ސްޓާމަރގެ އަރިސް ބޭފުޅެއްގެ ގޮތުގައި ހުންނެވި ހޮލީ ރިޑްލީ، ލޭބަރ ޕާޓީގެ ޖެނަރަލް ސެކްރެޓަރީގެ މަގާމުން އިސްތިއުފާ ދެއްވަނީ

އިނގިރޭސިވިލާތުގައި ވެރިކަން ކުރަމުން އަންނަ ލޭބަރ ޕާޓީގެ ޖެނެރަލް ސެކްރެޓަރީގެ މަގާމުގައި ހުންނެވި ހޮލީ ރިޑްލީ، މިއަހަރުގެ ފަހު ކޮޅު އެ މަގާމުން އިސްތިއުފާ ދެއްވާނެ ކަމަށް އިއުލާން ކުރައްވައިފި އެވެ.

ރިޑްލީ އަކީ، އިނގިރޭސިވިލާތުގެ ބޮޑު ވަޒީރު ކިއާ ސްޓާމަރ އާއި ގާތް ގުޅުމެއް އޮންނަ، ސްޓާމަރގެ އަރިސް ބޭފުޅެކެވެ. މަގާމުން އިސްތިއުފާ ދެއްވާނެކަން އޭނާ ހާމަ ކުރައްވާފައި ވަނީ ލޭބަރ ޕާޓީގެ މުވައްޒަފުންނަށް ފޮނުއްވާފައިވާ އެތެރޭގެ އީމެއިލެއްގައި އެވެ. 

އެންމެ ފަހުން އޮތް އާންމު އިންތިޚާބުގައި ލޭބަރ ޕާޓީ އަށް ލިބުނު ބޮޑު ކާމިޔާބުގައި މުހިންމު ދައުރެއް އަދާ ކުރެއްވި ހޮލީ ރިޑްލީ މަގާމުންް ވަކިވެ ވަޑައިގަންނަވާނީ މިއަހަރުގެ ސެޕްޓެމްބަރު މަހު ބޭއްވުމަށް ހަމަޖެހިފައިވާ އެ ޕާޓީގެ އަހަރީ ކޮންފަރެންސް އަށް ފަހު އެވެ. އޭނާ ވިދާޅުވި ގޮތުގައި މަގާމުން ވަކިވެ ވަޑައިގެންނެވުމަށް ނިންމެވީ އަމިއްލަ ބައެއް ސަބަބުތަކަށްޓަކައި އެވެ. 

މީގެ އިތުރުން އޭނާ ވިދާޅުވީ ޕާޓީގެ އައު ލީޑަރަކު އިންތިޚާބު ވުމުން، އެ ބޭފުޅަކާ އެކު މަސައްކަތް ކުރާނެ އައު ޖެނެރަލް ސެކްރެޓަރީ އަކު އައްޔަން ކުރުމުގެ ފުރުސަތު ޕާޓީގެ ނޭޝަނަލް އެގްޒެކެޓިވް ކޮމިޓީ އަށް ދިނުމަކީ އެންމެ ރަނގަޅު ގޮތް ކަމަށް ވެސް ޤަބޫލު ކުރައްވާ ކަމަށެވެ.

ބޮޑު ވަޒީރު ސްޓާމަރ ވަނީ، މަގާމުން އިސްތިއުފާ ދެއްވާނެކަން ނިމުނު ޖޫން މަހު އިއުލާން ކުރައްވައިފަ އެވެ. އެއާ އެކު، ސްޓާމަރގެ ބަދަލުގައި ދެން އެ މަގާމަށް ވަޑައިގަންނަވާނެ ކަމަށް ބެލެވެނީ އެންޑީ ބާންހަމް އެވެ. ލޭބަރ ޕާޓީގެ ޖެނެރަލް ސެކްރެޓަރީގެ މަގާމަކީ ނުފޫޒު ގަދަ މަގާމަކަށް ވާއިރު، ސްޓާމަރ އާއި އެއްގޮތަށް ބާންހަމް ވެސް ބޭނުންފުޅު ވަނީ އެ މަގާމަށް އޭނާގެ އަރިސް ބޭފުޅަކު އައްޔަން ކުރެއްވުމަށެވެ. ރިޑްލީ ވަނީ އޭނާގެ ނިންމެވުން ބާންހަމްގެ ޓީމަށާއި، ޕާޓީގެ އިސްވެރިންނަށް ވެސް އަންގަވައިފަ އެވެ.

ރިޑްލީ ލޭބަރ ޕާޓީއާ ގުޅިވަޑައިގަތީ އުމުރުން އެންމެ 22 އަހަރުގައި އެވެ. އެއީ 2011 ވަަނަ އަހަރު އެވެ. އޭނާ ސިޔާސީ ދާއިރާ އަށް ނުކުންނެވީ އޭނާ ބޮޑުވި އީސްޓް ލަންޑަންގެ ޑެގަންހަމްގައި ބްރިޓިޝް ނޭޝަނަލް ޕާޓީގެ ނުފޫޒު ގަދަވަމުން ދިއުމާ ދެކޮޅަށް މަސައްކަތް ކުރެއްވުމަށެވެ. ޕާޓީގެ ތެރޭގައި ތަފާތު އެކި މަގާމުތައް ފުރުއްވާފައިވާ ރިޑްލީ އަކީ ޕާޓީގެ އިސް ސަފަށް އަންހެނުން ގެނައުމުގައި ނަމޫނާ ބޭފުޅެއްގެ ގޮތުގައި ބެލެވޭ ބޭފުޅެކެވެ.

ބޮޑުވަޒީރު ސްޓާމަ ވަނީ ރިޑްލީ އަށް ވަރަށް ބޮޑަށް ތައުރީފު ކުރައްވާފައި އެވެ. އެގޮތުން ސްޓާމަރ ވިދާޅުވީ ރިޑްލީ އަކީ ލޭބަރ ޕާޓީ އިން މިހާތަނަށް ދުށް އެންމެ ވަރުގަދަ ކެމްޕެއިން މެނޭޖަރު ކަމަށާއި، އާންމު އިންތިޚާބުގެ ކާމިޔާބީގެ ފަހަތުގައި އޮތް ބާރަކީ އޭނާ ކަމަށެވެ. އަދި ޖެނެރަލް ސެކްރެޓަރީގެ ގޮތުގައި އޭނާ ކުރެއްވި ޚިދުމަތަށްޓަކައި ސްޓާމަރ ވަނީ ޝުކުރު އަދާ ކުރައްވާފައި އެވެ.

ލޭބާ ޕާޓީގެ ޖެނެރަލް ސެކްރެޓަރީގެ މަގާމާ ރިޑްލީ ހަވާލުވެ ވަޑައިގަތީ 2024 ވަނަ އަހަރުގެ ސެޕްޓެމްބަރު މަހުގެ ތެރޭގައި އެވެ. އޭނާ އެ މަގާމަށް އައްޔަން ކުރެވުނީ އެ މަގާމުގައި ގިނަ ދުވަސް ތަކެއް ވަންދެން ހުންނެވި ޑޭވިޑް އިވާންސްގެ ބަދަލުގައި އެވެ. މަގާމުން ވަކިވި ނަމަވެސް، އައު ސަރުކާރަށް ފުރިހަމަ އެއްބާރުލުން ދެއްވާނެ ކަމުގެ ޔަގީންކަން ރިޑްލީ ވަނީ ދެއްވާފައި އެވެ.