އިނގިރޭސިވިލާތުގެ ލީޑަރުން ފެއިލް ވެއްޖެ، އައު ބޮޑު ވަޒީރު ބަދަލު ތަކެއް ގެންނަވާނެ ކަމަށް އުންމީދު ކުރަން: އެމެރިކާގެ ނައިބު ރައީސް ވޭންސް
ވޭންސް ވިދާޅުވީ ފާއިތުވި މަދު އަހަރު ތަކުގެ ތެރޭގައި ހަ ބޮޑު ވަޒީރުން ބަދަލުވެފައި ވުމަކީ، ސީރިއަސް ކަމެއް ކަމަށް. އެކަމުން ދައްކުވައި ދެނީ އިނގިރޭސިވިލާތުގެ ސިޔާސަތު ތަކުގައި ބޮޑެތި ގޯސް ތަކެއް އޮތުން ކަމަށައި، ރައްޔިތުން ބޭނުން ވާނީ މުހިންމު ބަދަލު ތަކެއް ގެނައުން ކަމަށް ވެސް ވޭންސް ވިދާޅުވި.
އެމެރިކާގެ ނައިބު ރައީސް ޖޭޑީ ވޭންސް. | ގެޓީ އިމޭޖަސް
އިނގިރޭސިވިލާތުގެ ލީޑަރުން ވަނީ ދިގު މުއްދަތަކަށް ފެއިލް ވެފައި ކަމަށާއި، ސިޔާސީ ގޮންޖެހުންތަކާ އެކު ވެސް ދެން ވަޑައިގަންނަވާ ބޮޑު ވަޒީރަކު ރައްޔިތުން ބޭނުންވާ ބަދަލު ތަކެއް ގެނެސްދެއްވާނެ ކަމަށް އުންމީދު ކުރައްވާ ކަމަށް އެމެރިކާގެ ނައިބު ރައީސް ޖޭޑީ ވޭންސް ވިދާޅުވެއްޖެ އެވެ.
ސަންޑޭ ޓައިމްސް ނޫހަށް ދެއްވި އިންޓަވިއުއެއްގައި ވޭންސް ވިދާޅުވީ، ވަކި ވަކި ސަރުކާރުތައް އަބަދުވެސް ބަދަލުވަމުން ދިޔުމަކީ އިނގިރޭސިވިލާތުގެ ސިޔާސަތުގައި ވަރަށް "ފުން ނޭވާއެއް" ލާން ޖެހޭ ފަދަ މައްސަލަ ތަކެއް އޮތް ކަމުގެ ހެއްކެއް ކަމަށެވެ.
ބޮޑު ވަޒީރުގެ މަޤާމުން އިސްތިއުފާ ދެއްވާނެކަން މިދިޔަ މަހުގެ ފަހު ކޮޅު ކިއާ ސްޓާމާ އިއުލާން ކުރައްވާފައިވާއިރު، އެކަމަށް އިޝާރާތް ކުރައްވައި ވޭންސް ވިދާޅުވީ ބޮޑު ވަޒީރު އިސްތިއުފާ ދެއްވަނީ އެންމެ ދެ އަހަރުގެ ތެރޭގައި އެވެ. އެއާ އެކު، ދެން އިނގިރޭސިވިލާތަށް ވަޑައިގަންނަވާނީ ފާއިތުވި 10 އަހަރުގެ ތެރޭގައި ހަތް ވަނަ ބޮޑު ވަޒީރު ކަމަށް ވެސް ވޭންސް ފާހަގަ ކުރެއްވި އެވެ.
ވޭންސް ވިދާޅުވީ ފާއިތުވި މަދު އަހަރު ތަކުގެ ތެރޭގައި ހަ ބޮޑު ވަޒީރުން ބަދަލުވެފައި ވުމަކީ، ސީރިއަސް ކަމެއް ކަމަށެވެ. އެކަމުން ދައްކުވައި ދެނީ އިނގިރޭސިވިލާތުގެ ސިޔާސަތު ތަކުގައި ބޮޑެތި ގޯސް ތަކެއް އޮތުން ކަމަށައި، ރައްޔިތުން ބޭނުން ވާނީ މުހިންމު ބަދަލު ތަކެއް ގެނައުން ކަމަށް ވެސް ވޭންސް ވިދާޅުވި އެވެ.
މިހާރު އަޅުގަނޑުމެންނަށް މި ފެންނަނީ ފާއިތުވި މަދު އަހަރު ތަކުގެ ތެރޭގައި ހަ ބޮޑު ވަޒީރުން. އެކަމުން އަޅުގަނޑަށް ބުނެދެނީ އިނގިރޭސިވިލާތުގެ ސިޔާސީ މައިދާނުގައި ބޮޑެތި މައްސަލަ ތަކެއް އުޅޭކަން، އަދި ރައްޔިތުން އާދޭސް ކުރަމުން ދަނީ ހެޔޮ ބަދަލު ތަކަަކަށް. އަޅުގަނޑު އުންމީދު ކުރަން އެންޑީ ބާންހަމް، އޭނާ ނޫން ކަމަށް ވެއްޖިއްޔާ އެހެން މީހަކު ވިޔަސް، އެކަން ފުއްދައި ދޭނެ ކަމަށް. ކޮންމެ މީހަކު ބޮޑު ވަޒީރު ކަމަށް ވަޑައިގެންނެވި ނަމަވެސް، އިނގިރޭސިވިލާތް އަލުން ހަމަ މަގަށް އަޅުއްވާނެ ކަމަށް އުންމީދު ކުރަން.ޖޭޑީ ވޭންސް / އެމެރިކާގެ ނައިބު ރައީސް
އެއާ އެކު ވޭންސް ވިދާޅުވީ ދެން ބޮޑު ވަޒީރު ކަމަށް ވަޑައިގަންނަވާނެ ކަމަށް ބެލެވޭ އެންޑީ ބާންހަމް ވިޔަސް، ނުވަތަ އެހެން ބޭފުޅަކު ވިޔަސް، އެ ބަދަލުތައް ގެނެސް ދެއްވާނެ ކަމަށް އުންމީދު ކުރައްވާ ކަމަށެވެ. އަދި އައު ބޮޑު ވަޒީރަކީ އިނގިރޭސިވިލާތް ރަނގަޅު މަގުން ކުރިއަށް ގެންދިޔުމާއި، މައްސަލަ ތަކަށް ޙައްލު ހޯއްދަވައި ދެއްވާނެ ބޭފުޅަކަށް ވާނެ ކަަމަށް ވެސް ވޭންސް އުންމީދު ކުރައްވަ އެވެ.
އެމެރިކާގެ ނައިބު ރައީސް ވޭންސްގެ މި ވާހަކަ ތަކަކީ، އިނގިރޭސިވިލާތުގެ ސިޔާސީ ޙާލަތާ ގުޅިގެން ބައިނަލްއަޤުވާމީ މައިދާނުގައި ފާހަގަ ކޮށްލެވޭ ކަންބޮޑުވުމެއް ކަމަށް ބައެއް ފަރާތްތަކުން ދެކެ އެވެ.
މަސްދަރު: ރޮއިޓާސް
