މިޞްރު ބޭރުކޮށްލީ ބޭއިންސާފުން، ފީފާ އިން ބޭނުން ވަނީ މެސީ ހުންނަން: މިޞްރުގެ ކޯޗު
8 ޖުލައި 2026 | ބުދަ 04:35ވޯލްޑް ކަޕް އަކީ ބޭއިންސާފު މުބާރާތެއް ކަމަށާއި، އެ މުބާރާތުގެ މެޗުތައް ބަލައި ނުގަންނާނެ ކަަމަށް ވެސް ޙަސަން ބުނި. އަދި ފީފާ އިން ބޭނުން ވަނީ ވަކި ގޮތެއް ހަދަން ކަމަށް އޭނާ ބުނެފައިވޭ. އެއާ އެކު ޙަސަން ބުނީ ފީފާ އިން ބޭނުން ވަނީ ދުނިޔޭގެ ޗެމްޕިއަނުން މުބާރާތުގައި ތިބެން ކަމަށާއި، ފީފާ އިން ބޭނުން ވަނީ އާޖެންޓީނާގެ ކެޕްޓަން ލިއޮނަލް މެސީ މުބާރާތުގައި ހުންނަން ކަމަށް.
މިޞްރުގެ ކޯޗު ހުސާމް ޙަސަން އަދި އާޖެންޓީނާގެ ކެޕްޓަން ލިއޮނަލް މެސީ. | ރޮއިޓާސް
ފީފާ ވޯލްޑް ކަޕްގެ ގަދަ 16 ގައި އާޖެންޓީނއާ ދެކޮޅަށް ކުޅުނު މެޗުން މިޞްރު ބޭރުކޮށްލީ ބޭއިންސާފުން ކަމަށް ބުނެ، މިޞްރުގެ ކޯޗު ހުސާމް ޙަސަން ނުރުހުން ފާޅު ކޮށްފި އެވެ.
އަންގާރަ ދުވަހުގެ ރޭ ކުޅުނު މެޗަށް ފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ޙަސަން ބުނީ، އޭނާ ރީތި ގޮތުގައި ވާހަކަ ދައްކަން ބޭނުން ނުވާ ކަމަށެވެ. އެގޮތުން މިޞްރާ މެދު ވަރަށް ބޭއިންސާފުން އަމަލު ކޮށްފައިވާ ކަމަށާއި، މިޞްރުގެ ޙައްގު ތަކެއް އަތުލައި ގެންފައިވާ ކަމަށް އޭނާ ބުންޏެވެ.
ޙަސަން ބުނީ މެޗުގައި މިޞްރަށް ޕެނަލްޓީއެއް ލިބެން ޖެހޭ ކަމަށެވެ. އެގޮތުން އާޖެންޓީނާ އިން ތިން ވަނަ ލަނޑެއް ޖެހުމުގެ ކުރިން، އާޖެންޓީނާގެ އޭރިޔާ ތެރެއިން މެކް އެލިސްޓާ، މިޞްރުގެ ހަމްދީ ފަތީގެ ޖާޒީގައި ހިފަހައްޓައިގެން ހުރި ކަމަށާއި، އެއީ ޕެނަލްޓީއެއް ކަމަށް އޭނާ ބުންޏެވެ. ނަމަވެސް، ރެފްރީ ވީޑިއޯ އެސިސްޓެންޓް ރެފްރީ (ވީއޭއާރު) ބަލާފައި ނުވާތީ އޭނާ ކަންބޮޑުވުން ފާޅު ކުރި އެވެ.
ރެފްރީއާ މެދު ވަރަށް ބޮޑަށް ނުރުހުންވެ ހުރެ ޙަސަން ބުނީ، މެޗުގައި އޭނާ އަށް އެއްވެސް އިޙުތިރާމެއް ނުވަތަ ފެއާ ޕްލޭއެއް ނުފެނުނު ކަމަށެވެ. އެގޮތުން މިޞްރަށް ލިބުނު ޕެނަލްޓީއެއް ނުދިން ކަމަށާއި، އެ ޓީމުގެ ޖެހި ދެ ވަނަ ލަނޑު ބޭއިންސާފުން ބާތިލު ކުރި ކަމަށް އޭނާ ބުންޏެވެ. އަދި ޖާޒީގައި ހިފަހައްޓައިގެން ހުރިއިރު، ވީއޭއާރު ނުބެލީ ކަމަށް އޭނާ ބުންޏެވެ.
ވޯލްޑް ކަޕް އަކީ ބޭއިންސާފު މުބާރާތެއް ކަމަށާއި، އެ މުބާރާތުގެ މެޗުތައް ބަލައި ނުގަންނާނެ ކަަމަށް ވެސް ޙަސަން ބުންޏެވެ. އަދި ފީފާ އިން ބޭނުން ވަނީ ވަކި ގޮތެއް ހަދަން ކަމަށް އޭނާ ބުނެފައިވެ އެވެ. އެއާ އެކު ޙަސަން ބުނީ ފީފާ އިން ބޭނުން ވަނީ ދުނިޔޭގެ ޗެމްޕިއަނުން މުބާރާތުގައި ތިބެން ކަމަށާއި، ފީފާ އިން ބޭނުން ވަނީ އާޖެންޓީނާގެ ކެޕްޓަން ލިއޮނަލް މެސީ މުބާރާތުގައި ހުންނަން ކަމަށެވެ.
މެޗުން ބަލިވި ނަމަވެސް، މިޞްރުގެ ކުޅުންތެރިންގެ މަސައްކަތާ މެދު ހިތްހަމަ ޖެހޭ ކަމަށް ޙަސަން ވަނީ ބުނެފައި އެވެ. މިޞްރުގެ ކެޕްޓަން މުޙައްމަދު ޞަލާޙު އަދި އޮމަރު މާމޫޝް ފިޔަވައި ދެން ތިބި ކުޅުންތެރިންނަކީ މިޞްރުގެ ލޯކަލް ލީގުގައި ވާދަ ކުރާ ކުޅުންތެރިން ކަމަށާއި، އެ ކުޅުންތެރިންނަށް ދުނިޔޭގެ ޗެމްޕިއަންއާ ވާދަ ކުރެވުނު ކަމަށް އޭނާ ބުންނެވެ.
