އިސްލާމީ އިންގިލާބުގެ ލީޑަރު އަވަހާރަކޮށްލި މީހުންގެ ކިބައިން ބަދަލުހިފުމުގެ މަސައްކަތް ދުވަހަކުވެސް ހުއްޓާނުލާނެ ކަމަށް އީރާނުގެ ސިފައިންގެ ވެރިޔާ ވިދާޅުވެއްޖެ

އެމެރިކާ އާއި އިސްރާއީލުން ގުޅިގެން ދިން ވައިގެ ހަމަލާއެއްގައި އީރާނުގެ އިސްލާމީ އިންގިލާބުގެ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލިތާ ހަތަރު މަހަށްވުރެ ގިނަ ދުވަސް ވެފައިވާއިރު، އެކަމުގެ ބަދަލުހިފުމަށް ކުރާ މަސައްކަތް އީރާނުން ދުވަހަކުވެސް ހުއްޓާނުލާނެ ކަމަށް އެ ގައުމުގެ ސިފައިންގެ ވެރިޔާ ވިދާޅުވެއްޖެ އެވެ.

މޭޖަރ ޖެނެރަލް އާމިރު ހާތަމީ މިހެން ވިދާޅުވީ، އާޔަތުﷲ ޚާމަނާއީ އާއި އެމަނިކުފާނުގެ އާއިލާގެ މެންބަރުންގެ ޖަނާޒާގެ ރަސްމިއްޔާތުތައް އާންމުކޮށް ހުޅުވާލައިގެން ކުރިއަށްގެންދާ ދެވަނަ ދުވަސް ކަމަށްވާ އާދީއްތަ ދުވަހު ވާހަކަދައްކަވަމުންނެވެ.

ހާތަމީ ވިދާޅުވީ، މި ޖަރީމާ ހިންގި މީހުންނަށް އީރާނުގެ ރައްޔިތުންނާއި ސިފައިން އިންސާފު ހޯދުމަށް ކުރާ މަސައްކަތް ދުވަހަކުވެސް ހުއްޓާނުލާނެކަން އެނގެންޖެހޭނެ ކަމަށެވެ. އަދި އެ މީހުންނަށް ދޫނުދޭނެ ކަމަށާއި، މިއީ ނަތީޖާ ހާސިލްވަންދެން އީރާނުން ސާބިތުކަމާއެކު ދެމިއޮންނާނެ ނިންމުމެއް ކަމަށްވެސް އޭނާ ވިދާޅުވި އެވެ.

މިދިޔަ ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިސްރާއީލުން އީރާނަށް ދޭން ފެށި ހަމަލާތަކުގެ ފުރަތަމަ ދުވަހު، ތެހެރާންގައި ހުންނަ އާޔަތުﷲ ޚާމަނާއީގެ އޮފީހަށް އަމާޒުކޮށް ދިން ހަމަލާގައި އެމަނިކުފާނުގެ އިތުރުން އާއިލާގެ މެމްބަރުންތަކަކާއި ސިފައިންގެ އިސް ކޮމާންޑަރުންތަކެއް ވަނީ އަވަހާރަވެފަ އެވެ.

އެމެރިކާ އާއި އިސްރާއީލުގެ މި އުދުވާނާ ގުޅިގެން އީރާނުން ވަނީ ވަރުގަދަ ރައްދު ހަމަލާތަކެއް ދީފައެވެ. މީގެ ތެރޭގައި އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް ދިން ހަމަލާތަކާއި، އިސްރާއީލުން ހިފާފައިވާ ބިންތަކަށް އަމާޒުކޮށް ފޮނުވާލި މިސައިލް ހަމަލާތައް ހިމެނެ އެވެ.

އެހެންނަމަވެސް، އާޔަތުﷲ ޚާމަނާއީ އަވަހާރަކޮށްލި މައްސަލައިގައި، އެންމެ ފަހުގެ އަދި އެންމެ ވަރުގަދަ ބަދަލު ހިފުމަކަށް އީރާނުން އިންތިޒާރު ކުރަމުންދާ ކަމަށް އެ ގައުމުގެ ކަމާބެހޭ ފަރާތްތަކުން ތަކުރާރުކޮށް ދަނީ ބުނަމުންނެވެ.

އެމެރިކާ އާއި އިސްރާއީލުން ދިން ހަމަލާގައި އަވަހާރަވިއިރު ޚާމަނާއީގެ އުމުރުފުޅަކީ 86 އަހަރެވެ. އެމަނިކުފާނަކީ އީރާނުގެ އިންގިލާބަށްފަހު އެ ގައުމުގެ ތާރީޚުގައި ފާހަގަކޮށްލެވޭ ދެވަނައަށް އެންމެ ނުފޫޒުގަދަ ޝަޚުސިއްޔަތެވެ. އާޔަތުﷲ ޚާމަނާއީ ވަނީ އީރާނުގެ ރައީސްކަން ދެ ދައުރަކު ފުރުއްވުމަށްފަހު، 1989 ވަނަ އަހަރު އިންގިލާބުގެ ބާނީ އާޔަތުﷲ ޚުމައިނީގެ ފަހުން ލީޑަރުގެ މަގާމާ ހަވާލުވެވަޑައިގެންފަ އެވެ.