ލުބުނާނުގެ އެއްބަސްވުމަށް ހުރަސް އަޅަން އީރާނުން ހަމަލާއެއް ދީފި ނަމަ ވަރުގަދަ ރައްދެއް ދޭނަން: އިސްރާއީލު
މި އެއްބަސްވުމަކީ އީރާނުގެ މަސްލަހަތު އޮންނަ ޖަމާއަތްތަކަށް ލިބުނު އިސްތިރާތީޖީ ނާކާމިޔާބީއެއްގެ ގޮތުގައި އޭނާ ސިފަކުރެއްވި. އެހެންކަމުން، އީރާނުން މި އެއްބަސްވުން މުގުރާލަން މަސައްކަތް ކޮށްފާނެ ކަމަށް ބަލައި، އިސްރާއީލުން ވަނީ ދިފާއީ ތައްޔާރީތައް އިތުރަށް ވަރުގަދަކޮށްފައި.
އިސްރާއީލުގެ ދިފާއީ ވަޒީރު އިސްރާއީލް ކަޓްޒް | ރޮއިޓާސް
ލުބުނާނާއެކު ގާއިމުކޮށްފައިވާ ސުލްހައިގެ އެއްބަސްވުން ތަންފީޒުކުރުމަށް ހުރަސްއެޅުމުގެ ގޮތުން އީރާނުން އިސްރާއީލަށް ހަމަލާއެއް ދީފިނަމަ، ވަރުގަދަ ރައްދު ހަމަލާއެއް ދޭނެ ކަމުގެ އިންޒާރު އިސްރާއީލުގެ ދިފާއީ ވަޒީރު ހޮނިހިރު ދުވަހު ދެއްވައިފި އެވެ.
އިސްރާއީލާއި ލުބުނާނާ ދެމެދުގައި ސުލްހަ ގާއިމުކުރުމަށް ވެފައިވާ މި އެއްބަސްވުމަށް އީރާނުން ހުރަސްއަޅަން މަސައްކަތް ކޮށްފާނެ ކަމަށް ބަލައި، އިސްރާއީލުން ވަނީ އެގައުމުގެ ދިފާއީ ތައްޔާރީތައް ވަރުގަދަކޮށްފަ އެވެ.
ވީޑިއޯ މެދުވެރިކޮށް ދެއްވި ބަޔާނެއްގައި އިސްރާއީލުގެ ދިފާއީ ވަޒީރު އިސްރާއީލް ކަޓްޒް ވިދާޅުވީ، ލުބުނާނާއެކު ވެފައިވާ އެއްބަސްވުން ތަންފީޒުކުރުމަށް ހުރަސްއެޅުމުގެ ގޮތުން އީރާނުން އިސްރާއީލަށް ހަމަލާދޭން މަސައްކަތް ކޮށްފިނަމަ، އެގައުމާ ދެކޮޅަށް ވަރަށް ވަރުގަދަ ފިޔަވަޅުތަކެއް އަޅާނެ ކަމަށެވެ. މީގެ އިތުރުން، ލުބުނާނާއެކު ވެވުނު މި އެއްބަސްވުމަކީ އީރާނުގެ މަސްލަހަތު އޮންނަ ގްރޫޕްތަކަށް ނުވަތަ "އީރާނިއަން އެކްސިސް" އަށް ލިބުނު ވަރުގަދަ "ސްޓްރެޓީޖިކް" ނުވަތަ އިސްތިރާތީޖީ ހީނަރުކަމެއްގެ ގޮތުގައި ކަޓްޒް ސިފަކުރެއްވި އެވެ.
މަސްދަރު: އޭއެފްޕީ
