ޖަރުމަނުގެ ކޯޗުކަމާ ހަވާލުވާން ކްލޮޕް އެއްބަސްވެއްޖެ

ޖަރުމަނުގެ ޤައުމީ ފުޓުބޯޅަ ޓީމުގެ ކޯޗު ކަމުގެ މަޤާމާ ހަވާލުވާން، އެ ޤައުމުގެ ތަޖުރިބާކާރު ކޯޗު ޔާގަން ކްލޮޕް އެއްބަސްވެއްޖެ އެވެ.

ޖަރުމަނުގެ ކޯޗު ކަމުގައި އެންމެ ފަހުން ހުރީ ހޫލިއަން ނާގަލްސްްމަން އެވެ. ނަމަވެސް، މިހާރު ކުރިއަށްދާ ފީފާ ވޯލްޑް ކަޕްގެ ގަދަ 32 ގައި ޕެރަގުއޭ އަތުން ބަލިވެ ޖަރުމަނު މުބާރާތުން ކެޓުމާ އެކު، ނާގަލްސްމަން ވަނީ މަޤާމުން އިސްތިއުފާ ދީފައި އެވެ. އެއީ ޖަރުމަނުގެ ފުޓުބޯޅަ އެސޯސިއޭޝަން އިން ނާގަލްސްމަން އަށް އެކަން އެންގުމުންނެވެ. 

އެއަށް ފަހު ޖަރުމަނުން ވަނީ ކްލޮޕް އާއެކު މަޝްވަރާތައް ކުރިއަށް ގެންގޮސްފައި އެވެ. އެގޮތުން ޖަރުމަނުގެ ކޯޗުކަމާ ހަވާލުވާން ކްލޮޕް މިހާރު އެއްބަސްވެފައިވާ ކަމަށް މީޑިއާ ރިޕޯޓުތައް ބުނެ އެވެ. އަދި ކުރިއަށް އޮތް ދުވަސް ތަކުގެ ތެރޭގައި ޖަރުމަނުން އެކަން ރަސްމީކޮށް އިއުލާން ކުރާނެ ކަމަށް ވެސް ބުނެފައިވެ އެވެ.

މީޑިއާ ތަކުގައި ބުނެފައިވާ ގޮތުން ޖަރުމަނުން ކްލޮޕް އަށް ދެނީ ދިގު މުއްދަތުގެ އެއްބަސްވުމެކެވެ. އެގޮތުން ޔުއެފާ ނޭޝަންސް ލީގާއި، 2028 ވަނަ އަހަރުގެ ޔޫރޯ ފުޓުބޯޅަ މުބާރާތް އަދި 2030 ގެ ފީފާ ވޯލްޑް ކަޕްގައި ކްލޮޕް ޖަރުމަނަށް އިރުޝާދު ދޭނެ ކަމަށް ބުނެފައިވެ އެވެ. މިއީ ކްލޮޕްގެ ކޯޗިން ކެރިއަރުގައި އޭނާ ޤައުމީ ޓީމަކަށް އިރުޝާދު ދޭނެ ފުރަތަމަ ފަހަރެވެ.

އުމުރުން 59 އަހަރުގެ ކްލޮޕް މިވަގުތު ހުރީ ރެޑްބުލްގެ ހެޑް އޮފް ގްލޯބަލް ސޮކާގެ މަޤާމުގައި އެވެ. އޭގެ ކުރިން އޭނާ އިރުޝާދު ދީފައި ވަނީ ލިވަޕޫލް އަށެވެ. ލިވަޕޫލްގައި ކާމިޔާބު މަސައްކަތް ތަކެއް ކުރުމަށް ފަހު، ކްލޮޕް އެ ކުލަބު ދޫކޮށްލަން ނިންމީ އެވެ. އޭގެ ފަހުން އޭނާ ހޯދުމަށް ބައެއް ކުލަބު ތަކުން ޝައުޤުވެރިކަން ފާޅު ކުރި ނަަމަވެސް، ކްލޮޕް ވަނީ ކުލަބަކާ ހަވާލުވުމުގެ ވިސްނުމެއް ނެތް ކަމަށް ހާމަ ކޮށްފައި އެވެ.

ޖަރުމަނުގެ މައިންޒުން ކޯޗިން ކެރިއަރު ފެށި ކްލޮޕް އަކީ، ދުނިޔޭގައި ތިބި ތަޖުރިބާކާރު ކޯޗުންގެ ތެރޭގައި ހިމެނޭ މީހެކެވެ. އޭނާ ވަނީ ޖަރުމަނުގެ ބޮރޫޝިއާ ޑޯޓްމަންޓުގެ އިތުރުން، ލިވަޕޫލް އަށް ވެސް އިރުޝާދު ދީފައި އެވެ. ލިވަޕޫލް އަށް އިރުޝާދު ދިން ނުވަ އަހަރުގެ ތެރޭގައި ކްލޮޕް ވަނީ އެ ކުލަބަށް އަށް ތައްޓެއް ކާމިޔާބު ކޮށްދީފައި އެވެ.