މި ސަރުކާރުން ވަނީ ރާއްޖޭގެ ޒުވާން އާބާދީ ދުނިޔޭގެ ފަގީރު ގައުމުތަކުގައި އޮންނަ ''ބޮންޑަޑް ލޭބަރ'' ދަރަޖައަށް ވައްޓާލާފައި: މެންބަރު އަހުމަދު ދީދީ

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން ރާއްޖޭގެ ޒުވާން އާބާދީ ދުނިޔޭގެ ފަގީރު ގައުމުތަކުގައި އޮންނަ ''ބޮންޑަޑް ލޭބަރ''  ދަރަޖައަށް ވައްޓާލާފައިވާ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެ އެވެ.

ރާއްޖެޓީވީގެ ނޫނެކޭ ކެމްޕޭން ޕްރޮގްރާމްގައި މެންބަރު އަހުމަދު ދީދީ ވިދާޅުވީ ކުރިއަށް އޮތް އިންތިޚާބުތަކާ ދިމާކޮށް ގިނަ އަދަދެއްގެ ވަޒީފާތައް އިއުލާން ކޮށްފައިވާ ކަމަށެވެ. ގިނަ އަދަދެއްގެ ބަޔަކަށް ވަޒީފާ ދިން ނަމަވެސް ކުރާނެ މަސައްކަތެއް ނެތް ކަމަށާއި، ވަޒީފާ އަދާކުރަން ދާނެ ތަނެއް ވެސް ނެތް ކަމަށް އޭނާ ވިދާޅުވި އެވެ. އަދި ވިދާޅުވީ އެރަށެއްގެ އާބާދީގެ ބޮޑު ބަޔަކަށް ވަޒީފާތައް ބަހަމުން ދަނީ މުޅި ރަށް ސަރުކާރުން ކޮންޓްރޯލް ކުރުމުގެ މަގުސަދުގައި ކަމަށެވެ. 

މީގެ އިތުރުން މެންބަރު އަހުމަދު ދީދީ ވިދާޅުވީ، މިއަދުގެ ހާލަތު ވަރަށް ތަފާތު ކަމަށާއި، ސަރުކާރުގެ ނުފޫޒު ވަރަށް ބޮޑު ކަމަށެވެ. އަދި ވިދާޅުވީ ސަރުކާރާ ދެކޮޅަށް ކައުންސިލް އިންތިޚާބުގައި ވާދަކުރާ ދަރިފުޅުގެ ކެންޕޭންގައި ސަރުކާރުގައި ވަޒީފާގައި ހުންނަ މަންމަ އަށް ކެންޕޭން ކުރުމުގެ މިނިވަންކަން މިއަދު ނެތް ކަމަށެވެ.

ދެން ވަޒީފާތައް ބަހަމުންދާއިރު ވެސް، ވަޒީފާ އެއް ނެތް، ވަޒީފާގެ ބަޔާނެއް ނެތް، ވަޒީފާ އަދާކުރަން ދާންޖެހޭ ތަނެއް ނެތް. މިކަހަލަ ބައިވަރު މަގާމުތަކެއް އެބަދޭ. އަޅުގަނޑުމެންނަށް މިހާރު ގެޒެޓުން ބަލާލާއިރު އެބަފެނޭ 19 މާރިޗުގައި 20 މާރިޗަށް ޑިއުވާ އިއުލާންތައް. 20 މާޗަށް، 21 މާޗަށް، 50 މީހުން، 15 މީހުން، 20 މީހުން ނަގަން. އެއީ، ވަޒީފާ އެއީ ސަރުކާރަކުން ނޫނީ ސަރުކާރު ދައުލަތުން ހިންގާ ކުންފުންޏަކުން ވަޒީފާއަށް މީހުން ނަގަން އިއުލާންކުރާ ގޮތެއްތޯ. އެހެންވީމާ، މިހާ މި ލަދު ހަޔާތް ކުޑަގޮތެއްގައި އެ ބޭފުޅުން އެކަންތައް ކުރަމުން އެ ގެންދަނީ. ދެން ވަޒީފާތަކަށް ދާއިރު އެބަބުނޭ ތިމަންނަމެންގެ ކެންޑިޑޭޓް ނޮހަވާފިއްޔާ ވަޒީފާއިން ވަކިކުރާނަމޭ. އެ ދަރަޖައަށް އެދަނީ. އެހެންވީމާ، އަޅުގަނޑަށް ދެންނެވޭނީ، މިއީ ދުނިޔޭގެ ބައެއް ފަގީރު ގައުމުތަކުގައި އޮވެނޫންތޯ ބޮންޑަޑް ލޭބަރ، މުޅި ދިވެހިރާއްޖޭގެ ބައެއް ރަށްތަކުގައި މި އޮތް ޒުވާން އަބާދީ މި ފައްތާލަނީ އެދަރަޖައަށް. ވަޒީފާގެ ބިރުވެރިކަމުގައި ވަޒީފާއަށްޓަކައި މުޅި ދިރިއުޅުން ބަދަލުވެގެން އެދަނީ. އެހެންވީމާ، އެދަރަޖައަށް ދިވެހި ރައްޔިތުން ވެއްޓިގެންނުވާނެ.

ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ

ވަޒީފާގެ ނުފޫޒާއި، ބިރުވެރިކަން އިންތިހާއަށް އެބައޮތްކަން ފާހަގަކުރައްވައި މެންބަރު އަހުމަދު ދީދީ ވިދާޅުވީ މިއަދު ގިނަ ރައްޔިތުން ސަރުކާރުގެ މި މަޅީގައި ޖެހިފައިވާ ކަަމަށެވެ. މިކަން ބަދަލުކުރުމުގެ ބާރު މިއަދު ރައްޔިތުންގެ އަތުގައި އެބައޮތް ކަމަށާއި، އެމަގަށް މަސައްކަތް ކުރަން ޖެހޭ ކަމަށް އޭނާ ވިދާޅުވި އެވެ. އަދި ވިދާޅުވީ ވަޒީފާގެ ބިރު ނުދެއްކޭނެ ކަމަށެވެ.