އިސްރާއީލު ޕާސްޕޯޓްގައި ރާއްޖެ އެތެރެވުން މުތުލަގަށް މަނާކުރާ އިމިގްރޭޝަންގެ ބިލު ބަލައިގަނެފި
18 ނޮވެމްބަރު 2026 | ބުދަ 13:48އިސްރާއީލު ޕާސްޕޯޓު ގެންގުޅޭ މީހުން ރާއްޖެ އެތެރެވުން މަނާކުރުން ހިމެނޭހެން، އިމިގްރޭޝަންގެ އުސޫލުތައް ހަރުދަނާކުރުމަށް ހުށަހެޅި ބިލު 52 މެންބަރުންގެ އަޣުލަބިއްޔަތުން މަޖިލީހަށް ބަލައިގަނެ، ދިރާސާކުރުމަށް ސަލާމަތީ ޚިދުމަތްތަކާ ބެހޭ ކޮމިޓީއަށް ވަނީ ފޮނުވާފަ. މި ބިލުގެ މަގުސަދަކީ ރާއްޖޭގެ ސިޔާދަތާއި ގައުމީ ސަލާމަތަށް ނުރައްކާވެދާނެ ފަރާތްތަކާއި ކުށްވެރިން ރާއްޖެ އެތެރެވުން ހުއްޓުވައި، އިމިގްރޭޝަންގެ ޚިދުމަތްތައް ގާނޫނީ ވަރުގަދަ އޮނިގަނޑެއްގެ ދަށުން ތަރުތީބުކުރުން


އިމިގްރޭޝަންގެ މުވައްޒަފުންތަކެއް ހިދުމަތް ދެނީ | ޕީއެސްއެމް
އިސްރާއީލުގެ ޕާސްޕޯޓް ގެންގުޅޭ ފަރާތްތައް ރާއްޖެ އަށް އެތެރެވުން މުތުލަގަށް މަނާކުރުން ހިމަނައި، ދިވެހިރާއްޖޭގެ އިމިގްރޭޝަންގެ ބިލު ރައްޔިތުންގެ މަޖިލީހަށް ހުށަހަޅައިފި އެވެ.
ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި މި ބިލު މަޖިލީހަށް ބަލައިގަނެފައި ވަނީ 52 މެންބަރުންގެ އަޣުލަބިއްޔަތުންނެވެ. ބިލާ ދެކޮޅަށް 1 މެންބަރަކު ވޯޓު ދެއްވި އެވެ. އެއާއެކު ބިލު ދިރާސާ ކުރުމަށް ވަނީ ސަލާމަތީ ޚިދުމަތްތަކާ ބެޙޭ ކޮމިޓީ އަށް ވަނީ ފޮނުވާފަ އެވެ.
ބިލު ހުށައެޅުމުގެ ބޭނުމެއް ކަމަށް ބުނެފައި ވަނީ ރާއްޖޭގެ އިމިގްރޭޝަންގެ ކަންކަން ހިންގައި ބެލެހެއްޓުމަށްޓަކައި މޯލްޑިވްސް އިމިގްރޭޝަންގެ ނަމުގައި މަދަނީ ވަކި ޚިދުމަތެއް ގާއިމުކޮށް އެ ޚިދުމަތް ހިންގުމާއިގުޅޭ އުސޫލުތައް ކަނޑައެޅުމާއި، ރާއްޖެއަށް މީހުން އައުމާއި، މީހުން ފުރުމާއި ގުޅޭ ޚާއްސަ އަދި އާންމު އުސޫލުތަކާއި ދިވެހި ރައްޔިތުންނަށް ރާއްޖެ އިން ފުރުމާއި އެނބުރި އައުމަށް ބޭނުންވާ ޕާސްޕޯޓު ދޫކުރުމާއި ބެހޭ އުސޫލުތައް ކަނޑައެޅުމެވެ.
މީގެ އިތުރުން ބިދޭސީން ހިރާއްޖެއަށް އައުމާއި، ހުރުމުގެ ހުއްދަ ދިނުމާއިގުޅޭ އުސޫލުތަކާއި، ރާއްޖެއަށް އައުމުގެ ނުވަތަ ހުރުމުގެ ހުއްދަނެތް ފަރާތްތަކާ މެދު އަމަލުކުރެވޭނެ އުސޫލުތައް ހިމެނޭގޮތުން އިމިގްރޭޝަނާބެހޭ އުސޫލުތަކާއި އިޖުރާއަތުތައް ހަރުދަނާ ގާނޫނީ އޮނިގަނޑެއްގެ ދަށުން ކަނޑައަޅައި ބަޔާން ކުރުމަކީ ވެސް ބިލުގެ ބޭނުމެއް ކަމަށް ވަނީ ބަޔާންކޮށްފަ އެވެ.
މި ބިލުގައި ވަނީ ރާއްޖެ އަށް އައުމުގެ ހުއްދަ ނުދެވޭ މީހުންގެ ތަފްސީލުތައް ހިމަނާފަ އެވެ. އޭގެ ތެރޭގައި ރާއްޖޭގެ ސިޔާދަތަށް ނުވަތަ ގައުމީ ސަލާމަތަށް ނުރައްކަލެއް ކުރިމަތިކޮށްފާނެ ކަމަށް ބެލެވޭ މީހުންނާއި ޓެރަރިސްޓް ޖަމާއަތްތަކަށް ނިސްބަތްވާ މީހުންނާއި އެފަދަ ޖަމާއަތްތަކާ ގުޅުން ހުރި ކަމަށް ބެލެވޭ މީހުންނާއި، އެއީ ޓެރަރިސްޓުން ކަމަށް މައުލޫމާތު ލިބިފައިވާ މީހުންގެ އިތުރުން، ބައިނަލްއަގްވާމީ ގާނޫނުގައި ޖިނާއީ ކުށެއް ކަމަށް ކަނޑައަޅާފައިވާ ކުށެއް ކޮށްފައިވާ ނުވަތަ ކޮށްފައިވާ ކަމަށް ތުހުމަތު ކުރެވިފައިވާ މީހުން ހިމެނެ އެވެ.
މީގެ އިތުރުން އިންޓަރނޭޝަނަލް ކްރިމިނަލް ކޯޓުން ދައުވާ އުފުލާފައިވާ ނުވަތަ ހައްޔަރުކުރުމުގެ އަމުރެއް ނެރެފައިވާ ނުވަތަ އިންޓަރނޭޝަނަލް ކްރިމިނަލް ޕޮލިސް އޮގަނައިޒޭޝަނުން ލިސްޓުކޮށްފައިވާ މީހުންނާއި އެހެން ގައުމެއްގެ އަދުލު އިންސާފަށް ނުވަތަ ތަހުގީގަށް ފިލައިގެން އުޅޭ މީހުންނާއި ރާއްޖެ އަށް ނާދެވޭ ގޮތަށް ޑީޕޯޓްކޮށްފައިވާ މީހުން ވެސް ހިމެނެ އެވެ.
އިސްރާއީލު ޕާސްޕޯޓު ގެންގުޅޭ ފަރާތްތަކަށް ރާއްޖެ އަށް އައުމުގެ ހުއްދަ، މުތުލަގަށް ނުދެވޭ ކަމަށް މި ބިލުގައި ބަޔާންކޮށްފައިވާއިރު މިހާރު ގާނޫނުގައި ބަޔާންކޮށްފައިވާ ގޮތުން އިސްރާއީލު ޕާސްޕޯޓު ގެންގުޅޭ ފަރާތްތަކަށް، ފަލަސްތީނަށް ދެމުން އަންނަ ހަމަލާތައް ހުއްޓާލަން ދެން ރާއްޖެ އައުން މަނާވާނެ އެވެ.
މި ބިލުގައި ވަނީ އިމިގްރޭޝަން އޮފީސް ތަރައްގީ ކުރުމާއި، މުވައްޒަފުން ތަމްރީން ކުރުމުގެ ކަންކަމުގެ އިތުރުން ޚިދުމަތުގެ އުސޫލުތައް ކަނޑައެޅުމާއި އިމިގްރޭޝަންގެ އުސޫލުތަކާއި އިޖުރާއަތުގެ ގާނޫނީ އޮނިގަނޑު ހަރުދަނާކުރުން ވެސް ހިމަނާފަ އެވެ.










