ތެލުގެ އަގު އިންތިހާއަށް އުފުލުމުގެ ސަބަބުން މާލީ ގޮތުން ބޮޑެތި ގޮންޖެހުންތަކެއް ކުރިމަތިވެފައިވާ ސްޕިރިޓް އެއާލައިންސް އިން ވިޔަފާރި ހުއްޓާލަން ނިންމައިފި

އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ދޭން ނިންމި 500 މިލިއަން ޑޮލަރު (368 މިލިއަން ޕައުންޑް) ގެ ބެއިލްއައުޓް ނުވަތަ މާލީ އެހީތެރިކަން ކާމިޔާބު ނުވުމާ ގުޅިގެން، ސްޕިރިޓް އެއާލައިންސްގެ ވިޔަފާރި އެއްކޮށް ހުއްޓާލަން ނިންމައިފިއެވެ.

އަގުހެޔޮކޮށް ދަތުރުތައް ބާއްވަމުން އައި މި އެއާލައިން ބަނގުރޫޓުވިޔަނުދީ ސަލާމަތްކުރުމަށްޓަކައި، އެމެރިކާ ސަރުކާރާއެކު މީގެ ކުރިން ވަނީ މަޝްވަރާތަކެއް ކޮށްފައެވެ.

ނަމަވެސް، އެ މަޝްވަރާތައް ނާކާމިޔާބުވުމާ ގުޅިގެން، އެ އެއާލައިންގެ ވެބްސައިޓުގައި ހޮނިހިރު ދުވަހު އާންމުކުރި ބަޔާނެއްގައި ބުނެފައިވަނީ، އެއާލައިންގެ އޮޕަރޭޝަންތައް ވަގުތުން ހުއްޓާލުމުގެ މަސައްކަތް މިހާރު ފަށާފައިވާ ކަމަށެވެ.

ފަހުގެ ތާރީޚެއްގައި ދެވަނަ ފަހަރަށް ބަނގުރޫޓުވުމުން ސަލާމަތްވުމަށް ސްޕިރިޓް އެއާލައިންސްއިން މަސައްކަތް ކުރަމުން ދަނިކޮށް، އީރާނުގައި އެމެރިކާ އާއި އިޒްރޭލުން ކުރަމުންދާ ހަނގުރާމައިގެ ސަބަބުން މަތިންދާބޯޓަށް އަޅާ ތެލުގެ އަގު އިންތިހާއަށް އުފުލިގެން ދިއުމަކީ އެ އެއާލައިން މުޅިން އިނދަޖެހިގެން ދިޔަ ސަބަބެވެ.

މި ނިންމުމާއެކު، ސްޕިރިޓް އެއާލައިންސްއިން ކުރިއަށް ރާވާފައި ހުރި ހުރިހާ ފްލައިޓްތަކެއް މިހާރު ވަނީ ކެންސަލްކޮށްފައެވެ.

ހޮނިހިރު ދުވަހު ނެރުނު ބަޔާނުގައި އެއާލައިނުން ބުނީ، ކްރެޑިޓް ނުވަތަ ޑެބިޓް ކާޑު ބޭނުންކޮށްގެން ޓިކެޓް ގަނެފައިވާ ފަރާތްތަކަށް، އެ ފައިސާ ދެއްކި އެކައުންޓަކަށް އޮޓޮމެޓިކުން ރިފަންޑް ޖަމާކޮށްދޭނެ ކަމަށެވެ.

އެއާލައިނެއްގެ ޖުމްލަ ޚަރަދުގެ 40 އިންސައްތައަކީ ތެލުގެ ޚަރަދަށް ވާއިރު، ފެބްރުއަރީ މަހުގެ ފަހުކޮޅު އެމެރިކާ އާއި އިޒްރޭލުން ދޭން ފެށި ހަމަލާތަކާ ގުޅިގެން މަތިންދާބޯޓަށް އަޅާ ތެލުގެ އަގު ވަނީ ދެގުނައަށް އުފުލިފައެވެ.

އިންވެސްޓްމަންޓް ބޭންކެއް ކަމަށްވާ ރޭމަންޑް ޖޭމްސްގެ އެއާލައިން އެނަލިސްޓް ސަވަންތީ ސައިތު ވިދާޅުވީ، އީރާނު ހަނގުރާމައާ ގުޅިގެން ތެލުގެ އަގު އިންތިހާއަށް އުފުލުމަކީ ސްޕިރިޓް އެއާލައިންސް މުޅިން ހުއްޓުމަކަށް އައުމަށް ދިމާވި އެންމެ ބޮޑު ސަބަބު ކަމަށެވެ.

ބީބީސީއަށް މައުލޫމާތު ދެއްވަމުން ސައިތު ވިދާޅުވީ، 2024 ވަނަ އަހަރުގެ ބަނގުރޫޓުވުމުގެ މަރުހަލާގައި އެއާލައިނަށް ގެންނަންޖެހޭ ބޮޑެތި ބަދަލުތައް ގެނައުމަށް އެ ކުންފުނިން ފަސްޖެހިފައިވާ ކަމަށެވެ.

އޭނާ އިތުރަށް ވިދާޅުވީ، މިހާރު ކުރިއަށްދާ ބަނގުރޫޓުވުމުގެ މަރުހަލާގައި، ދަތުރުތައް މަދުކޮށް އަދި ބޯޓުތަކުގެ އަދަދު މަދުކުރުން ފަދަ މުހިންމު ބަދަލުތަކެއް ސްޕިރިޓްއިން ގެންނަން ފަށާފައިވާ ކަމަށެވެ.

ނަމަވެސް، އީރާނު ހަނގުރާމަ ފެށުމުގެ ކުރިންވެސް، މި އަހަރުގެ ނިޔަލަށް އެ އެއާލައިން ހިންގިދާނެތޯ ވަނީ ސުވާލު އުފެދިފައި ކަމަށް ސައިތު ފާހަގަކުރެއްވިއެވެ.

"ތެލުގެ އަގަށް މި ބަދަލު ނައި ނަމަ، ހޫނު މޫސުމުގެ ނިޔަލަށް އެއާލައިން ހިންގުނީސް. އެކަމަކު އޭގެ ފަހުންވެސް އެއާލައިން އޮތީ ވަރަށް ނާޒުކު ފައްތަރެއްގައި،" ސައިތު ވިދާޅުވިއެވެ. ތެލުގެ އަގު ބޮޑުވުމާ ގުޅިގެން ބައެއް އެއާލައިންތަކުން ދަތުރުތައް މަދުކޮށްފައިވާއިރު، އަނެއްބައި އެއާލައިންތަކުން ވަނީ ޓިކެޓުގެ އަގު ބޮޑުކޮށްފައެވެ. ހަމައެއާއެކު، ކުރިއަށް އޮތް ހަ ހަފުތާގެ ތެރޭގައި ޔޫރަޕުން މަތިންދާބޯޓަށް އަޅާ ތެޔޮ ހުސްވެދާނެ ކަމުގެ އިންޒާރު އިންޓަނޭޝަނަލް އެނާޖީ އެޖެންސީ (އައި.އީ.އޭ) ގެ ވެރިޔާ ވަނީ ދެއްވާފައެވެ.

އޭޕްރީލް މަހުގެ ނިޔަލަށް ސްޕިރިޓް އެއާލައިންސްއިން އުންމީދުކޮށްގެން ތިބީ ޓްރަމްޕްގެ ސަރުކާރާއެކު ވެވޭ އެހީގެ އެއްބަސްވުން ވަރަށް އަވަހަށް ނިމުމަކަށް އަންނާނެ ކަމަށެވެ.

ނަމަވެސް އެ އެއްބަސްވުން ނާކާމިޔާބުވުމުން، ހުކުރު ދުވަހު ޓްރަމްޕް ބީބީސީގެ ޕާޓްނަރެއް ކަމަށްވާ ސީ.ބީ.އެސްއަށް ވިދާޅުވީ، އެއާލައިން ހިންގުމަށްޓަކައި "އެންމެ ފަހުގެ ހުށަހެޅުމެއް" ހުށަހަޅާފައިވާނެ ކަމަށެވެ.

އެމެރިކާ ސަރުކާރުން އެއާލައިންގެ 90 އިންސައްތަ ހިއްސާ ނަގައިގެން ހިންގުމަށް ކުރިން ރޭވި ރޭވުމަށް، ވޯލް ސްޓްރީޓާއި، ކެޕިޓަލް ހިލްގެ އިތުރުން ޓްރަމްޕްގެ ކެބިނެޓްގެ މެންބަރެއްގެ ފަރާތުންވެސް ވަނީ ބޮޑު ދެކޮޅުވެރިކަމެއް ކުރިމަތިވެފައެވެ. ޓްރާންސްޕޯޓް ސެކްރެޓަރީ ޝޯން ޑަފީ ރޮއިޓާސްއަށް ވިދާޅުވީ، މިފަދަ އެހީއެއް ދިނުމަކީ "ބޭކާރުވެފައިވާ ކަމަކަށް އިތުރު ފައިސާތަކެއް އުކާލުން" ފަދަ ކަމެއް ކަމަށެވެ.