މެކްސިކޯގެ އުސް މިނަށް ފިޓުވުމަކީ ކުރެވޭނެ ކަމެއް ނޫން: ޓުޗެލް

ފީފާ ވޯލްޑް ކަޕްގެ ގަދަ 16 ގައި މެކްސިކޯއާ ދެކޮޅަށް ނިކުންނައިރު، މެކްސިކޯގެ އުސް މިނަށް ފިޓުވުމަކީ އިންގްލެންޑަށް ކުރެވޭނެ ކަމެއް ނޫން ކަމަށް އެ ޓީމުގެ ކޯޗު ތޯމަސް ޓުޗެލް ބުނެފި އެވެ. 

މެކްސިކޯ ސިޓީ ސްޓޭޑިއަމްގައި އިންގްލެންޑުން އެ ޓީމާ ދެކޮޅަށް ނިކުންނައިރު، މި ސްޓޭޑިއަމްގައި މެކްސިކޯ އިން ވަނީ މިހާތަނަށް ތިން މެޗު ކުޅެފައި އެވެ. މިއީ 2240 މީޓަރު ލެވެލް އަށް ވުރެ މަތީގައި އޮންނަ ތަނެކެވެ. މުބާރާތުގައި އިންގްލެންޑުން ކޭމްޕު ކޮށްފައި ވަނީ އެމެރިކާގެ ކެންސަސް ސިޓީގައި އެވެ.

ޓުޗެލް ބުނީ އިންގްލެންޑުން ކުރަން ޖެހޭ ދަތުރަށް ބަލާއިރު، އުސް މިނަށް ފިޓުވުމަކީ އެ ޓީމަށް ކުރެވޭނެ ކަމެއް ނޫން ކަމަށެވެ. މެކްސިކޯއާ ދެކޮޅަށް ކުޅުމަށް މިހާރު އިންގްލެންޑުން ވަނީ އެ ޤައުމަށް ގޮސްފައި އެވެ. 

ޓުޗެލް ބުނީ މެކްސިކޯއާ ދެކޮޅަށް ގަދަ 16 ގައި ކުޅޭ މެޗަކީ، މުބާރާތުގެ އެންމެ މުހިންމު މެޗު ކަމަށެވެ. މެޗު ކުޅޭ ދަނޑުގައި އިންގްލެންޑަށް ގިނަ ގޮންޖެހުން ތަކެއް، ނުވަތަ ދަތި ތަކެއް ދިމާވާނެކަން ފާހަގަކޮށް ޓުޗެލް ބުނީ، އެންމެ ބޮޑު ގޮންޖެހުމަކަށް ވާނީ އުސް މިން ކަމަށެވެ. ޓުޗެލް ބުނީ ހަތަރު ދުވަހުގެ ތެރޭގައި އުސް މިނަށް ފިޓުވުމަކީ ކުރެވޭނެ ކަމެއް ނޫން ކަމަށެވެ. 

އެހެން ނަމަވެސް، އެ ހުރިހާ ޙާލަތަކަށް ވެސް އިންގްލެންޑު ތައްޔާރު ކަމަށާއި، އުނދަގޫ ހާލަތެއް އޮތް ނަމަވެސް އިންގްލެންޑުން ޖަވާބު ހޯދާނެ ކަމަށް އޭނާ ބުންޏެވެ. ޓުޗެލް ބުނީ އިންގްލެންޑުން އެ މެޗަށް ތައްޔާރުވާނީ ދިމާވާނެ ދަތި ތަކާއި، އުނދަގޫތައް އިޙުސާސް ކުރެވިގެން ތިބެ ކަމަށެވެ. 

މީގެ ކުރިން ވެސް މުބާރާތުގައި އިންގްލެންޑަށް ބައެއް ކަހަކަ އުނދަގޫތައް ދިމާވި ކަމަށާއި، އެފަދަ ކަމެއް ތަކުރާރު ނުވާނެ ކަމަށް އުންމީދު ކުރާ ކަމަށް ޓުޗެލް ބުންޏެވެ. ޓީމުން ކުރާ ދަތުރަކީ އަމާން ދަތުރަަކަށް ވާނެ ކަމަށް އުންމީދު ކުރާ ކަމަށާއި، ޓީމު ތިބޭ ހޮޓެލް ބޭރުގައި އަޑު ގަދަވެ ނިދަން އުނދަގޫވާ ކަހަލަ ކަމެއް ދިމާ ނުވާނެ ކަމަށް އުންމީދު ކުރާ ކަމަށް ވެސް އޭނާ ބުންޏެވެ. 

މުބާރާތުގެ ގަދަ 16 ގައި މެކްސިކޯއާ ދެކޮޅަށް ނިކުންނައިރު، މުބާރާތުގައި ކުޅުނު ހަތަރު މެޗުގެ ތެރެއިން އިންގްލެންޑު މޮޅުވެފައި ވަނީ ތިން މެޗުންނެވެ. އަނެއް މެޗު ވަނީ އެއްވަރުވެފައި އެވެ. ނަމަވެސް، މެކްސިކޯ އިން ވަނީ މިހާތަނަށް ކުޅުނު ހަތަރު މެޗުން ވެސް މޮޅުވެފައި އެވެ.