ކޫލް ސްކޫލް ޕްރޮޖެކްޓް: ނިންމަން ދިން ތާރީޚު ފަހަނަ އަޅައި 10 މަސް ދިޔައިރު ނިމުނީ 61 އިންސައްތަ މަސައްކަތް!
7 ޖުލައި 2026 | އަންގާރަ 08:21ސަރުކާރުގެ "ކޫލް ސްކޫލް" މަޝްރޫއުގެ ދަށުން ހުރިހާ ސްކޫލެއް އޭސީކޮށް ނިންމުމަށް ކަނޑައެޅި މުއްދަތު ފާއިތުވިއިރު، މިހާތަނަށް ނިމިފައިވަނީ މަސައްކަތުގެ 61 އިންސައްތަ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެ. މަޖިލީހުގައި މެންބަރުން ކުރެއްވި ސުވާލުތަކަށް ޖަވާބުދެއްވަމުން މިނިސްޓަރު ވިދާޅުވީ ހުރިހާ ސްކޫލަކަށް އޭސީ ފޮނުވިފައިވީ ނަމަވެސް، ބައެއް ރަށްރަށުގައި ކަރަންޓުގެ ވިއުގަ އަޕްގްރޭޑް ކުރުމުގެ މަސައްކަތް އަދިވެސް ކުރިއަށްދާ ކަމަށް. މި މަޝްރޫއު ލަސްވަމުންދާތީ ބެލެނިވެރިންނާއި އާންމުންގެ ފާޑުކިޔުން ސަރުކާރަށް ވަނީ އަމާޒުވެފަ.
އެޑިއުކޭޝަން މިނިސްޓަރު ޑރ. އިސްމާއިލް ޝަފީއު، ރައްޔިތުންގެ މަޖިލީހުގައި | ރައްޔިތުންގެ މަޖިލިސް
އެޑިއުކޭޝަން މިނިސްޓްރީގެ "ކޫލް ސްކޫލް" ޕްރޮޖެކްޓްގެ ދަށުން ރާއްޖޭގެ ހުރިހާ ސަރުކާރު ސްކޫލެއްގެ ކްލާސްރޫމްތަކުގައި އޭސީ ހަރުކުރުމުގެ މަސައްކަތް 2025 ވަނަ އަހަރުގެ ސެޕްޓެމްބަރު މަހުގެ ކުރިން ނިންމަން ބުނި ނަމަވެސް އެ މުއްދަތު ފަހަނައަޅައި ގޮސްފައިވާތާ 10 މަސް ދުވަހަކަށް ފަހު މަޝްރޫއުގެ 61 އިންސައްތަ މަސައްކަތް ނިމިފައިވާ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެ އެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާއަށް މިނިސްޓަރު ހާޒިރު ކޮށްފައިވާއިރު ސުވާލުކުރުމުގެ ވަގުތުގައި ހިތަދޫ މެދު ދާއިރާގެ މެންބަރު އަހްމަދު އަޒާން މަރުޒޫގު ވަނީ މި ސަރުކާރުގެ ކޫލް ސްކޫލް ޕްރޮޖެކްޓާ ގުޅޭ ގޮތުން ސުވާލު ކުރައްވާފަ އެވެ. މެންބަރުން ވިދާޅުވީ އައްޑޫ ހުރިހާ ސްކޫލެއްގައި އޭސީ ހަރުކުރެވިފައިވީ ނަމަވެސް އޭސީތަކަށް ކަރަންޓެއް ނުދެވޭ ކަމަށެވެ. އެހެން ކަމުން އެކަން ނިމޭނެ ތާރީޚެއް މެންބަރު އެއްސެވި އެވެ.
އެ ސުވާލަށް ސީދާ ޖަވާބެއް ނުދެއްވާ މިނިސްޓަރު ފުރަތަމަ ދެއްކެވީ މި ސަރުކާރުން ރައީސް ޑރ. މުހައްމަދު މުއިއްޒުގެ އިރުޝާދުފުޅާއެކު ސްކޫލުތަކުގެ ކަންކަން އިސްލާހު ކުރުމަށް މަސައްކަތް ކުރައްވާފައިވާ ވާހަކަ އެވެ. އެއަށް ފަހު ވަނީ އެ މައްސަކަތް ނިންމަން ދިން ތާރީޚު ފަހަނައަޅައި ދިޔަތާ 10 މަސް ދުވަސް ވީއިރު ވެސް ނިމުނީ 61 އިންސައްތަ މަސައްކަތް ކަމަށް ވިދާޅުވެފަ އެވެ.
ހޫނުގަދަވުމާ އަދި ކްލާސްރޫމްގެ ހިތްފަސޭހަކަން ހޯދުމަށް ސަރުކާރުން މި މަޝްރޫއު ފައްޓާފަ މިވަނީ. ޖުމްލަ 217 ސްކޫލެއްގައި އަަޅުގަނޑުމެން މި މަސައްކަތް ފެށީ. މިއަދާ ހަމަ އަށް 61 ޕަސެންޓް ސްކޫލުގެ މަސައްކަތް މިވަނީ ނިމިފަ. އަޅުގަނޑުމެން މިހާރު މަސައްކަތް ކުރަނީ ބާކީ ހުރި ސްކޫލުތަކުގެ ކަރަންޓުގެ ވިއުގަ އަޕްގްރޭޑް ކޮށް ކަރަންޓުގެ މަސައްކަތް ނިންމާލުމަށް ހުރިހާ ސްކޫލުތަކަށް ވެސް މިހާރު ވާނީ އޭސީ ފޮނުވިފަ.އެޑިއުކޭޝަން މިނިސްޓަރު ޑރ. އިސްމާއިލް ޝަފީއު
އެޑިއުކޭޝަން މިނިސްޓްރީގެ "ކޫލް ސްކޫލް" ޕްރޮޖެކްޓްގެ ދަށުން ރާއްޖޭގެ ހުރިހާ ސަރުކާރު ސްކޫލެއްގެ ކްލާސްރޫމްތަކުގައި އޭސީ ހަރުކުރުމަށް ވީ ވައުދު އަދިވެސް ފުއްދާފައި ނުވާތީ އެކަމާ ގުޅިގެން ވެސް ބެލެނިވެރިން ގެ ފާޑުކިއުން ވަނީ މި ސަރުކާރަށް އަމާޒުވެފަ އެވެ.
އެޑިއުކޭޝަން މިނިސްޓަރު ޑރ. އިސްމާއިލް ޝަފީއު އޭރު ވިދާޅުވެފައި ވަނީ 2025 ވަނަ އަހަރުގެ ސެޕްޓެމްބަރު މަހުގެ ކުރިން ހުރިހާ ސްކޫލުތަކެއްގެ ކްލާސްރޫމުތަކުގައި އޭސީ ހަރުކޮށް ނިންމުމަކީ މި ސަރުކާރުގެ އަމާޒެއް ކަމަށެވެ.
ނަމަވެސް ސެޕްޓެމްބަރު މަސް ނިމުނު އިރުވެސް އެ ވައުދު މި ސަރުކާރުން ފުއްދާފައި ނުވާއިރު އޭގެ ފަހުން 4 މަސް ފާއިތުވެ 2026 ވަނަ އަހަރުގެ ދިރާސީ އަހަރު ފެށުނު އިރު ވެސް އެ ވައުދު ފުއްދާފައި ނުވާތީ ގިނަ ބަޔަކު ވަނީ ސަރުކާރަށް ވަރަށް ބޮޑަށް ފާޑުކިޔާފަ އެވެ.
