އީރާނުން އެމެރިކާއަށް އިންޒާރު: ހޮރްމޫޒް ކަނޑުއޮޅިއާ ގާތް ނުވާތި!
ހޮރްމޫޒް ކަނޑުއޮޅިން ދަތުރުކުރާ އުޅަނދުފަހަރު އީރާނުގެ އަސްކަރިއްޔާއާ ކޯޑިނޭޓް ކުރަންޖެހޭނެ ކަމަށާއި، އެމެރިކާގެ ސިފައިން އެ ސަރަހައްދަށް ވަދެފިނަމަ ހަމަލާދޭނެ ކަމުގެ އިންޒާރު އެ ގައުމުން ވަނީ ދީފައި. މި އިންޒާރު ދީފައިވަނީ ކަނޑުއޮޅީގައި ތާށިވެފައިވާ އުޅަނދުފަހަރު މިނިވަންކުރުމަށް އެމެރިކާއިން އެހީތެރިވާނެ ކަމަށް ރައީސް ޓްރަމްޕް ވިދާޅުވުމާ ގުޅިގެން މަސްރަހު ގޯސްވެފައިވާ ދަނޑިވަޅެއްގައި. އީރާނުން މި ފިޔަވަޅުތައް ވަރުގަދަކުރީ އެމެރިކާއާއި އިޒްރޭލުން އެ ގައުމާ ދެކޮޅަށް ފެށި ހަނގުރާމައިގައި ލީޑަރުން އަވަހާރަކޮށްލުމާ ގުޅިގެން ދިން ރައްދު ހަމަލާތަކުގެ ތެރެއިން.
ހޮރްމުޒް ކަނޑުއޮޅި ކައިރީގައިވާ އީރާނުގެ ބަނދަރުތައް ބަންދުކުރުމަށް އެމެރިކާއިން އަޅާފައިވާ ކަނޑުގެ ހުރަސްތަކާ ޚިލާފުވާން މަސައްކަތްކުރި ކަމަށް ބުނެ، އީރާނުގެ ދިދަ ނަގާފައިވާ "އެމް.ވީ. ޓޫސްކާ" ނަމަކަށް ކިޔާ އުޅަނދަކަށް އެމެރިކާގެ ސިފައިން ފާރަލަނީ. މި ހާދިސާއާ ގުޅިގެން، 2026 އޭޕްރީލް 20 ވާ ހޯމަ ދުވަހު އެމެރިކާގެ އަސްކަރީ ބާރުތަކުން ދަނީ އަރަބި ކަނޑުގެ އެ ސަރަހައްދުގައި ފޯރިމަރަމުން. | ގެޓީ އިމޭޖަސް
ބޭރުގެ އެއްވެސް އަސްކަރީ ބާރަކުން، ޚާއްސަކޮށް އެމެރިކާގެ ސިފައިން، ހޮރްމޫޒް ކަނޑުއޮޅިއާ ކައިރިވާން ނުވަތަ އެ ސަރަހައްދަށް ވަންނަން މަސައްކަތްކޮށްފިނަމަ އެ ބަޔަކަށް ހަމަލާދޭނެ ކަމުގެ އިންޒާރު އިރާނުގެ ޚާތަމުލް އަންބިޔާ ސެންޓްރަލް ހެޑްކުއާޓާޒްގެ ކޮމާންޑަރު މޭޖަރ ޖެނެރަލް އަލީ އަބްދުﷲ ދެއްވައިފިއެވެ.
ހޯމަ ދުވަހު އާންމުކުރެއްވި މެސެޖެއްގައި އޭނާ ވިދާޅުވީ، ހޮރްމޫޒް ކަނޑުއޮޅީގެ ސަލާމަތާއި ރައްކާތެރިކަން އޮތީ އިސްލާމިކް ރިޕަބްލިކް އޮފް އީރާންގެ ސިފައިންގެ ބާރުގެ ދަށުގައި ކަމަށާއި، އެ އިސްތިރާތީޖީ ކަނޑުއޮޅިން ދަތުރުކުރާ ކޮންމެ އުޅަނދަކުން ވެސް ކޮންމެ ހާލަތެއްގައި ވެސް އީރާނުގެ އަސްކަރިއްޔާއާ ކޯޑިނޭޓް ކުރަންޖެހޭނެ ކަމަށް އީރާނުން ތަކުރާރުކޮށް ބުނަމުންދާ ކަމަށެވެ.
އޭނާ އިތުރަށް ވިދާޅުވީ، ފަހަކަށް އައިސް ބައިނަލްއަގުވާމީ ކަނޑުގެ ސަރަހައްދުތަކުގައި "ކަނޑުފޭރުމާއި ވައްކަން ކުރުމުގެ" އަމަލުތައް ހިންގައި، ދުނިޔޭގެ ވިޔަފާރިއާއި އިގްތިސާދު ނުރައްކަލުގެ ތެރެއަށް ވައްޓާލާފައިވާ އެމެރިކާގެ މުޖުރިމު ލީޑަރުންނާއި އިސްތިއުމާރީ ޓެރަރިސްޓް އަސްކަރިއްޔާއަށް މިހާރު ހަގީގަތް އެނގެންވާނެ ކަމަށެވެ. އަދި އީރާނުގެ ކޮންމެ ސަރަހައްދަކަށް ނުވަތަ ކޮންމެ ފެންވަރެއްގައި ދެވޭ އުދުވާނީ ހަމަލާއަކަށް ނުވަތަ ނުރައްކަލަކަށް، އީރާނުގެ ވަރުގަދަ އަސްކަރިއްޔާއިން "ހަރުކަށި އަދި ހިތާމަކުރަންޖެހޭ ފަދަ" ރައްދެއް ދޭނެކަން އަމަލީގޮތުން ސާބިތުކޮށްދީފައިވާނެ ކަމަށް ވެސް އޭނާ ވިދާޅުވިއެވެ.
"އަޅުގަނޑުމެން ހޮރްމޫޒް ކަނޑުއޮޅީގެ ސަލާމަތީ ކަންކަން ފުރިހަމަ ގާބިލުކަމާއެކު ބަލަހައްޓާނަން. އަދި އެ ސަރަހައްދުގައި ތިބި އީރާނުގެ އަސްކަރީ ފައުޖުތަކާ ކޯޑިނޭޓް ކުރުމެއް ނެތި، އެއްވެސް ވިޔަފާރި އުޅަނދެއް ނުވަތަ ތެޔޮ ޓޭންކަރެއް ހޮރްމޫޒް ކަނޑުއޮޅި ހުރަސްކުރަން މަސައްކަތް ނުކުރުމަށް ނަސޭހަތްތެރިވަން. އެއީ އެ އުޅަނދުފަހަރުގެ ސަލާމަތަށް ނުރައްކާވެދާނެތީ،" އިސް ޖެނެރަލް ވިދާޅުވިއެވެ.
އޭނާ އަނެއްކާވެސް އިންޒާރު ދެއްވީ، ބޭރުގެ އެއްވެސް ހަތިޔާރު އެޅި ބާރަކުން، ޚާއްސަކޮށް އެމެރިކާގެ "އިސްތިއުމާރީ އަސްކަރިއްޔާ" އިން ހޮރްމޫޒް ކަނޑުއޮޅިއާ ކައިރިވާން ނުވަތަ އެ ސަރަހައްދަށް ވަންނަން މަސައްކަތްކޮށްފިނަމަ އެ ބަޔަކަށް އަމާޒުކޮށް ހަމަލާދޭނެ ކަމަށެވެ.
މީގެ އިތުރުން އޭނާ ވަނީ "ނުލަފާ އެމެރިކާ" އަށް ތާއީދުކުރާ ފަރާތްތަކުން، ފަހުން އިއާދަނުކުރެވޭ ފަދަ ހިތާމައަކާ ކުރިމަތިލާންޖެހޭ ފަދަ އަމަލެއް ނުހިންގުމަށް އިންޒާރު ދެއްވާފައެވެ. އަދި މަސްލަހަތު ގެއްލުވާލުމަށް އެމެރިކާއިން ހިންގާ ކޮންމެ އުދުވާނީ ހަރަކާތެއްގެ ސަބަބުން މަސްރަހު އިތުރަށް ގޯސްވެ، އެ ސަރަހައްދުން ދަތުރުކުރާ އުޅަނދުފަހަރުގެ ސަލާމަތަށް ނުރައްކާވާނެ ކަމަށް އޭނާ ވިދާޅުވިއެވެ.
އީރާނުން މި އިންޒާރު ދީފައިވަނީ، ހޮރްމޫޒް ކަނޑުއޮޅީގައި ތާށިވެފައިވާ އުޅަނދުފަހަރު "މިނިވަންކުރުމަށް" ހޯމަ ދުވަހުން ފެށިގެން އެމެރިކާއިން އެހީތެރިވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވުމާ ގުޅިގެންނެވެ. މިއީ އެ ސަރަހައްދުގައި އީރާނުން ހިންގާ ބްލޮކޭޑް ނުވަތަ ބަންދުކުރުންތައް މުގުރާލުމަށް ޓްރަމްޕްގެ ސަރުކާރުން ކުރާނެ ކަމެއްގެ އިޝާރާތެކެވެ.
ޓްރަމްޕް ވިދާޅުވެފައިވާ ގޮތުގައި "ޕްރޮޖެކްޓް ފްރީޑަމް" ގެ ނަމުގައި މި ހަރަކާތް ފެއްޓެވީ، ކަނޑުއޮޅީގައި އުޅަނދުފަހަރު ތާށިވެފައިވާ ގައުމުތަކުގެ އެދުމުގެ މަތިންނެވެ. އޭނާ އެ ގައުމުތައް ސިފަކުރެއްވީ "ވަކި ފަރާތަކަށް ނުޖެހޭ، ކުށެއް ނެތް ބައެއްގެ" ގޮތުގައެވެ.
އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ނެރުނު ބަޔާނެއްގައި ބުނެފައިވަނީ، ހޯމަ ދުވަހުން ފެށިގެން ކަނޑުއޮޅި ހުރަސްކޮށް "މިނިވަންކަމާއެކު ދަތުރުކުރަން ބޭނުންވާ" ވިޔަފާރި އުޅަނދުފަހަރަށް އެހީތެރިކަން ފޯރުކޮށްދޭން ފަށާނެ ކަމަށެވެ.
ފެބްރުއަރީ މަހުގެ 28 ވަނަ ދުވަހު، އެމެރިކާއާއި އިޒްރޭލުން ވަނީ އެއްވެސް އުދުވާނަކާ ނުލައި އީރާނާ ދެކޮޅަށް ހަނގުރާމައެއް ފަށާފައެވެ. އެ ހަމަލާތަކުގައި އީރާނުގެ އޭރުގެ ރޫހާނީ ލީޑަރު އާޔަތުﷲ ސައްޔިދު އަލީ ޚާމަނާއީ އާއި އަސްކަރިއްޔާގެ އިސް ބައެއް އޮފިޝަލުން ވަނީ އަވަހާރަކޮށްލާފައެވެ.
މީގެ ރައްދުގައި އީރާނުގެ އަސްކަރިއްޔާއިން ވަނީ ހަފުތާތަކެއް ވަންދެން މިސައިލާއި ޑްރޯން ބޭނުންކޮށްގެން، އިޒްރޭލުން ހިފާފައިވާ ފަލަސްތީނުގެ ބިންތަކާއި ފާރިސީ ކަނޑުއޮޅީގައި ހުރި އެމެރިކާއާއި އިޒްރޭލުގެ އަސްކަރީ މަރުކަޒުތަކަށް ހަމަލާދީފައެވެ. 40 ދުވަހުގެ ތެރޭގައި ދިން 100 އަށްވުރެ ގިނަ ރައްދު ހަމަލާތަކުގައި ބޮޑެތި ގެއްލުންތަކެއް ދީފައިވެއެވެ.
އީރާނުގެ ރައްދު ހަމަލާތަކުގެ ތެރޭގައި، ދުޝްމަނުންނާއި އެމީހުންގެ ބައިވެރިންގެ އުޅަނދުފަހަރަށް ހޮރްމޫޒް ކަނޑުއޮޅި ބަންދުކުރުން ވެސް ހިމެނެއެވެ.
އޭގެ ފަހުން އީރާނުން ވަނީ އެ ކަނޑުއޮޅިން ދަތުރުކުރާ އުޅަނދުފަހަރަށް އިތުރު ހުރަސްތަކެއް ކުރިމަތިކޮށް، އީރާނުގެ ކަމާބެހޭ އިދާރާތަކުގެ ހުއްދަ ހޯދައިގެން މެނުވީ ދަތުރު ނުކުރެވޭ ގޮތް ހަދާފައެވެ. އީރާނުން މި ފިޔަވަޅު އެޅީ، އީރާނުގެ އުޅަނދުފަހަރާއި ބަނދަރުތަކާ ދެކޮޅަށް އެމެރިކާއިން ހިންގަމުންދާ ޣައިރު ގާނޫނީ ބަންދުކުރުންތައް ކުރިއަށް ގެންދާނެ ކަމަށް އެމެރިކާއިން އިއުލާނު ކުރުމާ ގުޅިގެންނެވެ.
