އެމްބާޕޭގެ ފާޑު ކިޔުން ޕެރަގުއޭ އަށް، "އަހަރަމެންނަށް ވެސް ހަޑިކޮށް ކުޅެން އިނގޭ!"

ފީފާ ވޯލްޑް ކަޕްގެ ގަދަ 16 ގެ ބުރުގައި ޕެރަގުއޭ އިން ދެއްކި ކުޅުމަށް، ފްރާންސްގެ ކެޕްޓަން ކީލިއަން އެމްބާޕޭ ވަރަށް ބޮޑަށް ފާޑު ކިޔައިފި އެވެ.

ފްރާންސް އިން ވަނީ ޕެނަލްޓީގައި ޕެރަގުއޭ ބަލިކޮށް، މުބާރާތުގެ ކުއާޓާ ފައިނަލްގެ ޖާގަ ހޯދައިފަ އެވެ. އެ މެޗަށް ފަހު މީޑިއާތަކާ ވާހަކަ ދައްކަމުން އެމްބާޕޭ ބުނީ، ޕެރަގުއޭ އިން ބޭނުންވީ ފުޓުބޯޅަ ކުޅެން ނޫން ކަމަށެވެ. އެހެން ނަމަވެސް، ފްރާންސް އިން ޕެރަގުއޭ އަށް ދައްކައިދިނީ އެ ޓީމަށް ކަންތައް ކުރަންވީ ގޮތް އިނގޭކަން ކަމަށް އެމްބާޕޭ ވަނީ ބުނެފައި އެވެ.

އެއާ އެކު އެމްބާޕޭ ބުނީ މެޗުން މޮޅުވީ ފްރާންސް ކަމަށާއި، ޕެރަގުއޭ އަށް ވުރެ ފްރާންސް ހުރިހާ ގޮތަކުން ވެސް މޮޅު ކަމަށެވެ. އެކަން ފާހަގަކޮށް އެމްބާޕޭ ބުނީ، ހަޑިކޮށް ކަމެއް ކުރަން ޖެހިއްޖެ ނަމަ ފްރާންސް އިން ވެސް އެކަން ކުރާނެ ކަމަށެވެ. 

އެމްބާޕޭ ބުނީ ފްރާންސް އިން ދެއްކީ ވަރަށް ރަސްމީ ނުވަތަ ހަމަޖެހޭ ކުޅުމެއްހެން ޕެރަގުއޭ އަށް ހީވެފައި އޮވެދާނެ ކަމަށެވެ. އެހެން ނަމަވެސް، ހަޑިކޮޑަށް ނުވަތަ ހަޑި ފުޓުބޯޅަ ކުޅެން ވެސް ފްރާންސް އަށް އިނގޭނެ ކަމަށް އެމްބާޕޭ ވަނީ ބުނެފައި އެވެ. އެކަން ފާހަގަކޮށް އެމްބާޕޭ ބުނީ، ފްރާންސް އަކީ ހަމައެކަނި އެޓޭކިން ކުޅުމެއް ކުޅޭ ޓީމެއް ނޫންކަން މީގެ ކުރިން ވެސް ސާބިތު ކޮށްދީފައި ވާނެ ކަމަށެވެ. 

މެޗުގައި ފްރާންސް ހުއްޓުވުމަށް ޕެރަގުއޭ އިން ވަނީ ގިނަ މަސައްކަތް ތަކެއް ކޮށްފައި އެވެ. މެޗުގައި ޕެރަގުއޭ އިން ގިނަ ފައުލު ތަކެއް ވެސް ކުރި އެވެ. އެހެން ނަމަވެސް، އެ ޓީމަށް ރީނދޫ ކާޑެއް ދައްކާފައި ނުވާތީ ފްރާންސްގެ އެހެން ކުޅުންތެރިން ވެސް ވަނީ ކަންބޮޑުވުން ފާޅު ކޮށްފައި އެވެ. ފްރާންސްގެ ރަޔަން ޗާކީ ބުނެފައި ވަނީ، ޕެރަގުއޭ އިން 30 ފައުލު ކުރާއިރު ވެސް ރީނދޫ ކާޑެއް ނުދައްކަންވީ ސަބަބެއް ނުވިސްނޭ ކަމަށެވެ.

މުބާރާތުގެ ކުއާޓާ ފައިނަލްގައި ފްރާންސް ނިކުންާނީ މޮރޮކޯއާ ދެކޮޅަށެވެ. މީގެ ކުރިން 2022 ވަނަ އަހަރު ޤަތަރުގައި އޮތް ފީފާ ވޯލްޑް ކަޕްގެ ސެމީ ފައިނަލްގައި މި ދެ ޓީމު ބައްދަލު ކުރި އެވެ. އެފަހަރުގެ މެޗު ފްރާންސް އިން ވަނީ 2-0 އިން ކާމިޔާބު ކޮށްފައި އެވެ.