ބޮލުގައި ލާ ޖެލް އަކީ ދައުލަތުގެ ސިއްރެއް، ނަމެއް ނުބުނެވޭނެ: ބޮޑު ވަޒީރު ސްޓާމާ

ބޮލުގައި ލާ  ހެއާ ޖެލް ނުވަތަ އިސްތަށިގަނޑު ރީތި ކުރެއްވުމަށް ބޭނުން ކުރައްވާ އުފެއްދުމަކީ ދައުލަތުގެ ސިއްރެއް ކަމަށާއި، އެ ޖެލްގެ ނަން ނުބުނެވޭނެ ކަމަށް އިނގިރޭސިވިލާތުގެ ބޮޑު ވަޒީރު ކިއާ ސްޓާމާ ވިދާޅުވެއްޖެ އެވެ.

ސްޓާމާ މިހެން ވިދާޅުވެފައި ވަނީ، ދާދި ފަހުން ދެއްވި އިންޓަވިޔުއެއްގައި އެވެ. އެ އިންޓަވިޔުގައި ސްޓާމާ ވަނީ އާންމު ރައްޔިތުންގެ ފަރާތުން ކުރިމަތިވި ބައެއް ސުވާލު ތަކަށް ޖަވާބު ދެއްވައިފަ އެވެ. އެގޮތުން އެކަކު ވަނީ، އިސްތަށިގަނޑު ރީތި ކުރެއްވުމަށް ބޭނުން ކުރައްވާ ޖެލް އަކީ ކޮބައިތޯ ސުވާލު ކޮށްފައި އެވެ. 

މަޖާޒީ ގޮތެއްގައި އެ ސުވާލަށް ޖަވާބު ދެއްވަމުން ސްޓާމާ ވިދާޅުވީ، އޭނާ ބޭނުން ކުރައްވާ ހެއާ ޖެލްގެ ބްރޭންޑަކީ "ސަރުކާރުގެ ސިއްރެއް" ކަމަށެވެ. އެހެންކަމުން އެ މައުލޫމާތު އާންމު ކުރެވެން ނެތް ކަމަށް ވެސް ސްޓާމާ ވަނީ ވިދާޅުވެފައި އެވެ. އެކަމަށް އުސޫލެއް އޮންނަ ކަމަށާއި، އެއީ ވަރަށް ހައްސާސް މައުލޫމާތު ތަކެއް ކަމަށް ވެސް ސްޓާމާ ވިދާޅުވެފައިވެ އެވެ. 

އެއާ އެކު ސްޓާމާ ވިދާޅުވީ، 30 އަހަރު ވަންދެން އެ މައުލޫމާތަކީ އާންމު ކުރެވޭނެ މައުލޫމާތެއް ނޫން ކަމަށެވެ. ނަމަވެސް، ކޮންމެ ވެސް ދުވަހަކު އޭގެ ނަން ބުނެވިދާނެ ކަމަށް ސްޓާމާ ވިދާޅުވި އެވެ. އެހެން ވިދާޅުވުމާ އެކު ވެސް ސްޓާމާ ވަނީ، ހެއާ ޖެލްގެ ނަން ވިދާޅުވެފައި އެވެ. ނަމަވެސް، އިންޓަވިޔުގެ އެ ހިސާބުގަައި އިންނަނީ "ބީޕް" އަޑު ކޮޅެއް ބޭނުން ކޮށްފައި އެވެ.

ސްޓާމާގެ އިސްތަށިގަނޑު ހުންނަ ގޮތާ މެދު، އާންމުންގެ ތެރޭގައި އަބަދު ވެސް ގިނަ ވާހަކަ ތަކެއް ދެކެވެ އެވެ. ބޮޑު ވަޒީރުގެ މަޤާމަށް ވަޑައިގެންނެވުމުގެ ކުރިން ވެސް، އިސްތަށިގަނޑާ މެދު ސްޓާމާ ގެންގުޅުއްވާ ސަމާލުކަން ވަރަށް ބޮޑަށް ފާހަގަވެގެން ގޮސްފައިވެ އެވެ. ސްޓާމާގެ އިސްތަށިގަނޑު ހުންނަ ގޮތާ މެދު މާކަސް ދިނުމަށް އިންސްޓަގްރާމް އެކައުންޓެއް ވެސް ބައެއް ފަރާތްތަކުން ހިންގަ އެވެ. ދާދި ފަހުން ސްޓާމާ ވަނީ އެ އެކައުންޓު ހިންގަމުން އަންނަ ފަރާތާ ވެސް ބައްދަލު ކުރައްވައިފަ އެވެ. 

އެ އިންޓަވިޔުގައި ސްޓާމާ އިތުރަށް ވިދާޅުވީ، އޭނާގެ އަމިއްލަ ސިފަ އަށް ވުރެ ބޮޑަށް ޤައުމީ މުހިންމު މައްސަލަ ތަކަށް އިސްކަން ދެއްވާ ކަމަށެވެ. މީގެ ކުރިން ވެސް ސްޓާމާ ވަނީ މިފަދަ ބައެއް ސުވާލު ތަކަށް މަޖާޒީ ގޮތެއްގައި ޖަވާބު ދެއްވައިފަ އެވެ. 

އިނގިރޭސިވިލާތުގެ ސިޔާސީ ލީޑަރުންގެ އަމިއްލަ ދިރިއުޅުމާއި، ގެންގުޅުއްވާ ބައެއް އާދަތަކާ ގުޅޭ ގޮތުން މީގެ ކުރިން ވެސް މީޑިއާ ތަކުގައި ވާހަކަ ދެކެވިފައި އެވެ. އެގޮތުން ކުރީގެ ބޮޑު ވަޒީރު ބޮރިސް ޖޯންސަންގެ އިސްތަށިގަނޑު ހޭވިފައި އޮންނައިރު، އެކަމަށް ެވސް ގިނަ ބައެއްގެ ސަމާލުކަން އޭރު ލިބިފައިވެ އެވެ.