ޕެނަލްޓީގައި ވަރުގަދަ ޖަރުމަނު ކަޓުވާލައި، ޕެރަގުއޭ ގަދަ 16 އަށް

މިހާރު ކުރިއަށްދާ ފީފާ ވޯލްޑް ކަޕްގައި ވަރުގަދަ ޖަރުމަނާ ދެކޮޅަށް ކުޅުނު މެޗުން މޮޅުވެ، ޕެރަގުއޭ އިން މުބާރާތުގެ ގަދަ 16 އިން ޖާގަ ހޯދައިފި އެވެ.

އަންގާރަ ދުވަހުގެ ފަތިހު ކުޅުނު މެޗު ޕެރަގުއޭ އިން ކާމިޔާބު ކުރީ ޕެނަލްޓީ ޖަހައިގެންނެވެ. މެޗުގެ ފުރިހަމަ ވަގުތު ހަމަވީއިރު، ދެ ޓީމު އޮތީ 1-1 އިން އެއްވަރުވެފައި އެވެ.

މެޗގެ ފުރަތަމަ ހާފުގެ 42 ވަނަ މިނެޓުގައި ޕެރަގުއޭ އަށް ލީޑު ނަގައިދިނީ ހޫލިއޯ އެންސީސޯ އެވެ. ނަމަވެސް، ދެ ވަނަ ހާާފު ފަށައި ނުވަ ވަނަ މިނެޓުގައި ކައި ހަވާޓްޒް ވަނީ ލަނޑު ޖަހައި ޖަރުމަނަށް ނަތީޖާ ހަމަހަމަ ކޮށްދީފައި އެވެ. އެއީ ފްލޯރިއަން ވާޓްޒް ތަނަަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގެ ފުރިހަމަ ވަގުތު ހަމަވީއިރު ދެ ޓީމު އެއްވަރުވެފައި އޮތުމުން، އިތުރު ވަގުތުގެ ދެ ހާފު ކުޅެނެވެ. އިތުރު ވަގުތުގެ ހާފުގައި ޖަރުމަނުގެ ޖޮނަތަން ޓާ ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ.

މެޗުގެ ނަތީޖާ ނެރުމަށް ޖެހި ޕެނަލްޓީގައި ޖަރުމަނަށް ކާމިޔާބު ކުރެވުނީ ތިން ޕެނަލްޓީ އެވެ. އެ ޓީމުގެ އަނެއް ދެ ޕެނަލްޓީ ޕެރަގުއޭގެ ގޯލު ކީޕަރު ވަނީ މަތަކޮށްފައި އެވެ. އަދި އަނެއް ޕެނަލްޓީ ގޯލާ އަމާޒުވާ ގޮތެއް ނުވި އެވެ. ޕެރަގުއޭ އިން ވަނީ ހަތަރު ޕެނަލްޓީ ކާމިޔާބު ކޮށްފައި އެވެ. ޕެރަގުއޭގެ އެއް ޕެނަލްޓީ ގޯލާ އަމާޒު ނުވިއިރު، އަނެއް ޕެނަލްޓީ ޖަރުމަނުގެ ގޯލު ކީޕަރު ވަނީ ހުއްޓުވައިފަ އެވެ.

މުބާރާތުގެ ގަދަ 16 ހައި ޕެރަގުއޭ ވާދަ ކުރަން ޖެހޭނީ ފްރާންސް އާއި ސްވިޑެން ކުޅޭ މެޗުން މޮޅުވަާ ޓީމަކާ ދެކޮޅަށެވެ.