މޮރޮކޯ އަށް ވުރެ ރަނގަޅަށް ކުޅުނީ ކެނެޑާ އިން، ޓީމާ މެދު ފަޚުރުވެރިވަން: ޖެސީ މާޝް

ފީފާ ވޯލްޑް ކަޕްގެ ގަދަ 16ގައި މޮރޮކޯއާ ދެކޮޅަށް ކުޅުނު މެޗުން ބަލިވި ނަމަވެސް، އެ މެޗުގައި ރަނގަޅަށް ކުޅުނީ ކެނެޑާ އިން ކަމަށާއި، ކެނެޑާގެ ކުޅުންތެރިންނާ މެދު ފަޚުރުވެރިވާ ކަމަށް އެ ޓީމުގެ ކޯޗު ޖެސީ މާޝް ބުނެފި އެވެ.

މުބާރާތުގެ ގަދަ 32 ގައި މޮރޮކޯއާ ދެކޮޅަށް ކުޅުނު މެޗުން ބަލިވެ ކެނެޑާ އަށް ވަނީ މުބާރާތް ނިމިފައި އެވެ. ކެނެޑާ އަކީ މިއަހަރުގެ ވޯލްޑް ކަޕް ބާއްވާ ތިން ޤައުމުގެ ތެރެއިން އެއް ޤައުމެވެ.

މޮރޮކޯ މެޗަށް ފަހު ނޫސްވެރިންނާ ވާހަކަ ދައްކަމުން މާޝް ބުނީ، ކެނެޑާގައި އޮތް ޓީމަކީ އެ ޤައުމުގެ ސަޕޯޓަރުން ފަޚުރުވެރިވާާނެ ޓީމެއް ކަމަށެވެ. އޭނާ ބުނީ ކެނެޑާ އިން ހަމައެކަނި ޑިފެންސް އަށް އިސްކަން ދިނުމުގެ ބަދަލުގައި، ހިތްވަރާ އެކު މަސައްކަތް ކުރާކަން ސާބިތު ކޮށްދީފައިވާ ކަމަށެވެ.

މިފަދަ މެޗު ތަކަށް ކެނެޑާ އިން ތައްޔާރުވުމުގައި އިތުރަށް ސަމާލުވާން ޖެހޭ ކަންތައް ތަކެއް ހުރި ކަމަށް މާޝް ޤަބޫލު ކުރެ އެވެ. ނަމަވެސް، ކެނެޑާގެ ޓީމާ އެކު އޭނާ އުފާކުރާ ކަމަށާއި، މޮރޮކޯ އަށް ވުރެ ވެސް ރަނގަޅަށް އެ މެޗުގައި ކުޅުނީ ކެނެޑާ އިން ކަމަށް މާޝް ވަނީ ބުނެފައި އެވެ. 

އެކަން ފާހަގަކޮށް މާޝް ބުނީ ކެނެޑާގެ ހުރިހާ ކުޅުންތެރިންނާ މެދު ވެސް އޭނާ ފަޚުރުވެރިވާ ކަމަށެވެ. މުބާރާތުން ކެޓުމުން ކެނެޑާގެ ކުޅުންތެރިން ތިބީ "ހިތްދަތި" ވެފައި ކަމަށާއި، ނަމަވެސް އެ ޓީމާ މެދު ފަޚުރުވެރިވުން ނޫން އެހެން ކަމެއް ނެތް ކަމަށް މާޝް ވަނީ ބުނެފައި އެވެ. 

މުބާރާތުގެ ގަދަ 16 އިން ބަލިވެ ކެނެޑާ ކެޓިއިރު، މިއީ ވޯލްޑް ކަޕްގައި އެ ޓީމުން ނެރުނު އެންމެ ރަނގަޅު ނަތީޖާ އެވެ. މީގެ ކުރިން ދެ ފަހަރު ވެސް ކެނެޑާ ވަނީ މުބާރާތުގެ ގުރޫޕް ސްޓޭޖް އިން ކަޓައިފަ އެވެ. އެއީ 1986 ވަަނަ އަހަރު މެކްސިކޯގައި އޮތް މުބާރާތާއި، 2022 ވަނަ އަަހަރު ޤަތަރުގައި އޮތް މުބާރާތުގައި އެވެ.