ކުޑަކުދިންނަށް ޖިންސީ ގޯނާ ކުރި ކުށްވެރިން ގޭބަންދަށް ދޫކޮށްފައިވާ މައްސަލައިގައި ކަމާގުޅޭ ފަރާތްތައް މަޖިލީހަށް ހާޒިރުކުރަން ހުށަހަޅައިފި
16 ނޮވެމްބަރު 2026 | ހޯމަ 08:59ކުޑަކުދިންނަށް ޖިންސީ ގޯނާކުރާ މީހުންގެ ދަފްތަރުގައި ހިމެނޭ 20 މީހަކު ގޭބަންދުގައި ތިބި މައްސަލައިގައި، އެކަމުގެ ގާނޫނީ ޒިންމާ އުފުލަންޖެހޭ އިދާރާތައް މަޖިލީހަށް ހާޒިރުކުރުމަށް ވަނީ ހުށަހަޅާފައި. ގާނޫނުތައް ބަޔާންކުރާ ގޮތުން މިފަދަ ކުށްވެރިންނަށް ޕެރޯލް ނުވަތަ ކަފާލާތުގެ ފުރުސަތު ނުލިބޭއިރު، އެ މީހުން ގޭބަންދަށް ދޫކުރި އުސޫލާއި ރައްކާތެރިކަމުގެ ފިޔަވަޅުތައް ސާފުކުރުމަށް މެންބަރު ވަނީ އެދިވަޑައިގެންފައި


ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) | ރައްޔިތުންގެ މަޖިލިސް
ކުޑަކުދިންނަށް ޖިންސީ ގޯނާ ކުރި ކުށްވެރިން ގޭބަންދަށް ދޫކޮށްފައިވާ މައްސަލައިގައި ކަމާގުޅޭ އިދާރާތަކާ މިނިސްޓްރީތައް ރައްޔިތުންގެ މަޖިލީހަށް ހާޒިރުކުރުމަށް، މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ހުށަހަޅުއްވައިފި އެވެ.
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް މެންބަރު ފޮނުއްވި ސިޓީގައި ބުނީ ޗައިލްޑް އެންޑް ފެމިލީ ޕްރޮޓެކްޝަން ސަރވިސް އިން ޝާއިއުކުރާ ކުޑަކުދިންނަށް ޖިންސީ ގޯނާ ކުރާ މީހުންގެ ދަފްތަރުގައި ހިމެނޭ 20 މީހަކު ގޭބަންދުގައި މިވަގުތު ތިބިކަން ފާހަގަކުރެވިފައިވާ ކަމަށެވެ. މިއީ ކުޑަކުދިންގެ ރައްކާތެރިކަމާ ގުޅިފައިވާ ރައްޔިތުންގެ ކަންބޮޑުވުން އޮތް މައްސަލައެއް ކަމުން މިކަމުގެ ތަފްސީލް މައުލޫމާތު މަޖިލީހުން ހޯދައި، އެޅެން ހުރި ފިޔަވަޅުތައް އަޅަން ޖެހޭނެ ކަމަށް ދެކެވަޑައިގަންނަވާ ކަމަށް ވެސް ބުނެފައިވެ އެވެ.
ސިޓީގައި ބުނީ ކުޑަކުދިންނަށް ޖިންސީ ގޯނާކުރާ މީހުންނާ މެދު ޚާއްސަ އުސޫލުތަކަކަށް އަމަލުކުރުމުގެ ގާނޫނުގެ 50 ވަނަ މާއްދާގައިވާ ގޮތުން އެ ގާނޫނުގެ ދަށުން ބަންދުގައި ހުންނަ މީހާގެ މައްޗަށް ކަފާލާތުގެ އުސޫލެއް ނުވަތަ ޕެރޯލްގެ އުސޫލެއް ވެސް ނުހިނގާނެ ކަމަށް ބަޔާންކޮށްފައިވާ ކަމަށެވެ. އަދި ދިވެހިރާއްޖޭގެ ޖަލުތަކާއި ޕެރޯލްގެ ގާނޫނުގެ 132 ވަނަ މާއްދާގެ (ށ) ގައި ކުޑަކުދިންނަށް ޖިންސީ ގޯނާކުރުމުގެ ކުށުގެ ހުކުމް ތަންފީޒުކުރަމުންދާ މީހަކަށް ޕެރޯލްގެ ފުރުސަތެއް ނުލިބޭނެ ކަމަށް ވެސް ބަޔާން ކޮށްފައިވާ ކަމަށް ސިޓީގައިވެ އެވެ.
މި ގާނޫނުތަކުގެ މަގްސަދަކީ މިފަދަ ކުށްވެރިން ހުކުމް ފުރިހަމަވަންދެން ޖަލުގައި ބައިތިއްބައި، ކުޑަކުދިން މިފަދަ ކުށްވެރިންގެ ކިބައިން ރައްކާތެރި ކުރުން ކަން ފާހަގަކޮށް ސިޓީގައި ބުނީ މިފަދަ މީހުން ހުކުމުގެ މުއްދަތުގައި ޖަލުން ގޭބަންދަށް ބަދަލުކުރެވިފައި ވަނީ ކޮން ގޮތަކަށްތޯ ސާފުކުރުމަށް ބޭނުންވާ ކަމަށެވެ.
ސާފުކުރަން ބޭނުންވާ ކަންކަން މެންބަރުގެ ސިޓީގައި ފާހަގަކޮށްފައިވެ އެވެ. އެގޮތުން ގޭބަންދުގައި ތިބި މީހުން ބަދަލު ކޮށްފައި ވަނީ ކޮން ގާނޫނެއް ނުވަތަ ގަވާއިދެއްގެ ދަށުން، ކާކުގެ ނިންމުމަކުން ތޯ މެންބަރު ސުވާލު ކުރައްވާފައިވެ އެވެ. އަދި ގޭބަންދުގައި ތިބުމަށް އެ މީހުންނަށް ކަނޑައަޅާފައިވާ ޝަރުތުތަކަކީ ކޮބައިތޯ އާއި، އެ ޝަރުތުތަކަކށް އަމަލުކުރޭ ތޯ ބަލަހައްޓަމުން ދަނީ ކޮން ފަރާތަކުންތޯ ސާފުކުރުމާއި، މި މީހުން ތިބި ގޭގެ އާއި ރަށްރަށުގައި ކުޑަކުދިން ރައްކާތެރި ކުރުމަށް އަޅާފައިވާ ފިޔަވަޅުތައް ސާފުކުރުމަށް ވެސް ހުށަހަޅާފައިވެ އެވެ.
އޭގެ އިތުރުން އެ މީހުން ގޭބަންދަށް ބަދަލުކުރެވިފައިވާ ރަށްރަށުގެ ކައުންސިލާއި އެކަމާ ގުޅުން ހުރި ބެލެނިވެރިންނަށް މިކަން އަންގާފައިވޭތޯ އާއި އެ މީހުންގެ ފައިގައި ޓެގް އަޅައިގެން އެ މީހުން ހުރި ތަން ބަލަހައްޓާ ނިޒާމެއް އޮވޭތޯ ބެލުމާއި، ނުވަތަ އެކަމަށް މިނިސްޓްރީ އިން ގެންގުޅޭ ސިޔާސަތަކީ ކޮބައިތޯ ސާފުކުރުމުގެ އިތުރުން މި މީހުން އަނބުރާ ޖަލަށް ގެންދިއުމަށް މިނިސްޓްރީ އިން ކުރާނެ ކަންކަމަކީ ކޮބައިތޯ ސާފުކުރުމަށް ވެސް މެންބަރު ވަނީ ހުށަހަޅުއްވާފަ އެވެ.
މެންބަރު ވިދާޅުވީ މި މައްސަލައަކީ ކުޑަކުދިންގެ ރައްކާތެރިކަމާ ގުޅިގެފައިވާ ނާޒުކު ކަމަކަށް ވާތީ މިކަމަށް އަވަސް އަދި ހަރުދަނާ ހައްލެއް ހޯދައިދިނުމަށް އެދޭ ކަމަށެވެ. އެހެންކަމުން އެކަމުގެ ގާނޫނީ ޒިންމާ އޮތް ފަރާތްތައް މަޖިލީހުގެ ކަމާގުޅޭ ކޮމިޓީ އަށް ހާޒިރުކުރުމަށް އެދި، މިހާރު ގޭބަންދުގައި ތިބި މީހުންގެ ތަފްސީލް ވެސް މެންބަރު ވަނީ އެ ސިޓީ އާއެކު ހުށަހަޅުއްވާފަ އެވެ.











