ރެއާލްގެ ކޯޗަކަށް ކްލޮޕް ގެންނަން އުޅޭ ކަމަށް ބުނާ ވާހަކަ ދޮގު ކޮށްފި

ރެއާލް މެޑްރިޑުގެ އިންތިޚާބު ކާމިޔާބުކޮށް އެ ކުލަބުގެ ރައީސްކަން ލިބިއްޖެ ނަމަ، އެ ކުލަބުގެ ކޯޗަކަށް ޔާގަން ކްލޮޕް ގެންނާނެ ކަމަށް ވިދާޅުވެ އެންރީކޭ ރިކޭލްމޭ ދެއްކެވި ވާހަކަތައް ކްލޮޕްގެ އެޖެންޓު ދޮގު ކޮށްފި އެވެ. 

ދާދި ފަހުން ރިކޭލްމޭ ވިދާޅުވެފައި ވަނީ، ރެއާލްގެ އިންތިޚާބު ކާމިޔާބުވެއްޖެ ނަމަ އެ ކުލަބުގެ ކޯޗަކަށް ކްލޮޕް ގެންނާނެ ކަމަށެވެ. އެގޮތުން އިންތިޚާބު ކާމިޔާބު ވެއްޖެ ނަމަ، ރެއާލްގެ ފަރާތުން ކްލޮޕްއާ ވާހަކަ ދައްކާނެ ކަމަށާއި، ރެއާލްގެ ޕްރޮޖެކްޓަށް ބޭނުންވާ ކޯޗަކީ ކްލޮޕް ކަމަށެވެ.

ނަމަވެސް، ކްލޮޕްގެ އެޖެންޓު ވަނީ ރިކޭލްމޭގެ ވާހަކަތައް ދޮގު ކޮށްފަ އެވެ. އެގޮތުން ރެއާލްގެ ކޯޗަކަށް ދިޔުމަކީ ކްލޮޕް ވިސްނަމުން އަންނަ ކަމެއް ނޫން ކަމަށް ވެސް އޭނާގެ އެޖެންޓު ވަނީ ބުނެފައި އެވެ. ކްލޮޕްގެ އެޖެންޓު ބުނީ މިފަދަ ވާހަކަތައް ފެތުރުމަކީ ވަރަށް ކަންބޮޑުވާ ކަމެއް ކަމަށާއި، ކްލޮޕް ހުރީ ރެޑްބުލްގެ މަސައްކަތުގައި ވަރަށް ހިތްހަމަ ޖެހިފައި ކަމަށެވެ. އެއާ އެކު އޭނާ ބުނީ، މިވަގުތު އެއްވެސް ކުލަބެއްގެ ކޯޗުކަމާ ހަވާލުވުމަކީ ކްލޮޕް ވިސްނާ ކަމެއް ނޫން ކަމަށެވެ. 

މިވަގުތު ކްލޮޕް އަންނަނީ ރެޑްބުލްގެ ހެޑް އޮފް ގްލޯބަލް ސޮކާގެ މަގާމު އަދާ ކުރަމުންނެވެ. އެ މަގާމަށް ދިޔުމުގެ ކުރިން އޭނާ ހުރީ ލިވަޕޫލްގަ އެވެ. ލިވަޕޫލް އަށް ނުވަ ސީޒަންގައި ކްލޮޕް އިރުޝާދު ދީފައިވާއިރު، އޭނާގެ އިރުޝާދުގެ ދަށުން ލިވަޕޫލް އިން ވަނީ އިނގިރޭސި ޕްރިމިއާ ލީގުގެ އިތުރުން، ޔުއެފާ ޗެމްޕިއަންސް ލީގު ވެސް ކާމިޔާބު ކޮށްފަ އެވެ. 

ރެއާލްގެ ރައީސް ކަމަށް އިންތިޚާބު ވެއްޖެ ނަމަ އެ ކުލަބުގެ ކޯޗަކަށް ކްލޮޕް ގެންނާނެ ކަމަށް ރިކޭލްމޭ ވިދާޅުވީއިރު، މީގެ ކުރިން އޭނާ ވަނީ ރައީސްކަން ލިބިއްޖެ ނަމަ މެންޗެސްޓަރ ސިޓީ އަށް ކުޅެމުން އަންނަ އާލިން ހާލަންޑް އާއި ރޮޑްރީ ވެސް ރެއާލް އަށް ގެންނާނެ ކަމަށް ވިދާޅުވެފައި އެވެ. ރިކޭލްމޭގެ އެ ވާހަކަތަކާ ގުޅިގެން ސިޓީ އިން ވެސް ވަނީ އެކަމާ މެދު ވަރަށް ބޮޑަށް ނުރުހުން ފާޅު ކޮށްފައި އެވެ. 

ރެއާލްގެ އިންތިޚާބު އާދީއްތަ ދުވަހު އޮންނައިރު، ރައީސް ކަމުގެ މަގާމަށް ވާދަ ކުރައްވަނީ ރިކޭލްމޭގެ އިތުރުން މިހާރު ވެސް ރައީސް ކަމުގައި ހުންނެވި ފްލޮރެންޓީނޯ ޕެރޭޒް އެވެ. ގިނަ ބަޔަކު ދެކޭ ގޮތުގައި އިންތިޚާބުގައި ކުރި ހޯއްދަވާނީ ޕެރޭޒް އެވެ.