ރޫހާނީ ލީޑަރުގެ ޖަނާޒާގެ އިންތިޒާމުތައް ކުރަމުން ދަނިކޮށް، ހަމަލާ އެއް ނުދިނުމަށް އީރާނުން އެމެރިކާއާއި އިސްރާއީލަށް އިންޒާރު ދީފި

ހަނގުރާމައިގެ ފުރަތަމަ ދުވަހު ދިން ވައިގެ ހަމަލާތަކެއްގައި އަވަހާރަވި އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީގެ ޖަނާޒާގެ ކަންކަން ތައްޔާރުވަމުންދަނިކޮށް، އެމެރިކާއާއި އިސްރާއީލުން އީރާނަށް އެއްވެސް ހަމަލާއެއް ނުދިނުމަށް އެ ގައުމުގެ އަސްކަރީ ކޮމާންޑަރަކު ބުރާސްފަތި ދުވަހު އިންޒާރު ދެއްވައިފި އެވެ.

އީރާނުގެ ދައުލަތުގެ މީޑިއާއިން އާންމުކުރި ބަޔާނެއްގައި، ޚާތަމް އަލް-އަންބިޔާ ސެންޓްރަލް ހެޑްކުއާޓާޒްގެ ކޮމާންޑަރު އަލީ އަބްދުﷲހީ ވިދާޅުވީ، އީރާނުގެ ދުޝްމަނުން، ޚާއްސަކޮށް އެމެރިކާއާއި ޒަޔަނިސްޓް އިސްރާއީލުން ކަމެއް ނިންމާ އިރު ގޯސް ހިސާބުތަކެއް ނުޖެހުމަށް އިންޒާރު ކުރާ ކަމަށެވެ. އަދި އީރާނަށް ދޭ އެއްވެސް އުދުވާނީ ހަމަލާއަކަށް ނުވަތަ ކުރިމަތިކުރާ ނުރައްކަލަކަށް އެ ގައުމުގެ ހަތިޔާރު އެޅި ސިފައިން ދޭނެ ވަރުގަދަ ބަދަލާ މެދު ވިސްނުމަށް ވެސް އޭނާ ގޮވާލެއްވި އެވެ.

ޕާކިސްތާނުގެ ފޮރިން މިނިސްޓްރީން ބުރާސްފަތި ދުވަހު ބުނި ގޮތުގައި، އީރާނުގެ ކުރީގެ ރޫހާނީ ލީޑަރުގެ ޖަނާޒާގައި އެ ގައުމުގެ ބޮޑުވަޒީރު ޝެހްބާޒް ޝަރީފް ބައިވެރިވެވަޑައިގަންނަވާނެ އެވެ.

ޗައިނާގެ ފޮރިން މިނިސްޓްރީން ބުރާސްފަތި ދުވަހު އިއުލާންކުރި ގޮތުގައި، ޗައިނާގެ ގާނޫނު ހަދާ މަޖިލީހުގެ އިސް މެންބަރެއް ކަމަށްވާ ހީ ވޭ ވެސް މި ޖަނާޒާގައި ބައިވެރިވެވަޑައިގަންނަވާނެ އެވެ. އޭނާއަކީ ޗައިނާގެ ގާނޫނު ހަދާ މަޖިލިސް ކަމަށްވާ ނޭޝަނަލް ޕީޕަލްސް ކޮންގްރެސްގެ ސްޓޭންޑިން ކޮމިޓީގެ ނައިބު ރައީސެވެ.

އިންޑިއާއިން ބުރާސްފަތި ދުވަހު ބުނީ، ޚާމަނާއީގެ ޖަނާޒާގައި އެ ގައުމު ތަމްސީލުކުރައްވާނީ ޑެޕިއުޓީ ފޮރިން މިނިސްޓަރާއި ސްޓޭޓް ގަވަރުނަރެއް ކަމަށެވެ.

އިންޑިއާގެ ފޮރިން މިނިސްޓްރީން ނެރުނު ބަޔާނެއްގައިވާ ގޮތުން، ބިހާރުގެ ގަވަރުނަރު ސައްޔިދު އަތާ ހަސްނައިން އާއި ޑެޕިއުޓީ ފޮރިން މިނިސްޓަރު ޕަބިތުރާ މާގަރީޓާ ޖުލައި މަހުގެ 3 ވަނަ ދުވަހު އީރާނަށް ވަޑައިގަންނަވާނެ އެވެ.

އެ ބަޔާނުގައި އިތުރަށް ބުނެފައިވަނީ، މި ރަސްމިއްޔާތުގައި އިންޑިއާގެ މަތީ ފަންތީގެ ވަފުދެއް ބައިވެރިވުމަކީ ދެ ގައުމުގެ ދެމެދުގައި އޮތް ތާރީޚީ އަދި ސަގާފީ ގުޅުމާއި، ދެ ގައުމުގެ ރައްޔިތުންގެ މެދުގައި އޮތް ގާތްކަން ރަމްޒުކޮށްދޭ ކަމެއް ކަމަށެވެ. އަދި މިއީ ސިޔާސީ އަދި އިގްތިސާދީ ގުޅުންތައް ވަރުގަދަކުރުމަށް ލިބޭ ބާރެއް ކަމަށް ވެސް ބުނެފައިވެ އެވެ.

ޚާމަނާއީގެ ޖަނާޒާގެ ހަރަކާތްތައް ޖުލައި 4 ވަނަ ދުވަހު ތެހެރާނުގައި ފެށުމަށް ހަމަޖެހިފައިވާއިރު، ޖުލައި 9 ވަނަ ދުވަހު އޭނާގެ އުފަން ރަށް ކަމަށްވާ މަޝްހަދުގައި ފަސްދާނުލުމާ ހަމައަށް މި ހަރަކާތްތައް ކުރިއަށްދާނެ އެވެ. މީގެ އިތުރުން ގުމް އަދި އިރާގުގައި ވެސް ޚާއްސަ ރަސްމިއްޔާތުތަކެއް ބޭއްވުމަށް ވަނީ ރޭވިފަ އެވެ.

އީރާނުގެ މިހާރުގެ ރޫހާނީ ލީޑަރު މުޖުތަބާ ޚާމަނާއީ އަވަހާރަކޮށްލާނެ ކަމަށް އިސްރާއީލުގެ ޑިފެންސް މިނިސްޓަރު އިސްރާއީލް ކާޓްޒް ދެއްވި އިންޒާރާ ގުޅިގެން، އީރާނުގެ ފޮރިން މިނިސްޓަރު އައްބާސް އަރާގްޗީ ވެސް ބުދަ ދުވަހު ވަނީ މިފަދަ އިންޒާރެއް ދެއްވާފަ އެވެ. އޭނާ ވިދާޅުވީ އީރާނުގެ ރައްޔިތުންނަށް ނުވަތަ ލީޑަޝިޕަށް ކުރިމަތިވާ ކޮންމެ ނުރައްކަލަކަށް ވަގުތުން ވަރުގަދަ ރައްދެއް ދޭނެ ކަމަށެވެ.

އީރާނުގެ މީޑިއާތަކުން ރިޕޯޓްކޮށްފައިވާ ގޮތުގައި ޖަނާޒާގެ ދުވަސްވަރު ސަލާމަތީ ފިޔަވަޅުތައް ވަނީ ވަރަށް ބޮޑަށް ވަރުގަދަކޮށްފަ އެވެ. އަދި އީރާނުގެ ސިވިލް އޭވިއޭޝަން އޯގަނައިޒޭޝަންގެ އިސްވެރިޔާ ބުދަ ދުވަހު ވިދާޅުވީ، ތެހެރާނާއި މަޝްހަދު ހިމެނޭހެން ބައެއް ސިޓީތަކުގެ ވައިގެ ސަރަހައްދު ވަގުތީ ގޮތުން ބަންދުކުރާނެ ކަމަށެވެ.