ރައީސް މުއިއްޒު އެވެ. ރައްޔިތުންގެ އަޑު ނީވެނީ އޮފީހެއް ނެތިގެންތޯ އެވެ؟

2026 ވަނަ އަހަރަށް ރައްޔިތުންގެ މަޖިލީސް ހުޅުވުމަށް ބޭއްވި ޖަލްސާގައި އެންމެ ބާރަށް ރައީސް ޑރ.މުހައްމަދު މުއިއްޒު ދެއްކެވި ވާހަކަ އަކީ ރައޔްިތުންގެ އަޑު އެހުމުގެ ވާހަކަ އެވެ. ރައްޔިތުންނަށް އުއްމީދީ ގިނަ ކަންތައްތަކެއް ކޮށްދެއްވާނެ ކަމަށް އަމިއްލަ ފުޅު ބަސްމަގުން ވިދާޅުވި އެވެ. ރައްޔިތުންގެ ކަންބޮޑުވުންތަކަށް ހައްލު ހޯދާދެއްވާނެ ކަމަށް ވިދާޅުވި އެވެ. އަދި ރައްޔިތުންގެ  ޝަކުވާތައް ސީދާ ސަރުކާރަށް ހުށަހެޅޭނެ މަގު ފަހިކޮށްދެއްވާނެ ކަަމަށް ވިދާޅުވި އެވެ. 

’ސިޓިޒަންސް ކޮމްޕްލެއިންޓްސް ބިއުރޯ‘ އެއް ރައީސް އޮފީހުގައި ޤާއިމް ކުރައްވާނެ ކަމަށް ވައުދުވެވަޑައިގެން އެއީ ރައްޔިތުންގެ ޝަކުވާތައް ސަރުކާރަށް ފޯރުކޯށް ނުދެވުމުގެ ހައްލު ކަމަށް ސިފަކުރެއްވި އެވެ. ސުވާލަކީ ޝަކުވާތައް ސީދާ ސަރުކާރަށް ހުށަނޭޅިގެން އުޅެނީ އޮފީހެއް ނެތިގެން ތޯ އުފެދޭ ސުވާލެވެ.

މިހާރު ވެސް ރައީސުލްޖުމްހޫރިއްޔާގެ އޮފީހަށް ރައްޔިތުން ހުށަހަޅާ ސިޓީބިޓީ އަށް ޖަވާބެއް ނުލިބެ އެވެ. ރައީސް އާއި ކީއްކުރަންތޯ ވަޒީރަކާއި ބައްދަލުކުރުމަށް އެޕޮއިންޓްމެންޓަކަށް އެދުނަސް ގިނަ ފަހަރު ހަމަ ބަހަބަރެވެ. އެޕޮއިންޓްމެންޓެއް ލިބެނީ ދަމަކުން ބަޑި އެއް ޖަހާހެންނެވެ. މެއިލް އެއް ރައީސް އޮފީހަށް ފޮނުވިޔަސް އޭގެ މުއާލާތް ކެނޑޭ އިރު ވެސް ޖަވާބެއް ނުދެ އެވެ. މި ހުރިހާ ކަމެއް މިހެން ހިނގަނީ އޮފީހެއް ނެތީމަ ކަމަށް ވެދާނެ ނޫންތޯ އެވެ!

24 ގަޑިއިރު ޚިދުމަތްދޭ  އޮފީހެއް ގާއިމުކުރައްވާނެ ކަމަށް ރައީސް ވިދާޅުވެފައިވާ އިރު ރަސްމީ ގަޑީގައި ވެސް ސަރުކާރަށް އުޅެނީ ރައްޔިތުންނަށް ޚިދުމަތް ނުދެވިގެންނެވެ. ރައީސް ވިދާޅުވި ވާހަކަ އަށް ބަލާލާނަމެވެ. މި ބިއުރޯގެ މައިގަނޑު މަގްސަދަކީ ރައްޔިތުންނާ ވީހާވެސް ގާތުން މަސައްކަތް ކުރުން ކަމަށް ވިދާޅުވި އެވެ. ރައްޔިތުންގެ މަޖިލީހުގެ ފުރިހަމަ މެޖޯރިޓީ އޮތް އިރު ޕީއެންސީގެ ބައެއް މެމްބަރުންނަށް ރައްޔިތުންގެ އަރިހަށް ވަޑައިނުގެންނެވޭ ތަނުގައި ފޯނުކޯލަށް ވެސް ޖަވާބު ނުދެއްވެ އެވެ. އެހެންވީމަ ރައްޔިތުންނާއި ގާތުން މަސައްކަތް ކުރަން އޮފީހެއް ބޭނުންވެދާނެ އެވެ.

ކުރިއަށް އޮތް 5 މަސްދުވަހުގެ ތެރޭގައި ޚިދުމަތް ފެށުމަށް ތައްޔާރުވަމުންދާ އިރު މި ބުނާ ބިއުރޯއަކީ ސިޓީ، އީމެއިލް، ފޯނު، އަދި ސޯޝަލް މީޑިއާ ފަދަ ތަފާތު ވަސީލަތްތައް މެދުވެރިކޮށް ހުށަހަޅާ ޝަކުވާތައް ބަލައިގަންނަ ތަން ކަމަށް ވެސް ވިދާޅުވި އެވެ. އެހެންވީމަ ރައީސް އެ ވިދާޅުވާ ވާހަކަ އަކީ ބިއުރޯ އެއް ނެތިގެން ކުރިން ފޮނުވި ސިޓީ އާއި މެއިލް އަށް ޖަވާބު ނުދެވޭ ވާހަކަތޯއެވެ؟ އެހެންވީމަ ރައީސް އޮފީހުގެ ޒިންމާ އަދާ ނުކުރެވެނީތާ އެވެ!

މިކަން ވެސް ދާނީ މޯލްޑިވްްސް 2.0 ދިޔަ އުސޫލުންނެވެ. މޮޅު ހެޑްލައިންތައް ހަދާ ކުލަ ގަދަ ހަފްލާތައް ބާއްވާފައި ކަންކަން ދާނީ ތޮޅިއަށެވެ. ވާނެ ކަމަކީ އަނެއްކާ ވެސް މި އޮފީހަށް ވެސް އިތުރު ސިޔާސީ މުވައްޒަފުން ލުމާއި އިތުރު ވަޒީފާތަކެއް ބަހާލުމެވެ.