާޅުވީ، ވޯލްޑް ކަޕް އަކީ ސަޕޯޓަރުންގެ އެއްޗެއް ކަމަށެވެ. އަދި އެއީ ޓްރަމްޕް ފަދަ ބޭފުޅުންގެ ނުފޫޒުގެ ތެރެއަށް ވެއްޓެން ޖެހޭ ކަމެއް ނޫން ކަމަށް ވެސް އެޑް ޑޭވީ ވިދާޅުވި އެވެ. އެއާ އެކު އޭނާ ވަނީ، އިންފަންޓީނޯ ވަގުތުން މަގާމުން ވަކިވާން ޖެހޭ ކަމަށް ވިދާޅުވެފައި އެވެ. 

އިނގިރޭސިވިލާތުގެ އެފްއޭގެ ކުރީގެ ޗެއާމަން ޑޭވިޑް ބާންސްޓީން ވިދާޅުވީ، ފުޓުބޯޅައިގެ އެންމެ ރީތި އެއް ސިފަ އަކީ ދުނިޔޭގެ ކޮންމެ ތަނެއްގައި ވެސް ގަވާއިދުތައް އެއް ގޮތަކަށް ތަންފީޒުވުން ކަމަށާއި، މި ހާދިސާ އިން އެ އުސޫލު މުގުރާލާފައިވާ ކަމަށެވެ.

އިންފަންޓީނޯ ގެންދަވަނީ 2016 ވަނަ އަހަރުން ފެށިގެން ފީފާ ރައީސްގެ މަގާމު އަދާ ކުރައްވަމުންނެވެ. އަދި ކުރިއަށް އޮތް 2027 ވަނަ އަހަރު އޮންނަ ފީފާގެ އިންތިޚާބުގައި ވާދަ ކުރައްވާނެކަން ވެސް އިންފަންޓީނޯ ވަނީ އިއުލާން ކުރައްވައިފަ އެވެ. ހަމަ އެހެންމެ، އިންފަންޓީނޯ އާއި ޓްރަމްޕް އަކީ ވަރަށް ގާތް ގުޅުން އޮންނަ ދެ ބޭފުޅުންނެވެ. 

މިދިޔަ އަހަރުގެ ޑިސެމްބަރު މަހުގެ ތެރޭގައި އިންފަންޓީނޯ ވަނީ، ފީފާ އިން ދޭ ސުލްޙައިގެ އެވޯޑު ޓްރަމްޕް އަށް ދެއްވައިފަ އެވެ. ޓްރަމްޕް އަށް އެ އެވޯޑު ދޭން ނިންމުމުގެ ސަބަބުން ވެސް، ގިނަ ބައެއްގެ ފާޑު ކިޔުން އިންފަންޓީނޯ އަށް އަމާޒުވި އެވެ. ޚާއްސަކޮށް ކުޅިވަރުގެ ތެރެއަށް ސިޔާސީ ކަންކަން ވަންނަ ކަމަށް ބުނެ، އިންތިހާ އަށް ފާޑު ކިޔުން އަމާޒުވެފައިވެ އެވެ.