ބެލިންހަމް އާއި ކޭންގެ ލަނޑުން މޮޅުވެ، އިންގްލެންޑު ކުއާޓާ ފައިނަލް އަށް

މިހާރު ކުރިއަށްދާ ފީފާ ވޯލްޑް ކަޕްގެ ގަދަ 16 ގައި މެކްސިކޯއާ ދެކޮޅަށް ކުޅުނު މެޗުން މޮޅުވެ، އިންގްލެންޑުން މުބާރާތުގެ ކުއާޓާ ފައިނަލްގެ ޖާގަ ހޯދައިފި އެވެ.

ހޯމަ ދުވަހުގެ ހެނދުނު ކުޅުނު މެޗު އިންގްލެންޑުން ކާމިޔާބު ކުރީ 3-2 އިންނެވެ. ދެ ޓީމުގެ ފަރާތުން ވެސް މެޗުގައި ވަނީ ވާދަވެރި ކުޅުމެއް ފެނިފައި އެވެ.

މެޗުގެ ފުރަތަމަ ހާފުގެ 36 ވަނަ މިނެޓުގައި އިންގްލެންޑަށް ލީޑު ނަގައިދިނީ ޖޫޑް ބެލިންހަމް އެވެ. އެއީ ބުކަޔޯ ސަކާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ދެ މިނެޓު ފަހުން ބެލިންހަމް ވަނީ ދެ ވަނަ ލަނޑެއް ޖަހައި އިންގްލެންޑުގެ ލީޑު ފުޅާ ކޮށްފައި އެވެ. އެއީ ކެޕްޓަން ހެރީ ކޭން ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. 

ނަމަވެސް ފުރަތަމަ ހާފުގެ 42 ވަނަ މިނެޓުގައި ހޫލިއަން ކުއިނޯންސް ވަނީ ލަނޑު ޖަހައި މެކްސިކޯ އަށް އުންމީދެއް ހޯދައި ދީފައި އެވެ. މެޗުގެ ދެ ވަނަ ހާފު ފަށަައިގެން ކުރީ ކޮޅު އިންގްލެންޑުގެ ޖަރަލް ކުއަންސާ އަށް ސީދާ ރަތް ކާޑު ދެއްކުމުން، އެ ޓީމުން މެޗުގެ ބާކީ ބައި ކުޅުނީ އެއް ކުޅުންތެރިޔަކު މަދުކޮށެވެ. 

މެޗުގެ 60 ވަނަ މިނެޓުގައި އިންގްލެންޑަށް ލިބުނު ޕެނަލްޓީ ކާމިޔާބުކޮށް، އެ ޓީމުގެ ތިން ވަނަ ލަނޑު ޖެހީ ކޭން އެވެ. އޭގެ ނުވަ މިނެޓު ފަހުން މެކްސިކޯގެ ދެ ވަނަ ލަނޑު ރައުލް ހިމިނޭޒް ޖެހީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ. މެޗުގެ ނަތީޖާ ހަމަހަމަ ކުރުމަށް މެކްސިކޯ އިން މަސައްކަތް ކުރި ނަމަވެސް، އެކަން ކާމިޔާބު ނުވެ މުބާރާތުން ކެޓީ އެވެ. 

މުބާރާތުގެ ކުއާޓާ ފައިނަލްގައި އިންގްލެންޑް ނިކުންނާނީ ނޯވޭއާ ދެކޮޅަށެވެ. ނޯވޭ އިން ވަނީ ގަދަ 16 ގައި މުބާރާތުގެ އެންމެ ކާމިޔާބު ޓީމު ކަމަށްވާ ބްރެޒިލް ބަލިކޮށްފައި އެވެ.