މެކްސިކޯއާ ދެކޮޅަށް އިންގްލެންޑުން ކުޅޭ މެޗާ ދިމާކޮށް، ބަނގުރާ ވިއްކާ ތަންތަން ހުޅުވާފައި ހުންނަ ވަގުތު އިތުރު ކުރުމަށް ބޮޑު ވަޒީރު ނިންމަވައިފި

އިނގިރޭސިވިލާތް އަދި ވޭލްސްގެ ޕަބްތައް، ނުވަތަ ބަނގުރާ ވިއްކާ ތަންތަން ހޯމަ ދުވަހުގެ ފަތިހު ފަހެއް ޖަހަންދެން ހުޅުވާފައި ބެހެއްޓޭނެ ކަމަށް އިނގިރޭސިވިލާތުގެ ބޮޑު ވަޒީރު ކިއާ ސްޓާމަރ އިއުލާން ކުރައްވައިފި އެވެ. 

ބޮޑު ވަޒީރު މިހެން ނިންމަވާފައި ވަނީ ވަރލްޑް ކަޕްގެ ގަދަ 16 ގައި އިންގްލެންޑް އިން މެކްސިކޯއާ ދެކޮޅަށް ކުޅޭ މެޗާ ދިމާކޮށެވެ. 

ހޯމް ސެކްރެޓަރީގެ ބެއްލެވުމުގެ ދަށުން މިފަދަ ނިންމުމެއް ނިންމާފައި މި ވަނީ ބައިނަލްއަޤުވާމީ، ޤައުމީ ނުވަތަ ލޯކަލް ފެންވަރުގައި ވަރަށް ޚާއްސަ މުނާސަބަތު ތަކުގައި ބަނގުރާ ލައިސަންސް ގަޑިތައް އިތުރު ކުރުމުގެ ޤާނޫނީ ބާރު ބޭނުން ކޮށްގެންނެވެ. ހައުސިންގ އެންޑް ކޮމިއުނިޓީ ސެކްރެޓަރީ ގެންދަވަނީ މި ނިންމުމާ ގުޅިގެން، ކައުންސިލް ލީޑަރުންނަށް ރަސްމީކޮށް ސިޓީ އިން އެކަން އަންގަމުންނެވެ. 

އެކަމާ ގުޅޭ ގޮތުން ބޮޑު ވަޒީރު ސްޓާމަރ ވިދާޅުވީ، އަމިއްލަ ޤައުމަށް ފުޓުބޯޅައިގެ އުފާވެރިކަން އައުމުގެ ފުރުސަތު އެބަ އޮތް ކަމަށެވެ. ނަމަވެސް، ފުޓުބޯޅަ ސަޕޯޓަރުން ގެޔަށް ދާން ނުޖެހޭނެ ކަމަށް ބޮޑު ވަޒީރު ވިދާޅުވި އެވެ. އިންގްލެންޑުން ފުޓުބޯޅަ މުބާރާތް ތަކުގައި ވާާދަކުރާއިރު، އެ ޤައުމުން އާންމު ގޮތެއްގައި ބޭނުން ކުރާ ޝިއާރަކީ "އިޓްސް ކަމިންގ ހޯމް" އެވެ. 

ބޮޑު ވަޒީރު ވިދާޅުވީ މެޗުގެ އެންމެ ފަހު ކަށިގަނޑު ފުމެލަންދެން ބަނގުރާ ވިއްކާ ތަންތަން ހުޅުވާފައި ބެހެއްޓުމަކީ ޤައުމުގެ ސަޕޯޓަރުންނަށް އުފާވެރި ޚަބަރަކަށް ވާނެ ކަމަށެވެ. އެއާ އެކު ސްޓާމަރ ވިދާޅުވީ، ޤައުމުގެ ހުރިހާ ރައްޔިތުން އިންގްލެންޑުގެ ޓީމަށް ސަޕޯޓު ކުރާނެ ކަމަށާއި، އިންގްލެންޑަށް ކާމިޔާބު ލިބޭނެ ކަމަށް އުންމީދު ކުރައްވާ ކަމަށެވެ. 

އިނގިރޭސިވިލާތުގެ ވިޔަފާރީއާ ބެހޭ މިނިސްޓަރު ކޭޓް ޑިއާޑަން ބުރާސްފަތި ދުވަހު ވިދާޅުވެފައި ވަނީ، ކުރިން އެކަމުގެ ހުއްދަ އަށް އެދިފައިވާ ނުވާ ޕަބްތަކަށް ޤަވާއިދުގެ ދަށުން ލުއި ތަކެއް ނުދެވޭނެ ކަމަށެވެ. ނަމަވެސް، ގިނަ ބައެއްގެ ފާޑު ކިޔުން އަމާޒުވާން ފެށުމުން، ހަމަ އެ ދުވަހުގެ މެންދުރު ފަހުގެ ވަގުތެއްގައި ބޮޑު ވަޒީރު ވަނީ އެ ނިންމުން ބަދަލު ކުރައްވައިފަ އެވެ.