ބޮޑު ވަޒީރުގެ ޚާއްސަ އޮފީހެއް މެންޗެސްޓަރގައި ޤާއިމު ކުރައްވާނެ ކަަމަށް ބާންހަމް ވިދާޅުވެއްޖެ

އިނގިރޭސިވިލާތުގެ ބޮޑު ވަޒީރުގެ މަޤާމަށް ހޮވިވަޑައިގެންފި ނަމަ، ބޮޑު ވަޒީރުގެ ޚާއްސަ އޮފީހެއް މެންޗެސްޓަރގައި ޤާއިމު ކުރައްވާނެ ކަމަށް އެންޑީ ބާންހަމް ވިދާޅުވެއްޖެ އެވެ. 

ހޯމަ ދުވަހު ބާންހަމް ވިދާޅުވި ގޮތުގައި، މި އޮފީސް ވެގެން ދާނީ އިނގިރޭސިވިލާތުގެ އިދާރީ އޮނިގަނޑަށް ގެންނަ ބޮޑު ބަދަލުގެ މައި މަރުކަޒު ކަމަށެވެ. 

މި މަޝްރޫއު އަށް "ނަންބަރު 10 ނޯތު" ގެ ނަމުން ނަން ދީފައިވާއިރު، މި އޮފީހުން ކުރިއަށް ގެންދާނެ މައިގަނޑު ތިން މަސައްކަތެއް ބާންހަމް ވަނީ ތަފްސީލު ކޮށްދެއްވާފައި އެވެ. 

އެގޮތުން ބާންހަމް ވިދާޅުވީ އެ އޮފީހުގެ އެންމެ މުހިންމު އެއް ބޭނުމަކީ ލަންޑަނަށް އެކަނި ބަރޯސާވެފައި އޮތް އޮތުން ނިމުމަކަށް ގެނެސް، ޤައުމުގެ އުތުރުގެ ސަރަހައްދު ތަކުގެ ތަރައްޤީ އަށް ސީދާ ބޮޑު ވަޒީރުގެ ބެއްލެވުމުގެ ދަށުން މަސައްކަތްތައް ބާރު މިނުގައި ކުރިއަށް ގެންދިޔުމަށެވެ. 

މީގެ އިތުރުން، މެންޗެސްޓަރގައި ޤާއިމު ކުރާ ބޮޑު ވަޒީރުގެ އޮފީހުން އިނގިރޭސިވިލާތުގެ އިޤްތިޞާދީ އަދި އިޖުތިމާއީ ސިޔާސަތުތައް އަލުން ބައްޓަން ކުރުމުގައި މުހިންމު ދައުރެއް އަދާ ކުރާނެ ކަމަށް ވެސް ބާންހަމް ވިދާޅުވި އެވެ. ބާންހަމް ސިފަ ކުރެއްވި ގޮތުގައި މިއީ މުޅި އިނގިރޭސިވިލާތުގެ ހިންގުން އަލުން ގުޅާލުމަށް ކުރެވޭ މުހިންމު މަސައްކަތެއްގެ ގޮތުގައި އެވެ. 

މި ނިންމުމާ އެކު ސަރުކާރުގެ ނިންމުންތައް ނިންމުމުގައި އާންމު ރައްޔިތުންނާ ގާތުން މަސައްކަތް ކުރުމުގެ ފުރުސަތު ލިބިގެންދާނެ ކަމަށް ބާންހަމް ޤަބޫލު ކުރައްވަ އެވެ. ޚާއްސަކޮށް ޤައުމުގެ އުތުރުގެ ސަރަހައްދު ތަކަށް ދިމާވެފައިވާ ގޮންޖެހުން ތަކަށް ޙައްލު ހޯދުމަށް މި އޮފީހުގެ ސަބަބުން މަގުފަހި ވެގެން ދާނެ ކަމަށް ވެސް ބާންހަމް ފާހަގަ ކުރެއްވި އެވެ. 

އިނގިރޭސިވިލާތުގެ ބޮޑު ވަޒީރު ކަމަށް ވަޑައިގަންނަވާނެ ކަމަށް ބެލެވޭ ބާންހަމް މިފަދަ ވައުދެއް ވެވަޑައިގެންފައި މި ވަނީ އެ ޤައުުމުގެ ސިޔާސީ މަސްރަހު ހޫނުވެފައިވާ ވަގުތެއްގައި އެވެ. މި ހުށަހެޅުމަކީ ލަންޑަންގެ ބޭރުގައި ސިޓީ ތަކަށް އިތުރު ބާރު ތަކެއް ދިނުމަށް އޭނާ ގެންގުޅުއްވާ ސިޔާސަތުގެ ދަށުން ނިންމެވި ނިންމެވުމެއް ކަމަށް މަސްރަހު ދިރާސާ ކުރާ ފަރާތްތަކުން ބުނެ އެވެ.

އިނގިރޭސިވިލާތުގެ ޤާނޫނު ހަދާ މަޖިލީހުގެ މޭކާފީލްޑް ދާއިރާގެ މެމްބަރު ކަމުގެ ހުވާ ދާދި ފަހުން ކުރެއްވި ބާންހަމް އަކީ، އެ ޤައުމުގެ ބޮޑު ވަޒީރު ކަމަށް ދެން ވަޑައިގަންނަވާނެ ކަމަށް ބެލެވޭ ބޭފުޅާ އެވެ. ވެރިކަން ކުރާ ލޭބާ ޕާޓީގެ ގިނަ މެމްބަރުންނާއި، މިހާރުގެ ބޮޑު ވަޒީރު ކިއާ ސްޓާމާގެ ކެބިނެޓުގައި ހިމެނޭ މިނިސްޓަރުން ވެސް ވަނީ ބާންހަމް އަށް ތާއީދު ކުރައްވާ ކަމަށް ހާމަ ކުރައްވައިފަ އެވެ.