ވޯލްޑް ކަޕްގައި ކެނެޑާގެ ތާރީޚީ ދަތުރަށް ބޮޑު ވަޒީރު ކާނީގެ ތައުރީފު

ފީފާ ވޯލްޑް ކަޕްގައި ކެނެޑާގެ ޤައުމީ ޓީމުން ދެއްކި ކުޅުމާއި، އެ ޓީމުގެ ތާރީޚީ ދަތުރަށް އެ ޤައުމުގެ ބޮޑު ވަޒީރު މާކް ކާނީ ތައުރީފު ކުރައްވައިފި އެވެ. 

މުބާރާތުގެ ގަދަ 16 ގައި މޮރޮކޯ އަތުން ބަލިވެ މުބާރާތުން ކެނެޑާ ކެޓި ނަމަވެސް، ބޮޑު ވަޒީރު ކާނީ ވަނީ އެ ޓީމުގެ ކުޅުންތެރިން ޤައުމަށް ގެނެސްދިން ފަޚުރާއި ހިތްވަރަށް ޝުކުރު އަދާ ކުރައްވައިފަ އެވެ. 

ބޮޑު ވަޒީރުގެ ރަސްމީ އެކްސް އެކައުންޓުން އާންމު ކުރި ވީޑިއޯ މެސެޖެއްގައި ވިދާޅުވީ، ކެނެޑާގެ ޤައުމީ ޓީމުން ދެއްކި ކުޅުމާ އެކު، ކެނެޑާ އަކީ ފުޓުބޯޅައިގެ ޤައުމެއްކަން މުޅި ދުނިޔެ އަށް ސާބިތު ކޮށްދީފައިވާ ކަމަށެވެ. ކެނެޑާގެ ޓީމުން ހޯދި ތާރީޚީ ކުރިއެރުމަށް މަރުޙަބާ ވިދާޅުވެ، ކުޅުންތެރިން ތިބީ ވަރަށް ސާބިތުކަމާ އެކު ކަމަށް ބޮޑު ވަޒީރު ކާނީ ފާހަގަ ކުރެއްވި އެވެ. 

މިފަހަރުގެ މުބާރާތުގެ ގުރޫޕް ސްޓޭޖުގައި ކެނެޑާ އިން ކުޅުނު ފުރަތަމަ މެޗުގައި ވަނީ ބޮސްނިއާއާ އެއްވަރު ކޮށްފައި އެވެ. ދެ ވަނަ މެޗުގައި ވަނީ ޤަތަރު އަތުން ހަ ލަނޑުގެ ބޮޑު މޮޅެއް ހޯދައިފަ އެވެ. ފަހު މެޗުގައި ސްވިޒަލެންޑު އަތުން ބަލިވި ނަމަވެސް، ކެނެޑާ އަަށް ވަނީ ގަދަ 32 އިން ޖާގަ ލިބިފައި އެވެ. މިއީ ކެނެޑާ އިން ވޯލްޑް ކަޕްގެ ނޮކްއައުޓް ބުރުން ޖާގަ ހޯދި ފުރަތަމަ ފަހަރެވެ. ގަދަ 32 ގެ ބުރުގައި ކެނެޑާ އިން ވަނީ ދެކުނު އެފްރިކާ ބަލިކޮށް، ގަދަ 16 އިން ތާރީޚީ ޖާގަ ހޯދައިފަ އެވެ. 

ކެނެޑާ އަކީ މިފަހަރުގެ ވޯލްޑް ކަޕް ހޯސްޓު ކުރާ ތިން ޤައުމުގެ ތެރެއިން އެއް ޤައުމަށްވާއިރު، ބޮޑު ވަޒީރު ކާނީ ވިދާޅުވީ ކެނެޑާގެ ރައްޔިތެއްގެ ހައިސިއްޔަތުން މުޅި ޤައުމުގެ ނަމުގައި ޓީމަށް ޝުކުރު އަދާ ކުރާ ކަަމަށެވެ. އަދި އަމިއްލަ ޤައުމީ، އާއިލާ އަދި ރަޙުމަތްތެރިން ތަމްސީލު ކުރުމުގައި ކުޅުންތެރިން ކުރި ބުރަ މަސައްކަތާއި، ދެއްކި ހިތްވަރަށް ވެސް ބޮޑު ވަޒީރު ކާނީ ޝުކުރު އަދާ ކުރެއްވި އެވެ. 

މޮރޮކޯ އަތުން ބަލިވެ މުބާރާތުން ކެޓި ނަމަވެސް، ކެނެޑާގެ ކޯޗު ޖެސީ މާޝް ވެސް ވަނީ ޓީމަށް ތައުރީފު ކޮށްފައި އެވެ. އޭނާ ބުނެފައި ވަނީ އެ މެޗުގައި މޮރޮކޯ އަށް ވުރެ ރަނގަޅަށް ކުޅުނީ ކެެނެޑާ އިން ކަމަށެވެ. އަދި ކުޅުންތެރިން ދެއްކި ހިތްވަރާއި، ކުޅުމާ މެދު އިންތިހާ އަށް ފަޚުރުވެރިވާ ކަމަށް ވެސް އޭނާ ބުނެފައިވެ އެވެ.