ރައްޔިތުންގެ ޒާތީ މައުލޫމާތު ބެލެހެއްޓުމުގެ ބާރުވެރިކަން ވަޒީރަކަށް ނުވަތަ ސަރުކާރުގެ ނުފޫޒު އޮންނަ އެއްވެސް ބޭފުޅަކަށް ދީގެންނުވާނެ: މެންބަރު ދީދީ
6 ޖުލައި 2026 | ހޯމަ 08:53ޑިޖިޓަލް އައިޑެންޓިޓީ ބިލުގެ މަގުސަދު ރަނގަޅު ނަމަވެސް، ރައްޔިތުންގެ ޒާތީ މައުލޫމާތު ބެލެހެއްޓުމުގެ ބާރު ސިޔާސީ ނުފޫޒު އޮންނަ ވަޒީރަކަށް ނުވަތަ ސަރުކާރުގެ އިދާރާއަކަށް ދިނުމާމެދު މަރަދޫ ދާއިރާގެ މެންބަރު އަހުމަދު ދީދީ ވަނީ ކަންބޮޑުވުންފާޅު ކުރައްވާފައި. އެހެން ގައުމުތަކެކޭ އެއްފަދައިން މިފަދަ ނިޒާމުތައް ހިންގަންވާނީ ސިޔާސީ ނުފޫޒުން އެއްކިބާވެފައިވާ މިނިވަން މުއައްސަސާއަކުން ކަމަށާއި، މި ބިލު އިތުރަށް ދިރާސާކުރަން ޖެހޭ ކަމަށް އޭނާ ވިދާޅުވި. މަޖިލީހުން މިހާރު ވަނީ މި ބިލު ބަލައިގަނެ، ދިރާސާކުރުމަށް ކޮމިޓީއަށް ފޮނުވާފައި.
ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި، މަރަދޫ ދާއިރާގެ މެންބަރު އަހުމަދު ދީދީ ވާހަކަ ދައްކަވަނީ. | ރާއްޖެއެމްވީ
ރައްޔިތުންގެ ޒާތީ މައުލޫމާތު ބެލެހެއްޓުމުގެ ބާރުވެރިކަން ވަޒީރަކަށް ނުވަތަ ސަރުކާރުގެ ނުފޫޒު އޮންނަ އެއްވެސް ބޭފުޅަކަށް ދީގެންނުވާނެ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެ އެވެ.
ހޯމަ ދުވަހުގެ މަޖިލިސް ޖަލްސާގައި މެންބަރު އަހުމަދު ދީދީ ވިދާޅުވީ، ޑިޖިޓަލް އައިޑެންޓިޓީގެ ބިލު މުހިންމު ކަމަށާއި، ބިލުގެ މަގުސަދު ރަނގަޅު ކަމަށެވެ.
ނަމަވެސް މިސަރުކާރުގެ މަގުސަދާމެދު ސުވާލު އުފެދޭ ކަމަށާއި، ރައްޔިތުންގެ ޒާތީ މައުލޫމާތު ބެލެހެއްޓުމަށް ބޮޑެތި ގާނޫނީ ބާރުތަކެއް ހޯމް މިނިސްޓްރީގެ ދަށުން ހިންގާ "މޯލްޑިވްސް ޑިޖިޓަލް ސާވިސް" އަށް ދިނުމުން ކަންބޮޑުވުންތަކެއް އެބަހުރި ކަމަށެވެ. އަދި ބެލެނިވެރި ފަރާތަކަށް ހޯމް މިނިސްޓަރަށްވާތީ ސުވާލު އުފެދޭ ކަމަށް އޭނާ ވިދާޅުވި އެވެ.
ދިވެހި ހުރިހާ ރައްޔިތުންގެ މައުލޫމާތެއް ޓްރެކްކޮށް، ބޭނުން ގޮތަކަށް ބެލޭގޮތަށް ބާރުވެރިކަން ސިޔާސީ ނުފޫޒު އޮންނަ އެއްވެސް ބޭފުޅަކަށް ލިބިގެން ނުވާނެކަން ފާހަގަކުރައްވައި މެންބަރު އަހުމަދު ދީދީ ވިދާޅުވީ، މިކަމާއި ގުޅޭގޮތުން ކަމާބެހޭ އެހެން ފަރާތްތަކާއެކު މަޝްވަރާ ކުރަން ޖެހޭ ކަމަށާއި، އިތުރު ދިރާސާތައް ހަދަން ޖެހޭ ކަމަށެވެ. މިއީ ވަރަށް ޓެކްނިކަލް ކަންތައްތައް ހިމެނޭ ބިލެއް ކަމަށް އޭނާ ވިދާޅުވި އެވެ.
މީގެ އިތުރުން މެންބަރު އަހުމަދު ދީދީ ވިދާޅުވީ ދުނިޔޭގެ އެހެން ގައުމުތަކުގައި ވެސް މިފަދަ ގާނޫނުތައް ތަންފީޒު ކުރާ ކަމަށާއި، ނަމަވެސް ހަވާލުކުރަނީ ސިޔާސީ ނުފޫޒުން އެއްކިބާވެފައި އޮންނަ އޮތޯރިޓީއަކަށް ނުވަތަ މިނިވަން މުއައްސަސާއަކަށް ކަމަށެވެ. އަދި އެގޮތަށް ރާއްޖޭގައި ވެސް އަމަލު ކުރަން ޖެހޭ ކަމަށް މެންބަރު އަހުމަދު ދީދީ ވިދާޅުވި އެވެ.
މި ބިލު ފަރުމާކުރެވިފައި އޮތް ގޮތުން މި ހުރިހާ ކަމެއް، ޑިޖިޓަލް އައިޑެންޓިޓީ ވެސް އަދި މޯލްޑިވްސް 2.0 ގައި މި ބޭފުޅުން ހުށަހަޅާ ކަންތައްތައް ވެސް ހުރިހާ ކަމެއްގެ ބެލެނިވެރިޔަކަށް މި ވަނީ ހޯމް މިނިސްޓަރު. ނޫނީ ދައުލަތުގެ ސަރުކާރުން ކަނޑައަޅާ މިނިސްޓްރީއެއްގެ އަތްދަށަށް މި ދަނީ. އޭގެ ސަބަބުން ރައްޔިތުންނަށް އެ ރައްކާތެރިކަން އޮންނާނެކަމާ މެދު ވަރަށް ގިނަ ބަޔަކު އެބަ ސުވާލުއުފައްދާ. ސަބަބަކީ ވަރަށް ގިނަ ފަހަރު، ޚާއްސަކޮށް މި ސަރުކާރުގެ މިކަހަލަ ކަންތައްތައް، ވަޒީރުންނާ ހަވާލުކުރެވިފައި އޮންނަ ކަންތައްތަކުގެ ނާޖާއިޒު ބޭނުންކޮށްގެން ޕާޓީއަށް ނޫނީ ސަރުކާރުން ބޭނުންވާ މަގުސަދުތައް ހާސިލުކުރުމަށް މަސައްކަތްކޮށްފައި މީގެކުރިންވެސް ވާތީ. އެހެންވީމާ، ކޮމިޓީގެ މަރުހަލާގައި ވެސް މި ކަންތައްތަކަށް ބަލައި، މީގެ ބެލެނިވެރިޔަކަށް އިންޑިޕެންޑެންޓް ބޮޑީއަކަށް ހިންގާ ވަކި އިދާރާއަކަށް ދިނުމަކީ ވަރަށް މުހިންމު ކަމެއް ކަމުގައި އަޅުގަނޑު ދެކެން.ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ
ހޯމަ ދުވަހުގެ ޖަލްސާގައި މޯލްޑިވްސް 2.0 ޑިޖިޓަލް ޓްރާންސްފޮމޭޝަންގެ ބިލު ވަނީ 49 މެންބަރުންގެ ވޯޓާއެކު ބަލައިގަނެ ކޮމިޓީއަށް ފޮނުވާފަ އެވެ. މި ބިލު ދިރާސާކުރާނީ އިންފޮމޭޝަން ކޮމިއުނިކޭޝަން ޓެކްނޮލޮޖީ ކޮމިޓީންނެވެ.
ޑިޖިޓަލް ޓްރާންސްފޮމޭޝަން ބިލު ފަރުމާކޮށްފައިވާ ގޮތުން އެ މުއައްސަސާއަށް ފާރަވެރިވެ ޖަވާބުދާރީ ކުރުވުމުގައި މަޖިލީހުގެ މާ ބޮޑު ދައުރެއް ނެތެވެ. އެ ބިލުގައި ބުނެފައިވަނީ އެއީ ހޯމް މިނިސްޓްރީގެ ދަށުން ހިނގާ މުއައްސަސާއެއް ކަމަށާއި، އެ މުއައްސަސާގެ އެންމެހާ ކަންކަމަކާ ބެހޭގޮތުން މަޖިލީހަށް ޖަވާބުދާރީވާނީ ހޯމް މިނިސްޓަރު ކަމަށެވެ.
އެ ބިލު ގާނޫނަކަށް ވުމާއެކު 16 ޖެނުއަރީ 2026 ގައި އުފެއްދި މޯލްޑިވްސް ޑިޖިޓަލް ސާވިސްގެ ވެރިޔެއްގެ ގޮތުގައި ހުންނާނީ ކޮމިޝަނާ ފޯ ޑިޖިޓަލް ޓެކްނޮލޮޖީ އެވެ. ޑިޖިޓަލް ޓެކްނޮލޮޖީ ކޮމިޝަނަރު އައްޔަނުކުރުމާއި ވަކިކުރުމުގެ ބާރު އޮތީ ރައީސްއަށެވެ. އަދި އޭނާ ޖަވާބުދާރީވާން ޖެހެނީ ހޯމް މިނިސްޓަރާއި ރައީސްއަށެވެ.
