އިނގިރޭސި އަސްކަރިއްޔާގެ ސިއްރު ލިޔެކިޔުންތަކެއް ކުނިވަށިގަނޑަކުން ފެނިއްޖެ

އިނގިރޭސިވިލާތުގެ އަސްކަރިއްޔާގެ އެންމެ ބޮޑު މަރުކަޒުގެ މުވައްޒަފުންގެ މައުލޫމާތާއި ސަލާމަތީ ކަންކަން ބަލަހައްޓާ އުސޫލުތައް ހިމެނޭ ހައްސާސް އަދި ސިއްރު ލިޔެކިޔުންތަކެއް، އުތުރު އިންގްލެންޑްގައި ކުނިވަށިގަނޑެއްގެ ތެރެއިން ފެނިއްޖެ ކަމަށް "ދަ ސަން" ނޫހުން ހޮނިހިރު ދުވަހު ރިޕޯޓުކޮށްފި އެވެ.

މި ހާދިސާ ހިނގާފައި މިވަނީ، އިނގިރޭސި އަސްކަރިއްޔާއަށް ބޭނުންވާ ބަޖެޓު ނުލިބުމުގެ ސަބަބުން ބޮޑެތި ގޮންޖެހުންތަކަކާ ކުރިމަތިލާން ޖެހިފައިވާ ދަނޑިވަޅެއްގަ އެވެ. އެގޮތުން، މަރާމާތު ކުރުމުގެ މަސައްކަތްތައް ފަސްވަމުން ދިއުމުގެ ސަބަބުން، އެ ގައުމުގެ "އެސްޓިއުޓް-ކްލާސް" ގެ ނިއުކްލިއާ ހަކަތައިން ދުއްވާ ފަސް ސަބްމެރިންވެސް މިވަގުތު އޮތީ ބަނދަރުގައި ތާށިވެފަ އެވެ. އަސްކަރީ ބަޖެޓުގެ މައްސަލައިގައި ބޮޑުވަޒީރު ކިއަރ ސްޓާމަރއާ ދެމެދު އުފެދުނު ހިޔާލުތަފާތުވުންތަކާ ގުޅިގެން، އިނގިރޭސިވިލާތުގެ ކުރީގެ ޑިފެންސް ސެކްރެޓަރީ ޖޯން ހީލީ ވަނީ މިދިޔަ މަހު މަގާމުން އިސްތިއުފާ ދެއްވާފަ އެވެ.

"ދަ ސަން" ނޫހުން ރިޕޯޓުކޮށްފައިވާ ގޮތުގައި، ކެޓެރިކް ބްރިޖް ސަރަހައްދުގައި ހުރި ކުނި އަޅާ ވަށިގަނޑެއްގެ ތެރެއިން މި ލިޔެކިޔުންތައް ފެނުނީ އާންމު ރައްޔިތަކަށެވެ. އަދި އޭނާ ވަނީ އެ ތަކެތި އެ ނޫހާ ހަވާލުކޮށްފަ އެވެ.

މި ލިޔެކިޔުންތަކުގައި ސިފައިންގެ ނަމާއި ރޭންކުތަކުގެ އިތުރުން، ފޯރިމަރާ ޝިފްޓުތަކުގެ ތަފްސީލާއި، ހަތިޔާރު ރައްކާކޮށްފައި ހުންނަ ތަންތަނުގެ މައުލޫމާތާއި، ސަލާމަތީ އުސޫލުތަކުގެ އިތުރުން ކެޓެރިކް ގެރިސަންއާ ގުޅުންހުރި އެކި ހާދިސާތަކުގެ ރިޕޯޓުތައް ހިމެނޭ ކަމަށްވެ އެވެ. ކެޓެރިކް ގެރިސަންއަކީ އިނގިރޭސި އަސްކަރިއްޔާގެ އެންމެ ބޮޑު މަރުކަޒެވެ.

އިނގިރޭސި އަސްކަރިއްޔާގެ އިންޓެލިޖެންސް އަދި ސެކިއުރިޓީ ދާއިރާގެ ކުރީގެ އިސް އޮފިސަރެއް ކަމަށްވާ ކާނަލް ފިލިޕް އިންގްރަމްއާ ހަވާލާދީ "ދަ ސަން" އިން ބުނީ، މި ލިޔެކިޔުންތަކުގެ ސަބަބުން ދުޝްމަނުންނަށް ނުރައްކާތެރި މައުލޫމާތުތަކެއް ލިބުމުގެ ފުރުސަތު އެބައޮތް ކަމަށެވެ.

އޭނާ ވިދާޅުވި ގޮތުގައި، މިއީ ސަލާމަތީ ގޮތުން އޮތް ބޮޑު ނުރައްކަލެކެވެ. އަދި މިއީ ކަންކަން ބެލެހެއްޓުމުގައި އިހުމާލުވެފައިވާކަން ހާމަވާ، އުސޫލުތަކާ ހިލާފު ކަމެއްކަން ފާހަގަކުރައްވައި، އޭނާ ވިދާޅުވީ މިފަދަ ނާޒުކު ލިޔެކިޔުންތައް އުކާލުމުގެ ކުރިން އަންދާލަން ނުވަތަ ނައްތާލަން ޖެހޭނެ ކަމަށެވެ.

މިއީ އިނގިރޭސިވިލާތުގައި އަސްކަރީ ސިއްރުތަކެއް ބޭރުވި ފުރަތަމަ ފަހަރެއް ނޫނެވެ.

މިދިޔަ އަހަރުވެސް ކެޓެރިކް ގަރިސަންގެ ސިފައިންގެ މައުލޫމާތާއި، ޝިފްޓުތައް ބަހާފައިވާ ގޮތާއި، ހަތިޔާރު ދޫކުރާ ތަފްސީލުތައް ހިމެނޭ ލިޔެކިޔުންތަކެއް، ނިއުކާސަލްގެ މަގުމަތީގައި ހުރި ވީދިފައިވާ ކުނި ކޮތަޅަކުން ފެނިގެން ބޭރުވެފައިވެ އެވެ.

މީގެ އިތުރުން، މިދިޔަ އޮކްޓޯބަރު މަހު ޕޮލެންޑުގައިވެސް މިފަދަ ހާދިސާއެއް ހިނގާފައިވެ އެވެ. އެ ގައުމުގެ "އޮނެޓް" ނޫހުން ރިޕޯޓުކުރި ގޮތުގައި، ކުނިތަކެއްގެ ތެރެއިން އަސްކަރިއްޔާގެ ސިއްރު ލިޔެކިޔުންތަކެއް ވަނީ ފެނިފަ އެވެ. ނަމަވެސް ޕޮލެންޑުގެ އަސްކަރިއްޔާއިން އެ ރިޕޯޓު ދޮގުކޮށް، އެ ނޫހުން ގެންގުޅެނީ ހުއްދަނެތް ސިއްރު ލިޔެކިޔުންތަކެއްގެ ކޮޕީތަކެއް ކަމަށް ބުނެ ތުހުމަތުކޮށްފައިވެ އެވެ.