ހުރްމުޒް ކަނޑުއޮޅި އަލުން ހުޅުވާލުމުގެ ފުރިހަމަ ބާރު އޮތީ ހަމައެކަނި އީރާނަށް: ޚާރިޖީ ވަޒީރު އަރާގްޗީ

ތެހެރާނާއި ވޮޝިންޓަނާ ދެމެދު ސޮއިކޮށްފައިވާ ފަހުމުނާމާ (އެމް.އޯ.ޔޫ) ގެ ދަށުން، ހުރްމުޒް ކަނޑުއޮޅި އަލުން ހުޅުވާލުމުގެ ފުރިހަމަ އިޚްތިޔާރު އޮތީ ހަމައެކަނި އީރާނަށް ކަމަށް އެ ގައުމުގެ ޚާރިޖީ ވަޒީރު އައްބާސް އަރާގްޗީ ވިދާޅުވެއްޖެ އެވެ. އަދި އެކަމުގެ ތެރެއަށް ބޭރުގެ އެއްވެސް ފަރާތަކުން ނުފޫޒު ފޯރުވަން މަސައްކަތް ކޮށްފިނަމަ، އެކަން އިތުރަށް ގޯސްވެގެންދާނެ ކަމުގެ އިންޒާރުވެސް އޭނާ ވަނީ ދެއްވާފަ އެވެ.

އަރާގްޗީ މިހެން ވިދާޅުވީ، އެމެރިކާ އާއި އިސްރާއީލުން އީރާނާ ދެކޮޅަށް ކުރި ޣައިރު ގާނޫނީ އުދުވާނީ ހަނގުރާމައަށްފަހު، އީރާނުގެ ބާރުގެ ދަށުގައި އޮތް ހުރްމުޒް ކަނޑުއޮޅީގެ މަސްރަހު އަނެއްކާވެސް ނުތަނަވަސްވެފައިވާ  ދަނޑިވަޅެއްގަ އެވެ. އޭނާ މި ވާހަކަފުޅު ދެއްކެވީ އާދިއްތަ ދުވަހު ބަޣުދާދުގައި އިރާގުގެ ޚާރިޖީ ވަޒީރު ފުއާދު ހުސައިންއާ އެކު ބޭއްވި ނޫސްވެރިންގެ ބައްދަލުވުމެއްގަ އެވެ.

ޚާރިޖީ ވަޒީރު ވިދާޅުވި ގޮތުގައި، ދެ ގައުމުގެ ދެމެދުގައި ވެފައިވާ ފަހުމުނާމާގައިވާ ގޮތުން، އީރާނުން ކަނޑައަޅާ އުސޫލުތަކެއްގެ ދަށުން އަދި އެ ގައުމުން ކުރިމަތިވެފައިވާ ހުރަސްތައް ނައްތާލުމަށްފަހު، 30 ދުވަހުގެ ތެރޭގައި އެ ކަނޑުއޮޅި ހަނގުރާމައިގެ ކުރިން އޮތް ހާލަތަށް ރުޖޫޢަވާނެ އެވެ.

މި އިންތިޒާމުތައް ތަންފީޒުކުރުމުގެ މަސައްކަތް މިހާރު ކުރިއަށްދާ ކަމަށާއި، އެކަމުގެ ފުރިހަމަ ޒިންމާ އުފުލާނީ އީރާނުން ކަމަށް އަރާގްޗީ ވިދާޅުވި އެވެ. އަދި މިކަމުގެ ތެރެއަށް ވަދެގަނެ، އީރާނުން ކުރަމުންދާ މަސައްކަތްތަކާ ތަފާތު އާ އިންތިޒާމުތަކެއް ހަމަޖައްސަން އުޅުމަކީ ހުރްމުޒް ކަނޑުއޮޅި ހުޅުވުން ލަސްވެ، މަސްރަހު އިތުރަށް ގޯސްވާނެ ކަމެއް ކަމަށްވެސް އޭނާ ފާހަގަކުރެއްވި އެވެ.

ހުރްމުޒް ކަނޑުއޮޅީގައި އުފެދިފައިވާ އާ ނުތަނަވަސްކަމަށް އިޝާރާތް ކުރައްވައި، އީރާނުގެ އެންމެ އިސް ޑިޕްލޮމެޓް ވަނީ އެ ސަރަހައްދު ހުޅުވުމަށް އީރާނުން ކުރަމުންދާ މަސައްކަތްތަކަށް އެއްވެސް ފަރާތަކުން ހުރަސް ނޭޅުމަށް ގޮވާލައްވާފަ އެވެ. އަދި ދެ ގައުމުގެ ދެމެދުގައިވާ ފަހުމުނާމާ އޭގެ އަސްލު މަގްސަދުން ބޭރުނުވާނެކަން ކަށަވަރުކުރުމަށްވެސް އޭނާ އެދިވަޑައިގަތެވެ.

ދުނިޔޭގެ ތެލުގެ ބޭނުންތަކުގެ ފަސްބައިކުޅަ އެއްބައި އުފުލާ ހުރްމުޒް ކަނޑުއޮޅީގެ ދަތުރުފަތުރުތައް އީރާނުން ހިފަހައްޓާފައިވަނީ، މިދިޔަ ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިސްރާއީލުން އެ ގައުމަށް ދޭން ފެށި އުދުވާނީ ހަމަލާތަކާ ގުޅިގެންނެވެ. މި ހަމަލާތައް ހުއްޓުމަކަށް އައީ އޭޕްރިލް މަހުގެ 8 ވަނަ ދުވަހު އިއުލާންކުރި ހަމަލާބަދަލުކުރުން ހުއްޓާލުމުގެ އެއްބަސްވުމާ އެކުގަ އެވެ.

ޕާކިސްތާނުން މެދުވެރިއެއްގެ ދައުރު އަދާކޮށްގެން، އީރާނާއި އެމެރިކާއާ ދެމެދު މިދިޔަ ޖުލައި މަހުގެ 17 ވަނަ ދުވަހު ސޮއިކުރި ފަހުމުނާމާގައި، ލުބުނާން ހިމެނޭހެން ހުރިހާ ފަރާތްތަކަކުން ހަނގުރާމަ ދާއިމީކޮށް ހުއްޓާލުމަށް ވަނީ އެއްބަސްވެފަ އެވެ. މީގެ އިތުރުން 30 ދުވަހުގެ ތެރޭގައި އީރާނަށް ކުރިމަތިކޮށްފައިވާ ކަނޑުގެ ބްލޮކޭޑް ނުވަތަ ބަންދު އުވާލައި، ހުރްމުޒް ކަނޑުއޮޅިން ވިޔަފާރި އުޅަނދުފަހަރަށް ދަތުރުކުރެވޭނެ މަގު ފަހިކޮށްދިނުމަށްވެސް އެ އެއްބަސްވުމުގައިވެ އެވެ.

މީގެ އިތުރުން، އިސްރާއީލުން ލުބުނާނަށް ދެމުންދާ ހަމަލާތައް އަދިވެސް ހުއްޓާނުލާ ކުރިއަށްގެންދާތީ އެކަމާ ހިތާމަކުރައްވާ ކަމަށް އަރާގްޗީ ވިދާޅުވި އެވެ. އަދި ވެފައިވާ އެއްބަސްވުމުގެ ދަށުން، ޒަޔަނިސްޓް އިސްރާއީލުގެ ހަމަލާތައް އެމެރިކާއިން ހުއްޓުވަންޖެހޭނެ ކަމަށްވެސް އޭނާ ވިދާޅުވި އެވެ.

އެމެރިކާ އާއި އިސްރާއީލުގެ ޣައިރު ގާނޫނީ އުދުވާނުގެ ޝިކާރައަކަށްވި އީރާނުގެ ރައްޔިތުންނާ މެދު އިރާގު ސަރުކާރާއި އެ ގައުމުގެ ރައްޔިތުން ބެހެއްޓި ގާތްކަމާއި ދެއްވި އެއްބާރުލުމަށްޓަކައި އަރާގްޗީ ވަނީ އިރާގަށް ޝުކުރު އަދާކުރައްވާފަ އެވެ.