އާޖެންޓީނާ އިން ހިތްވަރު ދޫ ނުކުރާނެ، ކަންކަން ނަގާނީ ޕޮޒިޓިވްކޮށް: ސްކަލޯނީ
4 ޖުލައި 2026 | ހޮނިހިރު 07:18މެޗާ ގުޅޭ ގޮތުން ވާހަކަ ދައްކަމުން ސްކަލޯނީ ބުނީ، އެ މެޗު ވަރަށް ބޮޑަށް އުނދަގޫވި ކަމަށާއި، އިދިކޮޅު ޓީމަކީ ވަރުގަދަ ޓީމެއް ކަމަށް. މެޗުގައި ފާހަގަ ކުރެވުނު ކަންކަން ނަގާނީ ޕޮޒިޓިވްކޮށްކަން ފާހަގަކޮށް ސްކަލޯނީ ބުނީ، އާޖެންޓީނާ އަކީ ހިތްވަރު ދޫކޮށްލާނެ ޓީމެއް ނޫން ކަމަށް.
އާޖެންޓީނާގެ ކޯޗު ލިއޮނަލް ސްކަލޯނީ. | ރޮއިޓާސް
އާޖެންޓީނާ އިން ހިތްވަރު ދޫ ނުކުރާނެ ކަމަށާއި، އެ ޓީމުން ކަންކަން ނަގާނީ ޕޮޒިޓިވްކޮށް ކަމަށް އާޖެންޓީނާގެ ކޯޗު ލިއޮނަލް ސްކަލޯނީ ބުނެފި އެވެ.
ސްކަލޯނީ މިހެން ބުނެފައި ވަނީ ފީފާ ވަރލްޑް ކަޕްގައި އާޖެންޓީނާ އިން ކޭޕް ވާޑްއާ ދެކޮޅަށް ކުޅުނު މެޗަށް ފަހު އެވެ. އެ މެޗުގައި އާޖެންޓީނާ އިން ދެ ފަހަރެއްގެ މަތިން ލީޑު ނެގިއިރު ވެސް، ކޭޕް ވާޑް އިން ނަތީޖާ ހަމަހަމަ ކުރި އެވެ. ނަމަވެސް، ތިން ވަނަ ލަނޑެއް ޖަހައިގެން އާޖެންޓީނާ ވަނީ މެޗުން މޮޅުވެފައި އެވެ.
އެ މެޗާ ގުޅޭ ގޮތުން ވާހަކަ ދައްކަމުން ސްކަލޯނީ ބުނީ، އެ މެޗު ވަރަށް ބޮޑަށް އުނދަގޫވި ކަމަށާއި، އިދިކޮޅު ޓީމަކީ ވަރުގަދަ ޓީމެއް ކަމަށެވެ. މެޗުގައި ފާހަގަ ކުރެވުނު ކަންކަން ނަގާނީ ޕޮޒިޓިވްކޮށްކަން ފާހަގަކޮށް ސްކަލޯނީ ބުނީ، އާޖެންޓީނާ އަކީ ހިތްވަރު ދޫކޮށްލާނެ ޓީމެއް ނޫން ކަމަށެވެ.
މެޗުގައި ކޭޕް ވާޑް އިން ވަނީ އެ ޓީމަކީ ވަރަަށް ވަރުގަދަ އިދިކޮޅު ޓީމެއްކަން ސާބިތު ކޮށްދީފައި ކަމަށް ސްކަލޯނީ ބުންޏެވެ. އަދި ކޭޕް ވާޑް އިން ކުރި ހިތްވަރާއި، ދެއްކި ކުޅުމަށް މަރުޙަބާ ކިޔާ ކަމަށް ވެސް ސްކަލޯނީ ވަނީ ބުނެފައި އެވެ. އެއާ އެކު ސްކަލޯނީ ބުނީ ވޯލްޑް ކަޕްގައި އެއްވެސް މެޗަކީ ފަސޭހަ މެޗަކަށް ނުވާނެ ކަމަށެވެ.
މިއީ ސްކަލޯނީގެ އިރުޝާދުގެ ދަށުން އާޖެންޓީނާ އިން ކުޅުނު 100 ވަނަ މެޗެވެ. އޭގެ ތެރެއިން 73 މެޗުން އެ ޓީމު މޮޅުވެފައިވާއިރު، 18 މެޗުން ވަނީ އެއްވަރުވެފައި އެވެ. ބަލިވެފައި ވަނީ ނުވަ މެޗަކުންނެވެ. ސްކަލޯނީގެ އިރުޝާދުގެ ދަށުން އާޖެންޓީނާ އިން ވަނީ ފީފާ ވޯލްޑް ކަޕް ކާމިޔާބު ކޮށްފައި އެވެ.
އޭގެ އިތުރުން ކޮޕާ އެމެރިކާ ދެ ފަހަރު ކާމިޔާބު ކޮށްފައިވާއިރު، ބައްރު ތަކުގެ ޗެމްޕިއަނުންގެ މެދުގައި ކުޅޭ ފައިނަލިސިމާ ވެސް އާޖެންޓީނާ އިން ވަނީ ކާމިޔާބު ކޮށްފައި އެވެ. ސްކަލޯނީ ވަނީ އާޖެންޓީނާ އިން އަބަދު ވެސް ކަންކަން ރަނގަޅު ކުރާނެ ކަމުގެ ޔަޤީންކަން ދީފައި އެވެ.
