ނޭޓޯގެ ސެކްރެޓަރީ ޖެނަރަލްގެ މަޤާމަށް ވާދަ ކުރައްވަން ސްޓާމާގެ ޝައުޤުވެރިކަން

އިނގިރޭސިވިލާތުގެ ބޮޑު ވަޒީރުގެ މަގާމުން އިސްތިއުފާ ދެއްވަން ނިންމަވާފައިވާ ކިއާ ސްޓާމާ، ނޭޓޯގެ ސެކްރެޓަރީ ޖެނަރަލްގެ މަޤާމަށް ވާދަ ކުރައްވަން ޝައުޤުވެރިވެ ވަޑައިގަންނަވާ ކަމަށް ރިޕޯޓުތައް ބުނެފި އެވެ.

މިކަން ރިޕޯޓު ކޮށްފައި ވަނީ އިނގިރޭސިވިލާތުގެ ނޫސްވެރިއެއް ކަމަށްވާ ޓޮމް ބޯލްޑްވިން އޮބްޒާވާ ނޫހުގައި ލިޔެއްފައިވާ ލިޔުމެއްގައި އެވެ. 

ނޭޓޯގެ ސެކްރެޓަރީ ޖެނަރަލްގެ މަޤާމަކީ ޔޫރަޕު އެޓްލާންޓިކް ސަލާމަތީ ނިޒާމުގެ އެންމެ މުހިންމު މަޤާމު ތަކުގެ ތެރޭގައި ހިމެނޭ މަޤާމެކެވެ. ޔޫކްރެއިން އަަށް ދެމުން އަންނަ ތާއީދާއި، ރަޝިޔާއާ ދެކޮޅަށް އަޅާ ފިޔަވަޅުތައް އެންމެ ބޮޑަށް ބަރޯސާ ވެގެންދަނީ މި އިއްތިހާދުގެ އިސްވެރިޔާގެ ފިކުރު ތަކާއި، ސިޔާސަތު ތަކުގެ މައްޗަށެވެ. 

ރިޕޯޓުތައް ބުނާ ގޮތުގައި ސްޓާމާ ނޭޓޯގެ ސެކްރެޓަރީ ޖެނަރަލްގެ މަޤާމަށް ޝައުޤުވެރިވެ ވަޑައިގަންނަވަ އެވެ. ނޭޓޯގެ ސެކްރެޓަރީ ޖެނަރަލްގެ މަޤާމުގައި މިހާރު ހުންނެވީ މާކް ރުޓޭ އެވެ. އޭނާގެ ދައުރު ހަމަވާނީ 2028 ވަނަ އަހަރުގެ ތެރޭގައި އެވެ. ނަމަވެސް، ސްޓާމާ އަށް މި މަޤާމަށް ވަޑައިގެންނެވޭނީ އިނގިރޭސިވިލާތުގެ ސަރުކާރުގެ އިތުރުން، ނޭޓޯގެ އެހެން ބައިވެރި ޤައުމު ތަކުގެ ތާއީދު ލިބިގެންނެވެ. 

މީގެ އިތުރުން ރިޕޯޓު ތަކުގައި ބުނެފައިވާ ގޮތުން، ސްޓާމާގެ ސަލާމަތީ ދާއިރާގެ ރޯލަށާއި، މަސައްކަތްތަަކަށް ޔޫރަޕުގެ ލީޑަރުން ވަރަށް ބޮޑަށް ތައުރީފު ކުރައްވަ އެވެ. ހަމަ އެހެންމެ، ޔޫކްރެއިންގެ ރައީސް ވްލަޑިމިއަރ ޒެލެންސްކީ އާއި ސްޓާމާއާ ދެމެދު ގާތް ގުޅުމެއް އޮތުމަކީ ވެސް ޔޫރަޕުގެ ލީޑަރުން ވަރަށް ގަޔާވާ ކަމެއް ކަމަށް ވެސް ބުނެފައިވެ އެވެ. 

ނޭޓޯގެ ސެކްރެޓަރީ ޖެނަރަލްގެ މަޤާމަކީ ބައިނަލްއަޤުވާމީ ސިޔާސަތުގައި ވަރަށް ބާރުގަދަ މަޤާމެކެވެ. މި މަޤާމުގައި ހުންނަވާ ބޭފުޅާ އިސްވެ ހުންނަވައިގެން، ނޭޓޯގެ 32 މެމްބަރު ޤައުމު ތަކުގެ ސަލާމަތީ ސިޔާސަތުތައް ކަނޑަ އަޅައި ތަންފީޒު ކުރެވޭނެ އެވެ. ނޭޓޯގެ ސެކްރެޓަރީ ޖެނަރަލްގެ މަޤާމަކީ ނުފޫޒު ގަދަ އަދި ޤައުމު ތަކާ މެދު ގާތް ގުޅުމެއް ބާއްވަން ފަހި މަޤާމެކެވެ. 

އިނގިރޭސިވިލާތުގެ ގިނަ މީޑިއާ ތަކުގައި މި ޚަބަރު ރިޕޯޓު ކޮށްފައި ވީ ނަމަވެސް، ނޭޓޯގެ ސެކްރެޓަރީ ޖެނަރަލްގެ މަޤާމަށް ސްޓާމާ ވާދަ ކުރައްވާނެ ކަމުގެ ރަސްމީ ބަހެއް ލިބިފައި ނުވެ އެވެ. އަދި މިކަމާ ގުޅޭ ގޮތުން އިނގިރޭސިވިލާތުގެ ސަރުކާރާއި، ނޭޓޯގެ އެހެން ޤައުމު ތަކުން ވެސް ރަސްމީ ބަހެއް ބުނެފައި ނުވެ އެވެ. މި ރިޕޯޓު މިހެން ކޮށްފައި ވަނިކޮށް ހޯމަ ދުވަހު ސްޓާމާ ވަނީ ރުޓޭއާ ބައްދަލު ކުރައްވައިފަ އެވެ. ދެ ބޭފުޅުން ބައްދަލު ކުރައްވާފައި ވަނީ ބޮޑު ވަޒީރުގެ ރަސްމީ އޮފީސް ޑައުނިން ސްޓްރީޓުގައި އެވެ. 

ބައިނަލްއަޤުވާމީ ތަޖުރިބާކާރުން ބުނާ ގޮތުގައި ސްޓާމާ މި މަޤާމަށް ކުރިމަތިލައްވައިފި ނަމަ، އެކަން ބައިނަލްއަޤުވާމީ ސިޔާސަތުގައި މުހިންމު ބަދަލު ތަކެއް ގެނެސްދޭނެ އެވެ. އަދި ޔޫރަޕުގެ ސަލާމަތާއި، ސުލްޙަ ބެލެހެއްޓުމުގައި އައު ފިކުރު ތަކެއް ގެނެސްދޭނެ ކަމަށް ވެސް ބެލެވެ އެވެ. 

އިނގިރޭސިވިލާތުގެ ބޮޑު ވަޒީރުގެ މަގާމުން އިސްތިއުފާ ދެއްވާނެ ކަމަށް ސްޓާމާ އިއުލާން ކުރައްވާފައި ވަނީ، ޖޫން މަހުގެ 22 ވަނަ ދުވަހު އެވެ. ވެރިކަން ކުރާ ލޭބާ ޕާޓީގެ އެތެރޭގައި ޕްރެޝަރު ބޮޑުވެ ސްޓާމާ އިސްތިއުފާ ދެއްވަން ނިންމެވިއިރު، ދެން ބޮޑު ވަޒީރު ކަމަށް ވަޑައިގަންނަވާ އެންޑީ ބާންހަމްގެ ސަރުކާރުގެ މަޤާމެއް ވެސް ސްޓާމާ އަށް ދޭން އުޅޭ ކަމުގެ އަޑުތައް ފެތުރުނެވެ. އެގޮތުން ފޮރިން ސެކްރެޓަރީގެ މަޤާމު ސްޓާމާ އަށް ދެއްވާނެ ކަމަށް ރިޕޯޓު ކޮށްފައި ވީ ނަމަވެސް، އެކަމާ ގުޅޭ ޞައްޙަ ބަހެއް ލިބިފައި ނުވެ އެވެ. 

އިނގިރޭސިވިލާތުގެ ބޮޑު ވަޒީރުގެ މަގާމަށް ސްޓާމާ އައްޔަން ވެފައި ވަނީ 2024 ވަނަ އަހަރުގެ ޖުލައި މަހު އެވެ. އެ އަހަރު އޮތް ޤާނޫނު ހަދާ މަޖިލީހުގެ އިންތިޚާބުގައި ލޭބާ ޕާޓީ އިން ވަނީ ބޮޑު އަޣުލަބިއްޔަތެއް ހޯދައިފަ އެވެ.

ސްޓާމާ އަކީ 2010 ވަނަ އަހަރު ގޯޑަން ބްރައުންގެ ފަހުން، އިނގިރޭސިވިލާތުގެ ބޮޑު ވަޒީރު ކަމަށް ވަޑައިގެންނެވި ލޭބާ ޕާާޓީގެ ފުރަތަމަ ބޭފުޅާ އެވެ. އަދި އެ އިންތިޚާބަކީ، 2005 ވަނަ އަހަރު އޭރުގެ ބޮޑު ވަޒީރު ޓޯނީ ބްލެއާގެ ފަހުން ލޭބާ ޕާޓީ އަށް ޤާނޫނު ހަދާ މަޖިލީހުގެ އަޣުލަބިއްޔަތު ލިބުނު ފުރަތަމަ ފަހަރެވެ.

އުމުރުން 63 އަހަރުގެ ސްޓާމާ އަކީ 2020 ވަނަ އަހަރުގެ އޭޕްރީލް މަހުން ފެށިގެން ލޭބާ ޕާޓީގެ ލީޑަރުގެ މަގާމުގައި ހުންނެވި ބޭފުޅާ އެވެ.