ކާމިޔާބު މަސައްކަތް ތަކެއް ކުރެވުނު، ލޭބާ ޕާޓީ އަށް ކުރިއަށް އޮތް އިންތިޚާބު ވެސް ކާމިޔާބު ކުރެވެން ޖެހޭނެ: ބޮޑު ވަޒީރު ސްޓާމަރ
5 ޖުލައި 2026 | އާދީއްތަ 13:25ސްޓާމަރ ވިދާޅުވީ، ދެން ބޮޑު ވަޒީރުގެ މަޤާމަށް ވަޑައިގަންނަވާ ބޭފުޅަކަށް ވެސް ތަރުތީބު ކުރެވިފައިވާ މަސައްކަތް ތަކެއް ލިބިވަޑައިގަންނަވާނެ ކަމަށާއި، ލޭބާ ޕާޓީ އަށް ކުރިއަށް އޮތް އިންތިޚާބު ކާމިޔާބު ކުރެވެން ޖެހޭނެ ކަމަށް. އެއާ އެކު ސްޓާމަރ ވިދާޅުވީ، ބާކީ އޮތް ދުވަސް ތަކުގައި ވެސް ރަނގަޅު މަަސައްކަތް ތަކެއްކޮށް، ހެޔޮ ގޮތުގައި ވަކިވެގެން ދާން ބޭނުންވާ ކަމަށް.
އިނގިރޭސިވިލާތުގެ ބޮޑު ވަޒީރު ކިއާ ސްޓާމާ. | ގެޓީ އިމޭޖަސް
ބޮޑު ވަޒީރުގެ މަޤާމުގައި ހުންނަވައިގެން ކާމިޔާބު މަސައްކަތް ތަކެއް ކުރެވުނު ކަމަށާއި، އެކަމުގެ ސަބަބުން ލޭބާ ޕާޓީ އަށް ކުރިއަށް އޮތް އިންތިޚާބު ވެސް ކާމިޔާބު ކުރެވެން ޖެހޭނެ ކަމަށް ކިއާ ސްޓާމަރ ވިދާޅުވެއްޖެ އެވެ.
ސްޓާމަރ މިހެން ވިދާޅުވެފައި ވަނީ ބީބީސީ އަށް ދެއްވި އިންޓަވިޔުއެއްގައި އެވެ. މިއީ ބޮޑު ވަޒީރުގެ މަޤާމުން އިސްތިއުފާ ދެއްވާނެކަން އިއުލާން ކުރެއްވުމަށް ފަހު، މީޑިއާ އަކަށް ސްޓާމަރ ދެއްވި ފުރަތަމަ އިންޓަވިޔު އެވެ.
އޭނާ ހާސިލު ކޮށްފައިވާ ކާމިޔާބީތަކާ ގުޅޭ ގޮތުން ސުވާލު ކުރުމުން ސްޓާމާ ވިދާޅުވީ، ލޭބާ ޕާޓީގެ އެތެރޭގައި ޔަހޫދީންނާ ދެކޮޅަށް އޮތް ސަގާފަތް ހުއްޓުވުނު ކަމަށާއި، އޭގެ ފަހުން 2024 ވަނަ އަހަރުގެ އާންމު އިންތިޚާބު ކާމިޔާބު ކުރެވުނު ކަމަށެވެ. އޭގެ ފަހުން މި ފާއިތުވި ދެ އަހަރުގެ ތެރޭގައި، ސަރުކާރުން ޤައުމުގެ އިޤްތިޞާދު އެއް ހަމައެއްގައި ހިފަހައްޓައި ދީފައިވާ ކަމަށް ސްޓާމަރ ވިދާޅުވި އެވެ.
މީގެ އިތުރުން ސްޓާމަރ ވިދާޅުވީ، ދެން ބޮޑު ވަޒީރުގެ މަޤާމަށް ވަޑައިގަންނަވާ ބޭފުޅަކަށް ވެސް ތަރުތީބު ކުރެވިފައިވާ މަސައްކަތް ތަކެއް ލިބިވަޑައިގަންނަވާނެ ކަމަށާއި، ލޭބާ ޕާޓީ އަށް ކުރިއަށް އޮތް އިންތިޚާބު ކާމިޔާބު ކުރެވެން ޖެހޭނެ ކަމަށެވެ. އެއާ އެކު ސްޓާމާ ވިދާޅުވީ، ބާކީ އޮތް ދުވަސް ތަކުގައި ވެސް ރަނގަޅު މަަސައްކަތް ތަކެއްކޮށް، ހެޔޮ ގޮތުގައި ވަކިވެގެން ދާން ބޭނުންވާ ކަމަށެވެ.
ސިޔާސީ މުސްތަޤުބަލާ ގުޅޭ ގޮތުން ސްޓާމާ ވިދާޅުވީ، ބޮޑު ވަޒީރު ކަމުން ވަކިވުމަށް ފަހު އޭނާގެ ސިޔާސީ ޙަޔާތް ނިމުނީ ކަމަށެވެ. އެކަން ވަރަށް ސާފުކޮށް ދަންނަވަން ބޭނުންވާ ކަމަށާއި، ނަމަވެސް އެކުގައި މަސައްކަތް ކުރެއްވި އެހެން ބޭފުޅުންގެ ސިޔާސީ ޙަޔާތް ނިމުމަކަށް ނާންނާނެ ކަމަށް ސްޓާމަރ ވިދާޅުވި އެވެ. އެބޭފުޅުން ވެސް މަސައްކަތް ކުރަންވާނީ ކާމިޔާބު ހޯދުމަށް ކަމަށް ސްޓާމަރ ވިދާޅުވި އެވެ.
މީގެ އިތުރުން ސްޓާމަރ ވިދާޅުވީ ސިޔާސީ މައިދާނަށް ނިކުންނެވީ، ބޮޑު ވަޒީރުކަން ކުރަން ބޭނުން ވެގެން ނޫން ކަމަށެވެ. އަދި ސިޔާސީ ދާއިރާގެ ނިމުން އަންނަން ބޭނުންވީ މިހާރު އޮތް ގޮތަށް ނޫން ކަމަށް ވެސް ސްޓާމާ ވަނީ ވިދާޅުވެފައި އެވެ. ނަމަވެސް، އެންމެ އިޚުލާސްތެރިކަމާ އެކު އެކަން ޤަބޫލު ކުރާ ކަމަށް ސްޓާމަރ ފާހަގަ ކުރެއްވި އެވެ.
ސްޓާމަރގެ ފަހުން ބޮޑު ވަޒީރުގެ މަޤާމަށް ވަޑައިގަންނަވާނެ ކަމަށް ބެލެވޭ އެންޑީ ބާންހަމްއާ ގުޅޭ ގޮތުން ސްޓާމަރ ވިދާޅުވީ، ބާންހަމް އަކީ ވަރަށް ރަނގަޅު ބޭފުޅެއް ކަމަށާއި، އަބަދު ވެސް އޭނާއާ އޮންނަނީ ރަނގަޅު ގުޅުމެެއް ކަމަށެވެ. ބާންހަމްއާ މެދު އެއްވެސް ހިތްހަމަ ނުޖެހުމެއް ނެތް ކަމަށާއި، އޭނާ އަށް ކާމިޔާބަށް އެދިވަޑައިގަންނަވާ ކަމަށް ސްޓާމަރ ވިދާޅުވި އެވެ.
މަސްދަރު: އިންޑިޕެންޑެންޓް
