އިޒްރޭލް އާއި ލުބުނާންއާ ދެމެދު ޤާއިމު ކުރި އެއްބަސްވުމުގެ 14 ނުކުތާ އެމެރިކާ އިން ހާމަ ކޮށްފި

އިޒްރޭލް އާއި ލުބުނާންއާ ދެމެދު ހަމަލާ ބަދަލު ކުރުން ހުއްޓާލުމަށް އެއްބަސްވެފައިވާ 14 ނުކުތާގެ މައްޗަށް އެކުލެވޭ އޮނިގަނޑުގެ ތަފުސީލު އެމެރިކާގެ ސްޓޭޓް ޑިޕާޓްމަންޓް އިން އާންމު ކޮށްފި އެވެ.

މި އެއްބަސްވުމަކީ އެމެރިކާގެ ވޮޝިންޓަން ޑީސީގައި ދެ ގައުމުގެ މެދުގައި ކުރެވުނު މަޝްވަރާތަކަށް ފަހު އެކުލަވާލާފައިވާ އުސޫލު ތަކެކެވެ.

މި އޮނިގަނޑުގެ ދެވަނަ ނުކުތާގައި ބަޔާން ކޮށްފައިވާ ގޮތުން، އިޒްރޭލް އާއި ލުބުނާންގެ ސަރުކާރުން ވަނީ ތަރުތީބު ކުރެވިފައިވާ، ދެފަރާތުން އަމަލު ކުރަންޖެހޭ މަރުހަލާ ތަކަކަށް އެއްބަސްވެފައި އެވެ. މި މަރުހަލާ ތަކުގެ ދަށުން ލުބުނާންގެ މުޅި ސަރަހައްދުގެ މައްޗަށް އެ ގައުމުގެ އަސްކަރިއްޔާގެ ފުރިހަމަ ބާރާއި ސިޔާދަތީ ބާރު އަލުން ގާއިމު ކުރުމަށް ވަނީ ނިންމާފައި އެވެ.

އެމެރިކާ އިން އާންމުކުރި ލިޔުމުގައިވާ ގޮތުން، ލުބުނާންގެ އަސްކަރިއްޔާގެ ބާރު މުޅި ގައުމުގައި ފެތުރުމަށްޓަކައި، އެ ގައުމުގައި ހަރަކާތްތެރިވާތތރ ދައުލަތުގެ ބާރުގެ ދަށުގައި ނުވާ ހަތިޔާރު އެޅި ޖަމާއަތްތައް ނިގުޅައިގަނެ، އެ ފަރާތްތަކުގެ އަސްކަރީ އިންފްރާސްޓްރަކްޗަރުތައް ނައްތާލަން ޖެހެ އެވެ. މިކަންކަން ފުރިހަމަވަމުންދާ މިންވަރަކަށް ބަލައި، އިޒްރޭލްގެ ސިފައިން ލުބުނާންގެ ސަރަހައްދު ތަކުން މަޑު މަޑުން ފޭބުމަށް ވަނީ ހަމަޖެހިފައި އެވެ.

މި އެއްބަސްވުމުގެ ދަށުން ކުރިއަށްދާ ކަންކަން ކަށަވަރު ކުރުމަށްޓަކައި ޚާއްސަ ނިޒާމެއް ގާއިމު ކުރެވޭނެ ކަމަށް ވެސް އެ ލިޔުމުގައި ފާހަގަ ކޮށްފައިވެ އެވެ. މީގެ ބޭނުމަކީ ލުބުނާންގެ ދެކުނު ސަރަހައްދުގައި ހަމައެކަނި އެ ގައުމުގެ ރަސްމީ އަސްކަރިއްޔާގެ ބާރު އޮތްކަން ޔަގީން ކުރުމެވެ.

މި 14 ނުކުތާގެ މައްޗަށް އެކުލެވޭ އެއްބަސްވުމުގައި ހިމެނޭ އިތުރު ތަފްސީލުތައް ކުރިއަށް އޮތް ވަގުތު ތަކުގައި ހާމަ ކުރަމުންދާނެ ކަމަށް އެމެރިކާގެ ސްޓޭޓް ޑިޕާޓްމަންޓް އިން ވަނީ ބުނެފައި އެވެ. މި އެއްބަސްވުމަކީ މެދު އިރުމަތީގައި މިހާރު ހިނގަމުންދާ ހަމަނުޖެހުން ތަކަށް ހައްލެއް ހޯދުމަށް ބައިނަލްއަގުވާމީ މުޖުތަމައުން ކުރަމުންދާ މަސައްކަތުގެ ތެރެއިން އެޅުނު މުހިންމު ފިޔަވަޅެއްގެ ގޮތުގައި ވަނީ ބެލެވިފައި އެވެ.