ރެފަރެންޑަމް އަކީ ރައްޔިތުންގެ ބޮލުގައި އަޅުވާފައި، ހަމައެކަނި ރައީސް މުއިއްޒު ބޭނުންފުޅު ވެގެން ނަގާ ވޯޓެއް: މެންބަރު އަހުމަދު ދީދީ
އިންތިޚާބުތައް އެއްކޮށްލުމަށް ބާއްވާ ރެފަރެންޑަމްއަކީ ރައްޔިތުންގެ ބާރުވެރިކަން ކަނޑުވާލުމަށް ސަރުކާރުން ކުރާ މަސައްކަތެއް ކަމަށް މެންބަރު އަހުމަދު ދީދީ ވިދާޅުވި. މި ބަދަލުގެ ސަބަބުން ގާނޫނީ ގޮތުން ގިނަ ސުވާލުތަކެއް އުފެދޭއިރު، އިންތިޚާބުތައް ވަކިން ބޭއްވުމަކީ ރައްޔިތުންގެ ޝަކުވާއެއް އޮތް ކަމެއް ނޫންކަން އޭނާ ފާހަގަކުރެއްވި. އެހެންކަމުން، ރަށްރަށުގެ ތަރައްގީއާއި ރައްޔިތުންގެ އަޑު އިއްވުމަށް އޮތް ފުރުސަތު ގެއްލިދާނެތީ މި ވޯޓާ ދެކޮޅަށް މަސައްކަތް ކުރުމަށް އޭނާ ގޮވާލެއްވި.
ނޫނެކޭ ކެންޕޭން ޕްރޮގްރާމްގައި ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވާހަކަ ދައްކަވަނީ | ރާއްޖެއެމްވީ
ކުރިއަށް އޮތް ލޯކަލް ކައުންސިލް އިންތިޚާބާއެކު ނަގާ ރެފަރެންޑަމް ވޯޓަކީ ރައްޔިތުންގެ ބޮލުގައި އަޅުވާފައި، ހަމައެކަނި ރައީސް ޑރ.މުހައްމަދު މުއިއްޒު ބޭނުންފުޅު ވެގެން ނަގާ މަކަރުވެރި ވޯޓެއް ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެ އެވެ.
ރާއްޖެޓީވީގެ ނޫނެކޭ ކެމްޕޭން ޕްރޮގްރާމްގައި މެންބަރު އަހުމަދު ދީދީ ވިދާޅުވީ، އެކި ދުވަސްތަކުގައި އިންތިޚާބު ބާއްވާތީ ރައްޔިތުން އެއްވެސް އިރެއްގައި ކަންބޮޑުނުވާ ކަމަށާއި، އެކަމުގެ ޝަކުވާއެއް ނުކުރާ ކަމަށެވެ.
ކައުންސިލް އިންތިޚާބާއެކު ނަގާ ރެފަރެންޑަމް ވޯޓަށް އިޝާރާތް ކުރައްވައި މެންބަރު އަހުމަދު ދީދީ ވިދާޅުވީ، މިއީ ރައްޔިތުންގެ ބޮލުގައި އަޅުވާފައި ނަގާ ވޯޓެއް ކަމަށާއި، ނަމަވެސް މި ވޯޓު ނަގަނީ ހަމައެކަނި ރައީސް މުއިއްޒު ބޭނުންފުޅު ވެގެން ކަމަށެވެ.
މީގެ އިތުރުން މެންބަރު އަހުމަދު ދީދީ ވިދާޅުވީ މިހާރު މިއޮތް ގޮތަށް މި ވޯޓު ނެގުމުން ގާނޫނީ ގޮތުން ވެސް އެތައް ސުވާލެއް އުފެދިފައިވާ ކަމަށާއި، މި ވޯޓަށް ސުވާލު ކުރާ ގޮތް ވެސް ގޯސް ކަމަށެވެ.
މަޖިލިސް މެންބަރުން މި ތިބީ ފަސް އަހަރަށް ހުވާ ކޮށްގެން. ދެން އަނެއްކާ މިއީ ހަތަރު އަހަރާ ހަ މަހަށް ބަދަލުވީމަ އެ ހުވަޔަށް ވަނީ ކިހިނެއްތޯ؟ ހުވާ ބަދަލުކުރަނީ ތޯ؟ މިކަހަލަ ބައިވަރު ސުވާލުތައް މި އިނީ. ގާނޫނީ އެތައް ސުވާލެއް ވެސް އެބަ އުފެދޭ. ދެން މީގެ ސަބަބުން އުފެދިގެންދާނެ ޕްރެޒިޑެންޓަކީ، މިސާލަކަށް، ދެން އަންނަ މި މަޖިލީހަކުން ޑިސައިޓް ކޮށްފާނެ އެ ސިޓިންގ ޕްރެޒިޑެންޓްގެ ޓާމް ކުރުކޮށްލާ މިސާލަކަށް. ދެން ކިހިނެއްތޯ ވާނީ. ރައްޔިތުންނާ މަޝްވަރާނުކޮށް، އެގްޒެކެޓިވް ޕަވަރއިން އެގޮތަށް ނޫނީ ރައްޔިތުންގެ މަޖިލީހުން އެގޮތަށް ޑިސައިޑެއް ނުކުރެވޭނެނޫންތޯ. މިއީ ރައްޔިތުންނާ މަޝްވަރާކޮށްގެން ރައްޔިތުން އެކަމެއް ބޭނުންވެގެން މިކަންތައް އަންނަން ހޭނީ. އެއާ ޚިލާފަށް މިހާރު އަޅުގަނޑުމެން މި ފެންނަނީ ރައީސުލްޖުމްހޫރިއްޔާ ބޭނުންވެގެން ކުރަން އުޅޭ ކަމެއް. ރައްޔިތުންގެ ބޮލުގައި އަޅުވާފައި މިކަން ކުރަން މި އުޅެނީ ރައީސުލްޖުމްހޫރިއްޔާ. އަޅުގަނޑުމެން ރަށްރަށަށް މި ދާ ދަތުރުގައި ވެސް، އެއްވެސް ރައްޔިތަކު މިކަން ކަންބޮޑުވެގެނެއް ނޫޅޭ. ދެ އިންތިޚާބު، ދެ އިންތިޚާބު ދެ ދުވަހު އޮންނާތީކީ. ރައްޔިތުންނަށް ބޭނުންވަނީ ވެސް ދެ ދުވަހު އޮންނަން.ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ
ރާއްޖޭގެ ސިޔާސީ ސަގާފަތަށް އިޝާރާތް ކުރައްވައި މެންބަރު އަހުމަދު ދީދީ ވިދާޅުވީ ރައްޔިތުން ބޭނުންވާ ކަންކަމާއި، ރިޔާސީ ވައުދުތައް ވެސް ފުއްދަމުން ދަނީ އިންތިޚާބުތަކާ ދިމާކޮށްކަން ރައްޔިތުންނަށް އެނގޭ ކަމަށެވެ. ކޮންމެ އިންތިޚާބަކާ ދިމާކޮށް ރައްޔިތުންގެ ގާތަށް ދާން މަޖުބޫރުވާ ކަމަށާއި، ނަމަވެސް ސަރުކާރުން ބޭނުންވާ ގޮތަށް ރެފަރެންޑަމް ވޯޓު ކާމިޔާބު ވެއްޖެނަމަ ރައްޔިތުންގެ އަތުން އެބާރު ގެއްލޭނެ ކަމަށް އޭނާ ވިދާޅުވި އެވެ.
މެންބަރު އަހުމަދު ދީދީ ވިދާޅުވީ އިންތިޚާބުތަކާއި ނުލައި ރައްޔިތުން ބޭނުންވާ ކަންކަން ނުވާނެ ކަމަށާއި، ރަށްރަށުގެ ތަރައްގީ ކުރިއަށް ނުދާނެ ކަމަށެވެ.
އެހެންކަމުން މިއަދު ރައްޔިތުންގެ އަތުގައި އޮތް ބާރުވެރިކަން ނަގާނުލުމަށް މެންބަރު އަހުމަދު ދީދީ ގޮވާލެއްވި އެވެ.
