ޚާމަނާއީގެ ޖަނާޒާ ގެ ރަސްމިއްޔާތުތައް ފެށިއްޖެ

އީރާނުގެ ކުރީގެ އެންމެ މަތީ ވެރިޔާ އާޔަތުﷲ އަލީ ޚާމަނާއީގެ ޖަނާޒާގެ ރަސްމިއްޔާތުތައް ޖުލައި މަހުގެ 3 ވާ ހުކުރު ދުވަހުން ފެށިގެން ޖުލައި 9 ވާ ބުރާސްފަތި ދުވަހުގެ ނިޔަލަށް އީރާނާއި އިރާގުގެ އެކި ސިޓީތަކުގައި ކުރިއަށްދާނެ ކަމަށާއި، އޭނާ ފަސްދާނުލުން އޮންނާނީ މަޝްހަދުގައި ކަމަށް އިއުލާންކޮށްފި އެވެ.

މެދުއިރުމަތީގެ ހަނގުރާމަ ފެށުމަށް މެދުވެރިވި އެމެރިކާ އާއި އިސްރާއީލުގެ ހަމަލާތަކުގައި އަވަހާރަވި އީރާނުގެ އެންމެ މަތީ ވެރިޔާގެ ހަށިކޮޅު، ޖަނާޒާގެ ކުރިން ތެހެރާންގެ ގްރޭންޑް މުސައްލާއަށް ހުކުރު ދުވަހު ގެނެސްފައިވާ ކަމަށް އެ ގައުމުގެ ދައުލަތުގެ މީޑިއާތަކުން ވަނީ ރިޕޯޓުކޮށްފަ އެވެ.

އަލީ ޚާމަނާއީގެ ރަސްމީ ޖަނާޒާގައި އެތައް މިލިއަން ރައްޔިތުންނާއި ބޭރު ގައުމުތަކުގެ އިސްވެރިން ބައިވެރިވެވަޑައިގަންނަވާނެ ކަމަށް ބެލެވޭއިރު، އޭނާ އަވަހާރަކޮށްލުމުގެ ބަދަލުހިފުމުގެ ރޫހުގައި ގިނަ އަދަދެއްގެ ބަޔަކު މި ރަސްމިއްޔާތަށް ނުކުތުމަށް އީރާނުގެ ޗީފް ނެގޯޝިއޭޓަރު ވަނީ ގޮވާލައްވާފަ އެވެ.

އީރާނުގެ ދިދައިން ނިވާކޮށްފައިވާ ޚާމަނާއީގެ ސަންދޯއްޕުޅު، އެ ގައުމުގެ އެންމެ މުހިންމު އެއް މަރުކަޒު ކަމަށްވާ ގްރޭންޑް މުސައްލާއަށް ވައްދާ މަންޒަރު ފެންނަ ފޮޓޯތައް ވަނީ އާންމުވެފަ އެވެ.

މީގެ އިތުރުން، ޖަނާޒާގެ ކުރިން ބޭއްވި ރަސްމިއްޔާތެއްގައި ކަޅު ހެދުމުގައި ތިބި ގިނަ އަދަދެއްގެ ބަޔަކު އެއްވެފައިވާ މަންޒަރާއި، ރަތް ފިނިފެންމަލުން ޒީނަތްތެރިކޮށްފައިވާ މައިދާނެއްގައި ސަންދޯއްޕުޅު ބާއްވާފައި އޮތް މަންޒަރު ފެންނަ ފޮޓޯތަކާއި ވީޑިއޯތައް ވެސް ވަނީ އާންމުވެފަ އެވެ.

ހަނގުރާމަ ވަރުގަދަވުމުގެ ސަބަބުން ފަސްކުރެވުނު ޚާމަނާއީގެ ޖަނާޒާގެ ރަސްމިއްޔާތުތައް މިހާރު ކުރިއަށްދަނީ، ހަނގުރާމަ ހުއްޓާލުމަށް އީރާނާއި އެމެރިކާއާ ދެމެދު ވެވުނު ވަގުތީ އެއްބަސްވުމަކަށްފަހު ގާއިމުވެފައިވާ ނާޒުކު ސުލްހައިގެ މާހައުލެއްގަ އެވެ.

އެމެރިކާ އާއި އީރާނާ ދެމެދު ކުރިއަށްދިޔަ މަޝްވަރާތަކުގައި މުހިންމު ދައުރެއް އަދާކުރި ޕާކިސްތާނުން ބުނީ، އެ ގައުމުގެ ބޮޑުވަޒީރު ޝެހްބާޒް ޝަރީފް މި ޖަނާޒާގައި ބައިވެރިވެވަޑައިގަންނަވާނެ ކަމަށެވެ.

ޗައިނާ އާއި އަފްޣާނިސްތާނުގެ އިތުރުން ދުނިޔޭގެ އެތައް ގައުމުތަކުން ވެސް މި ރަސްމިއްޔާތަށް މަންދޫބުން ފޮނުވާނެ ކަމަށް ވަނީ ބުނެފަ އެވެ.

ބުރާސްފަތި ދުވަހު މަސައްކަތްތެރިން ގްރޭންޑް މުސައްލާ ތައްޔާރުކުރުމުގެ މަސައްކަތް ކުރަމުންދިޔައިރު، ސަލާމަތީ ބާރުތަކުން ދިޔައީ އެ ސަރަހައްދުން ދަތުރުކުރާ އުޅަނދުތައް ހުއްޓުވައި ބަލައިފާސްކުރަމުންނެވެ.

އީރާނުގެ ޗީފް ނެގޯޝިއޭޓަރު މުހައްމަދު ބާގިރު ގަލީބާފް ބުރާސްފަތި ދުވަހު ވަނީ، އީރާނުގެ ހުރިހާ ރައްޔިތުން މި ރަސްމިއްޔާތުގައި ބައިވެރިވެ، އިސްލާމީ އީރާނުގެ ތާރީޚުގައި ފަޚުރުވެރި ސަފުހާއެއް ލިޔުމަށް ގޮވާލައްވާފަ އެވެ.

އީރާނުގެ ޕާލަމެންޓުގެ ރައީސްކަން ވެސް ކުރައްވާ ގަލީބާފް ނެރުއްވި ބަޔާނެއްގައި ވިދާޅުވީ، ބަދަލުހިފުމަށް އެދި ގައުމުގެ ރައްޔިތުން ގޮވާލާ ގޮވުން މުޅި ދުނިޔޭގެ ކަންފަތްތަކަށް އިވޭންޖެހޭނެ ކަމަށެވެ.

ޚާމަނާއީ އަވަހާރަވީ އުމުރުފުޅުން 86 އަހަރުގަ އެވެ. އޭނާ އަވަހާރަވީ އީރާނުގެ ވެރިރަށް ތެހެރާންގެ މެދުތެރޭގައި ހުންނަ އޭނާގެ ރަސްމީ ގަނޑުވަރަށް ދިން ހަމަލާތަކުގަ އެވެ.

ޚާމަނާއީގެ ހަށިކޮޅު ތިން ދުވަސް ވަންދެން ބޭއްވުމަށް ހަމަޖެހިފައިވަނީ އޭނާގެ ފޮޓޯފުޅުތަކާއި އިބުރަތްތެރި ބަސްފުޅުތައް ހިމެނޭ ބެނާތަކުން ޒީނަތްތެރިކޮށްފައިވާ ބިޔަ ގްރޭންޑް މުސައްލާގަ އެވެ.

މީގެ އިތުރުން، އެ ހަމަލާގައި އަވަހާރަވި އޭނާގެ އާއިލީ ބޭފުޅުންގެ ހަށިކޮޅުތައް ވެސް އެތަނުގައި ބޭއްވުމަށް ވަނީ ހަމަޖެހިފަ އެވެ.

އެކި ސިޓީތަކުގައި ބޭއްވޭ ހަރަކާތްތައް 

އޮފިޝަލުން ލަފާކުރާ ގޮތުގައި މި ޖަނާޒާގެ ރަސްމިއްޔާތުތަކުގައި 15 އާއި 20 މިލިއަނާ ދެމެދުގެ އަދަދަކަށް މީހުން ބައިވެރިވާނެ އެވެ. މިއީ އެ ގައުމުގެ ތާރީޚުގައި ބޭއްވޭ އެންމެ ބޮޑު ޖަނާޒާއަށް ވާނެއެވެ.

ގަލީބާފް ސިފަކުރެއްވި ގޮތުގައި މިއީ އީރާނުގެ ތާރީޚުގައި އަންނާނެ "އެންމެ މުހިންމު އެއް ވަގުތެވެ."

ޖަނާޒާގެ ކަންކަން ކުރިއަށްދާއިރު، ވެރިރަށް ތެހެރާންގެ އިތުރުން، ޖަނާޒާގެ ފަހުގެ މަރުހަލާތަކާއި ފަސްދާނުލުމުގެ ރަސްމިއްޔާތު ބޭއްވުމަށް ހަމަޖެހިފައިވާ އީރާނުގެ މުގައްދަސް ސިޓީތައް ކަމަށްވާ ގުމް އަދި މަޝްހަދުގައި ބަންދު ދުވަސްތަކެއްގެ ގޮތުގައި ވަނީ ކަނޑައަޅާފަ އެވެ.

ކަމާބެހޭ ފަރާތްތަކުން ވަނީ ތެހެރާންގެ ސަރުކާރު އޮފީސްތަކާއި އަމިއްލަ އޮފީސްތައް ހޮނިހިރު ދުވަހުން ފެށިގެން ހޯމަ ދުވަހުގެ ނިޔަލަށް ބަންދުކުރުމަށް އަމުރުކޮށްފަ އެވެ. އަދި ޓްރެފިކް ކޮންޓްރޯލް ކުރުމަށް އަޅާ ފިޔަވަޅުތަކުގެ ސަބަބުން ސިޓީގެ މެދުތެރޭގެ ބޮޑު ބަޔަކަށް އަމިއްލަ އުޅަނދުތަކަށް ނުވަދެވޭނެ އެވެ.

ތެހެރާންގެ ވައިގެ ސަރަހައްދު ހުކުރު ދުވަހުން ފެށިގެން ބައެއް ގަޑިތަކުގައި ބަންދުކުރާނެ ކަމަށާއި، ހޯމަ ދުވަހު އެއްކޮށް ބަންދުވާނެ ކަމަށް ވެސް ވަނީ އިއުލާންކޮށްފަ އެވެ.

ތެހެރާންގައި ބޭއްވޭ ރަސްމިއްޔާތުތަކަށްފަހު، ޚާމަނާއީގެ ހަށިކޮޅު އިރާގުގެ މުގައްދަސް ސިޓީތައް ކަމަށްވާ ނަޖަފް އަދި ކަރުބަލާއަށް ގެންދިއުމަށް ވަނީ ހަމަޖެހިފަ އެވެ. އޭގެ ފަހުން، ޖުލައި 9 ވަނަ ދުވަހު އޭނާ ފަސްދާނުލާނީ އޭނާ އުފަންވި ރަށް ކަމަށްވާ އީރާނުގެ އިރުއުތުރުގައި އޮންނަ މަޝްހަދުގައި ހުންނަ އިމާމް ރިޒާގެ މަގުބަރާގަ އެވެ.

އެންމެ މަތީ ވެރިޔާގެ މަގާމާ ހަވާލުވެވަޑައިގަތް ފަހުން އާންމުންގެ ތެރެއަށް ނުކުމެވަޑައިގެންފައި ނުވާ ޚާމަނާއީގެ ދަރިކަލުން އަދި އޭނާގެ ފަހުން ވެރިކަމަށް ވަޑައިގަންނަވާ މުޖުތަބާ، ތެހެރާންގައި ބާއްވާ މައި ޖަނާޒާގައި ސަލާމަތީ ސަބަބުތަކަށްޓަކައި ބައިވެރިވެވަޑައިނުގަންނަވާނެ ކަމަށް ބައެއް ރިޕޯތްތައް ބުނެ އެވެ.

މި ޖަނާޒާގައި ގާތްގަނޑަކަށް 30 ގައުމެއްގެ މަންދޫބުން ބައިވެރިވާނެ ކަމަށް ބެލެވޭއިރު، އަވަށްޓެރި އިރާގާއި، އަފްޣާނިސްތާނާއި ޕާކިސްތާނުން ގިނަ އަދަދެއްގެ ބަޔަކު ދަނީ އީރާނަށް ޖަމާވަމުންނެވެ.