އިންގްލެންޑުގެ ކެޕްޓަން ކޭން އަށް "ސަރ" ގެ ލަޤަބު ދިނުމަށް ގޮވާލާ ކެމްޕެއިނެއް ފަށައިފި
މެމްބަރު ލައިލާ މޮރާން، ޤާނޫނު ހަދާ މަޖިލީހަށް ހުށަހެޅުއްވި "އަރލީ ޑޭ މޯޝަން" އެއްގައި ވަނީ، ވަރލްޑް ކަޕްގައި ކޮންގޯއާ ދެކޮޅަށް އިންގްލެންޑުގެ ޓީމުން ދެއްކި މޮޅު ކުޅުމަށް ތައުރީފު ކުރައްވާފައި. އަދި ޤައުމީ ޓީމަށް ކޭން ކޮށްދީފައިވާ މުހިންމު ޚިދުމަތް ތަކުގެ އަގުވަޒަން ކުމުގެ ގޮތުން، އޭނާ އަށް އެ ލަޤަބު އެރުވުމަށް އެ ހުށަހެޅުމުގައި ވަނީ ބާރު އަޅުއްވާފައި.
އިންގްލެންޑުގެ ކެޕްޓަން ހެރީ ކޭން. | ރޮއިޓާސް
އިންގްލެންޑުގެ ކެޕްޓަން ހެރީ ކޭން އަށް "ސަރ"ގެ ލަޤަބު ނުވަތަ ނައިޓްހުޑް އެރުވުމަށް ގޮވާލައި، އިނގިރޭސިވިލާތުގެ ޤާނޫނު ހަދާ މަޖިލީހުގެ އެކި އެކި ސިޔާސީ ޕާޓީ ތަކަށް ނިސްބަތްވާ މެމްބަރުން ގުޅިގެން ކެމްޕެއިނެއް ފަށައިފި އެވެ.
މި ކެމްޕެއިން ފައްޓަވާފައި ވަނީ ލިބަރަލް ޑިކޮމްރެޓްސްގެ ޤާނޫނު ހަދާ މަޖިލީހުގެ މެމްބަރު ލައިލާ މޮރާން އެވެ.
މެމްބަރު ލައިލާ މޮރާން، ޤާނޫނު ހަދާ މަޖިލީހަށް ހުށަހެޅުއްވި "އަރލީ ޑޭ މޯޝަން" އެއްގައި ވަނީ، ވަރލްޑް ކަޕްގައި ކޮންގޯއާ ދެކޮޅަށް އިންގްލެންޑުގެ ޓީމުން ދެއްކި މޮޅު ކުޅުމަށް ތައުރީފު ކުރައްވައިފަ އެވެ. އަދި ޤައުމީ ޓީމަށް ކޭން ކޮށްދީފައިވާ މުހިންމު ޚިދުމަތް ތަކުގެ އަގުވަޒަން ކުމުގެ ގޮތުން، އޭނާ އަށް އެ ލަޤަބު އެރުވުމަށް އެ ހުށަހެޅުމުގައި ވަނީ ބާރު އަޅުއްވައިފަ އެވެ.
މި ކެމްޕޭންއާ ގުޅޭ ގޮތުން ވާހަކަ ދައްކަވަމުން ލައިލާ މޮރާން ވިދާޅުވީ، ހެރީ ކޭން އަކީ ދަނޑު މަތީގައި އަދި ދަނޑުން ބޭރުގައި ވެސް ނަމޫނާ ލީޑަރެއް ކަމަށާއި، އޭނާ ދައްކުވައިދެނީ އިނގިރޭސިވިލާތުގެ މަތިވެރި ސިފަތައް ކަމަށެވެ. އަދި މިއީ މުޅި ޤައުމު އެއްބައިވަންތަ ކުރުވުމަށް ލިބޭ ފުރުސަތެއްގެ ގޮތުގައި އޭނާ ސިފަ ކުރެއްވި އެވެ.
ލައިލާ މޮރާން އިތުރަށް ވިދާޅުވީ، ދެން ބޮޑު ވަޒީރު ކަމަށް ވަޑައިގަންނަވާނެ ކަމަށް ބެލެވޭ އެންޑީ ބާންހަމްގެ ވެރިކަން ރަނގަޅު ގޮތެއްގައި ފެއްޓެވުމަށް ބޭނުންފުޅުވާ ނަމަ، މި ކެމްޕެއިން އަށް ތާއީދު ކުރައްވަން ޖެހޭނެ ކަމަށެވެ. އަދި އިންގްލެންޑު ޓީމުގެ ހުރިހާ ސަޕޯޓަރުން ވެސް އެ ބޭފުޅަކު ނިސްބަތްވާ ދާއިރާގެ ޤާނޫނު ހަދާ މަޖިލީހުގެ މެންބަރުން މެދުވެރިކޮށް، މި ހުށަހެޅުމުގައި ސޮއި ކުރުމަށް ބާރު އެޅުމަށް އޭނާ ވަނީ ގޮވާލައްވާފައި އެވެ.
ވަރލްޑް ކަޕްގެ ގަދަ 16 ގައި ހޯމަ ދުވަހު މެކްސިކޯއާ ދެކޮޅަށް އިންގްލެންޑުން ކުޅޭ މެޗަށް އިޝާރާތް ކުރައްވައި ލައިލާ މޮރާން ވިދާޅުވީ، ކޭން އެނބުރި ޤައުމަށް އަންނަން ވާނީ މުބާރާތުގެ ތަށީގެ އިތުރުން، އޭނާ އަށް ހައްގުވާ ނައިޓްހުޑް ލަޤަބާ އެކު ކަމަށެވެ. މި ހުށަހެޅުމަށް ޤާނޫނު ހަދާ މަޖިލީހުގެ މެމްބަރުގެ ތާއީދު ލިބެމުން އަންނަ ކަމަށް ވަނީ ފާހަގަވެފައި އެވެ.
އުމުރުން 32 އަހަރުގެ ކޭން ވަނީ އިންގްލެންޑުގެ ޤައުމީ ޓީމަށް ކުޅެދީފައިވާ 118 މެޗުގައި 84 ލަނޑު ޖަހައިފަ އެވެ. ކޭން އަކީ އިންގްލެންޑުގެ ޤައުމީ ޓީމަށް އެންމެ ގިނަ ލަނޑު ޖަހައިދީފައިވާ ކުޅުންތެރިޔާ އެވެ. އަދި އޭނާ އަކީ ޤައުމީ ޓީމަށް ތިން ވަނަ އަށް އެންމެ ގިނަ މެޗު ކުޅެދީފައިވާ ކުޅުންތެރިޔާ އެވެ.
