ވާދަވެރި މެޗުގައި ކޭޕް ވާޑް ބަލިކޮށް، އާޖެންޓީނާ ގަދަ 16 އަށް

ފީފާ ވަރލްޑް ކަޕްގައި ކޭޕް ވާޑްއާ ދެކޮޅަށް ކުޅުނު މެޗުން މޮޅުވެ، ޗެމްޕިއަން އާޖެންޓީނާ އިން މުބާރާތުގެ ގަދަ 16 އިން ޖާގަ ހޯދައިފި އެވެ.

ހޮނިހިރު ދުވަހުގެ ފަތިހު ކުޅުނު މެޗު އާޖެންޓީނާ އިން ކާމިޔާބު ކުރީ 3-2 އިންނެވެ. ވާދަވެެރި ކުޅުމެއް ފެނުނު މެޗުގައި އާޖެންޓީނާ އިން ދެ ފަަހަރު ލީޑު ނެގިއިރު ވެސް، ކޭޕް ވާޑް އިން ނަތީޖާ ހަމަހަމަ ކުރި އެވެ. 

މެޗު ފަށައިގެން ރަނގަޅަށް ކުޅެމުން ދިޔަ އާޖެންޓީނާ އިން ވަނީ 29 ވަނަ މިނެޓުގައި ލަނޑު ޖަހައި ލީޑު ނަގައިފަ އެވެ. އެ ލަނޑު އާޖެންޓީނާ އަށް ޖަހައިދިނީ ކެޕްޓަން ލިއޮނަލް މެސީ އެވެ.

ދެ ވަނަ ހާފު ފަށައިގެން 59 ވަނަ މިނެޓުގައި ކޭޕް ވާޑް އަށް ނަތީޖާ ހަމަހަމަ ކޮށްދިނީ ޑެރޯއީ ޑުއާޓޭ އެވެ. ކޭޕް ވާޑް އިން ނަތީޖާ ހަމަހަމަ ކުރި ފަހުން ވެސް، އާޖެންޓީނާ އަށް ވަނީ ލަނޑު ޖަހަން ފުރުސަތު ލިބިފައި އެވެ.

މެޗުގެ ފުރިހަމަ ވަގުތު ހަމަވީއިރު ދެ ޓީމު އެއްވަރު ވެފައިވުމުން، އިތުރު ވަގުތުގެ ދެ ހާފު ވަނީ ކުޅެފައި އެވެ. އިތުރު ވަގުތުގެ ފުރަތަމަ ހާފުގައި އާޖެންޓީނާ އަަށް ލީޑު ނަގައިދިނީ ލިސާންދްރޯ މާޓިނޭޒް އެވެ.

އާޖެންޓީނާ އިން ލީޑު ނަގައި ހަަމަ ނުޖެހެވެނީސް ކޭޕް ވާޑް އިން ދެ ވަނަ ލަނޑެއް ޖަހައި ނަތީޖާ ހަމަހަމަ ކުރި އެވެ. އެ ލަނޑު އެ ޓީމަށް ޖަހައިދިނީ ސިޑްނީ ލޮޕޭސް ކާބެލް އެވެ. 

އޭގެ ފަހުން އިތުރު ވަގުތުގެ ދެ ވަަނަ ހާފުގައި އާޖެންޓީނާ އަށް ލީޑު ލިބުނީ ކްރިސްޓިއަން ރޮމެރޯ ފޮނުވާލި ބޯޅަ ކޭޕް ވާޑްގެ ޑިނީ ބޯގްސް ގައިގައި ޖެހި ގޯލަށް ވަދެގެންނެވެ.

މުބާރާތުގެ ގަދަ 16 ގައި އާޖެންޓީނާ ނިކުންނާނީ މިޞްރާ ދެކޮޅަށެވެ.